डेढ सय फर्मलाई कर तिर्न ताकेता

पर्वत– करदाता सेवा कार्यालय कुश्माले समयमै कर विवरण पेस नगरेका झन्डै डेढ सय फर्म तथा कम्पनीलाई १५ दिने अल्टिमेटम जारी गरेको छ । कार्यालयले वैशाख ११ मा सूचना जारी गर्दै पर्वतका एक सय ४६ फर्म तथा कम्पनीका लागि १५ दिनभित्र विवरण अद्यावधिक गर्न अल्टिमेटम जारी गरेको हो ।

पर्वतमा आठ सय २६ अन्त:शुल्क, सात हजार ६ सय ९८ व्यक्तिगत पान प्रयोगकर्ता, सात सय ७० भ्याटतर्फ र एक सय ३९ आयकरतर्फका करदाता छन् । सूचनाअनुसार ६ महिना बढी कर विवरण पेस नगरेका करदातालाई ताकेता गरिएको हो । सबैभन्दा धेरै नेक्सा कन्स्ट्रक्सन एन्ड इन्जिनियरिङ सर्भिसेजले दुई सय २८ महिना अर्थात् ७६ त्रैमासिकको विवरण पेस गरेको छैन ।

यो कम्पनीले १९ वर्षदेखि कर विवरण दाखिला नगरेको पाइएको छ । यस्तै, ६ महिनादेखि करिब ६ वर्षसम्म विवरण पेस नगरेका कम्पनी तथा फर्मसमेत रहेको सेवा कार्यालय प्रमुख निमेश पौडेलले बताए । कार्यालयले तोकिएको अवधिमा कर विवरण नबुझाए दर्ता निलम्बन गरी फर्म रोक्का राखेर कारबाही प्रक्रिया अघि बढाउन सकिने चेतावनी दिएको छ ।

कार्यालयले समयमै मूल्य अभिवृद्धि कर नबुझाउने फर्म तथा कम्पनीलाई मूअक ऐन, २०८२ को दफा १७ को उप दफा ८ बमोजिम कारबाही गरिने जनाएको छ । उक्त दफा अनुसार ६ महिनासम्म कर विवरण नबुझाउने फर्म तथा कम्पनीको कर कट्टी गर्नुपर्ने रकम भए रोक्का राख्ने र दर्ता निलम्बन गर्न सकिने कानुनी व्यवस्था छ ।