साढे ६ करोड लागतमा गोरक्ष सिद्धरत्ननाथ मठ पुनर्निर्माण

दाङ– दाङको प्रसिद्ध धार्मिकस्थल गोरक्ष पात्रदेवता सिद्धरत्ननाथ मठ पुनर्निर्माण गरिएको छ । घोराही उपमहानगरपालिका–१७ चौघेरामा मन्दिरलाई पुरानै शैलीमा करिब पाँच वर्षपछि पुनर्निर्माण गरिएको हो । मठ पुनर्निर्माण भएसँगै मूल मठमा देवता र मूर्तिलाई सारेर सञ्चालनमा ल्याइएको छ ।

स्थायी रूपमा सञ्चालन गरिएको ठाउँबाट मूल मठमा गोरखनाथ, मच्छिद्रनाथ, रत्ननाथ, आदीनाथ, कालभैरव, बुटक भैरव, बाला सन्दरी, शिवालय लगायतका मूर्ति सारिएको मठका व्यवस्थापक हिरानाथ योगीले बताए । पुरानै शैलीमा निर्माण गरिएको मठ भव्य र आकर्षक देखिने गरेको बताए । व्यवस्थापक योगीका अनुसार १३ सय वर्ष पुरानो धार्मिक आस्था बोकेको चौघेरामा मठ पुरानोसँगै जीर्ण बनेपछि २०७५ सालमा नयाँ मठ निर्माणको काम सुरु भएको थियो ।

नेपाल सरकार संस्कृति पर्यटन तथा नागरिक उड्डयन मन्त्रालय पुरातत्व विभागको सहयोगमा दुई वर्षभित्र मठ निर्माणको काम सक्ने गरी सुरु भए पनि निर्माणका क्रममा फैलिएको कोरोना भाइरससँगै निर्माण सामग्री काठमाडौं र भक्तपुर लगायतका ठाउँबाट ल्याएर काम गर्दा ढिलाइ भएको उनी बताउँछन् । निर्माणको काम सकिएपछि मूल मठमै दैनिक पूजापाठको काम सुरु भएको उनले बताए ।

व्यवस्थापक योगीले भने, ‘सम्झौताअनुसार मठ निर्माणको काम सकेर हस्तान्तरण भएपछि वैदिक परम्पराअनुसार मूर्तिको प्राणप्रतिष्ठा, कोठा पूजा र हवन गरेर मठलाई सञ्चालनमा ल्याएका हौँ ।’ उनका अनुसार मठ ढुंगा, चुना, सुर्की र काठको प्रयोग गरेर निर्माण गरिएको छ । मठमा इँट्टा, बालुक र माटो प्रयोग गरिएको छैन । प्यागोडा शैलीमा निर्माण गरिएको मठ आकर्षकसँगै खुला र फराकिलो भएको छ ।

नवनिर्मित मठमा दैनिक पूजास्थलसँगै मठाधीस, महन्त, सिरने, भण्डारीलगायत बस्ने आवास गृहसँगै भजन कृतन गर्ने ठाउँ, अतिथिलाई राख्ने कोठा निर्माण गरिएको छ । करिब ६ करोड ६५ लाख बढी रुपैयाँ खर्च गरेर मठको पुनर्निर्माणको काम प्रकृति–सानु, सुवाल–पवन जेभी काठमाडौंले गरेको थियो ।

भेष बाह्रपन्थी नाथ संस्कृतिको केन्द्रका रूपमा गोरक्ष पात्रदेवता सिद्धरत्ननाथ रहेको छ । मठभेष पन्थी बाह्रनाथ समुदायको महत्त्वपूर्ण धार्मिक केन्द्रका रूपमा रहेको छ । मठलाई आकर्षक बनाउनका लागि झ्याल, ढोका र टुडालहरूमा विभिन्न देवीदेवताका मूर्तिहरू कुँदिएको उनको भनाइ छ ।

व्यवस्थापक योगीले भने, ‘पहिलेको तुलनामा अहिलेको नयाँ मठ आकर्षण र कलात्मक बनेको छ । मठ यस क्षेत्रको थप आकर्षक बन्ने छ ।’ चौघेरामा मूल मठसँगै भैरवनाथ मन्दिर, दलिचा, कालसेन मन्दिर, गोरक्षनाथ नवनाथ मन्दिर, ऐतिहासिक रत्नेश्वर महादेव मन्दिर, ऐतिहासिक कुवासँगै गोरक्षरत्ननाथ पुस्तकला र प्रभात चित्रकला रहेको छ ।