पूर्व प्रधानमन्त्री चन्दको आत्मकथा ‘लोकेन्द्रबहादुर चन्द’ पुस्तक आउँदै

काठमाडौं– पूर्व प्रधानमन्त्री तथा साहित्यकार लोकेन्द्रबहादुर चन्दको आत्मकथामा आधारित पुस्तक ‘लोकेन्द्रबहादुर चन्द’ चाँडै बजारमा आउने भएको छ । लेखन कुञ्जले प्रकाशन गर्ने यो आत्मकथा पुस्तकको शनिबार आयोजित एक कार्यक्रममा कभर सार्वजनिक गरियो । पूर्व प्रधानमन्त्री चन्द ८६ वर्ष प्रवेश गरेको अवसर पारेर कुञ्जले चन्दकै निजी आवास भक्तपुरको लोकन्थलीमा कभर सार्वजनिक गरेको हो ।

मुलुकको चार पटक प्रधानमन्त्री बनेका चन्दले साहित्यमा सबैभन्दा ठुलो पुरस्कार मदन पुरस्कार पनि प्राप्त गरेका थिए । चन्दका एक दर्जन भन्दा धेरै पुस्तक प्रकाशित भइसकेका छन् । प्रकाशन गृह लेखन कुञ्जले चन्दको यो आत्मकथा आउँदो जेठ भित्रमा प्रकाशन गर्ने जानकारी दिएको छ । कुञ्जका अनुसार आत्मकथा पुस्तकमा पूर्व प्रधानमन्त्री चन्दले जीवन कालमा भोगेका, देखेका सबै विषयवस्तुलाई समेटिएको छ ।

‘पश्चिम पहाडको बैतडीबाट जीवन सुरु गरेका चन्द कसरी मुलुकको चार पटक प्रधानमन्त्री बन्न सक्नुभयो ? उहाँको कार्यकालमा के कस्ता कामहरु भए ? राजनैतिक र साहित्यिक जीवनमा के कस्ता उतार चढाव आए ? लगायतका सबै विषय पुस्तकमा समेटिएका छन्,’ लेखन कुञ्जले जारी गरेको विज्ञप्तिमा भनिएको छ ।

पूर्व प्रधानमन्त्री चन्द राजनीतिमा पनि सालिन र भद्र नेताका रुपमा चिनिन्छन् । अहिलेको राजनीतिमा अनियमितता, भ्रष्टाचार जस्ता विषयले अधिकांस राजनैतिक नेताहरु विवादमा तानिएका छन् । तर मुलुकमा चार पटक प्रधानमन्त्री बन्दा पनि चन्द कुनै पनि विवादमा अहिलेसम्म तानिएका छैनन् । राजनीति बाहेक साहित्य लेखनमा पनि चन्द उत्तिकै सक्रिय छन् ।

गत २०५४ मा ‘विसर्जन’ नामक पुस्तकका लागि चन्दलाई मदन पुरस्कार प्रदान गरिएको थियो । नेपाली साहित्यको यो सबैभन्दा ठुलो पुरस्कार हो । आत्मकथा पुस्तकको कभर सार्वजनिक कार्यक्रममा छोटो मन्तव्य दिंदै चन्दले लेखन कुञ्जले आत्मकथा प्रकाशित गर्न लागेकामा धन्यवाद दिए ।