१२ योजना निर्माण, एक करोड २१ लाख अन्तिम भुक्तानी

जुम्ला– जिल्लाका अन्य पालिकाले योजनामै सम्झौता प्रक्रिया अघि नबढाएको अवस्थामा जुम्लाको तातोपानी गाउँपालिकाले नो वटा योजना निर्माण गरी अन्तिम भुक्तानी दिएको छ । चालु आवको पुस मसान्तसम्म १२ वटा योजना निर्माण सम्पन्न गरी नौवटा योजनाको अन्तिम भुक्तानीसमेत भइसकेको छ ।

अर्धवार्षिक प्रगति विवरणनुसार तातोपानीले ६ महिनामा १२ वटा योजना निर्माण सम्पन्न गरेकामा नौवटा योजनाको एक करोड २१ लाख बजेट अन्तिम भुक्तानी गरिसकेको प्रमुख प्रशासकीय अधिकृत तीर्थबहादुर कठायतले बताए । जसमा वडा नं ३ को कार्कीबाडा कालिका थान निर्माण तीन लाख, वडा नं भुयार थान निर्माण रोड ग्यामिन निर्माण एक लाख, वडा नं ८ मा नदैदेवि आविदेखि देउलीसम्म गोेरेटो बाटो निर्माण, दुई लाख अन्तिम भुक्तानी गरिएको छ ।

त्यस्तै वडा नं ८ मा जोखे आटीदेखि थलालेसम्म सडक स्तरोन्नति योजना निर्माण सम्पन्न गरी ५० लाख अन्तिम भुक्तानी गरिएको छ । त्यस्तै वडा नं ७ को जनजागृती मावि व्यवस्थापन कार्यक्रममा तीन लाख, वडा नं ५ को श्रीनगर चौरदेखि चीन सेराडिलसम्म तटबन्ध निर्माणमा १३ लाख, वडा नं ५ मै श्रीनगर सडक बत्ती योजनामा आठ लाख ५० हजार, उक्त वडाकै गहडाखोला तटबन्ध निर्माणमा तीन लाख र वडा नं ८ को बालाङटाङदेखि बुङतडी तटबन्ध निर्माण आयोजना सम्मपन्न गरी ३५ लाख बजेट अन्तिम भुक्तानी दिइएको छ ।

८ वटा वडा रहेको तातोपानीले पालिकाभित्रको भौगोलिक विकटतालाई मध्यनजर गर्दै भेरीखोला क्षेत्रको पूर्वाधार विकासलाई पहिलो जोड दिएको तातोपानी गाउँपालिका अध्यक्ष नन्दप्रसाद चौलागाईंले बताए । असारे विकासलाई निरुत्सहित गर्ने अभियान थालेको तातोपानीले हरेक वर्षको अन्तिम भुक्तानी ढिलोमा वैशाख मसान्तमै सक्ने लक्ष्य लिएका छौं ।

अध्यक्ष चौलागाईंले भने, ‘चालु आवमा कार्यान्वयन हुने कुल १३७ वटा योजना तथा कार्यक्रममध्ये ६ महिनासम्म ७१ योजना सम्झौता भएका छन् । सम्झौता भएका योजनामध्ये १२ वटा योजना निर्माण सम्पन्न भई नौ योजनाको अन्तिम भुक्तानी गरेका छौं भने २० वटा योजनाका लागि पेश्की रकम दिइएको छ । अबको एक महिनामा योजना सम्झौता सकेर कार्यान्वयन प्रक्रिया अघि बढाउँछौ ।’

केही योजना निर्माणका लागि जग्गा प्राप्ति गर्न बाँकी रहेकाले सम्झौता हुन ढिलाइ भएको छ । यद्यपि जग्गाा प्राप्तिका लागि स्थानीय नागरिकसँग पालिकाले समन्वय गरिरहेको अध्यक्ष चौलागाईंको भनाइ छ । तातोपानी गाउँपालिका उपाध्यक्ष रेवती रावलले पालिकाको पूर्वाधार विकासलाई गुणस्तर बनाउन अनुगमन संयोजकका हिसाबले अनुमगन निरीक्षण तथा गुणस्तर मापनलाई जोड दिएको बताइन् ।

उनका अनुसार आन्तरिक आय वृद्धिको दायरालाई फराकिलो बनाई राजस्व परिचालनमा जोड दिइएको छ । चालु आवको ६ महिनामा तातोपानीले १७ लाख ५३ हजार राजस्व संकलन गरेको छ । त्यस्तै जिल्लामै पहिलो दुई हजार एक सय घरधुरी घर बीमा कार्यक्रमबाट लाभान्वित भएका छन् । ६ महिनामै तातोपानीले पूर्वाधार विकासमा लिएको गतिले सुशासन तथा पारदर्शितामा थप टेवा पुर्‍याएको छ ।

अर्धवार्षिक खर्च २७ प्रतिशत
तातोपानी गाउँपालिकाको अर्धवार्षिक बजेट खर्च २७ प्रतिशत भएको छ । चालु आर्थिक वर्ष २०८१/०८२ को अर्धवार्षिक बजेट खर्च २७.३२ प्रतिशत बजेट खर्च भएको हो । तातोपानी गाउँपालिका गाउँसभाको १६औं अधिवेशनमा प्रस्तुत अर्धवार्षिक भौतिक तथा वित्तीय प्रगतिअनुसार कुल विनियोजित बजेटमध्ये चालुतर्फ ३३.३२ प्रतिशत, पुँजीगततर्फ १५.२४ प्रतिशत बजेट खर्च भएको छ ।

चालु र पुँजीगततर्फ तातोपानी गाउँपालिकाले चालु आर्थिक वर्षमा ५४ करोड ७५ लाख रुपैयाँ विनियोजन गरेकामा चालु आवको ६ महिनामा १४ करोड ३२ लाख रुपैयाँ खर्च भएको छ । तातोपानी गाउँपालिका उपाध्यक्ष रेवती रावलले १६औं अधिवेशनमा प्रस्तुत गरेको विवरणनुसार कुल १७ करोड आठ लाख पुँजीगत बजेटमध्ये ६ महिनामा दुई करोड ६० लाख रुपैयाँ खर्च हुँदा चालुतर्फ विनियोजित ३५ करोड ३४ लाखमध्ये ११ करोड ७२ लाख खर्च भएको देखिन्छ ।

साथै तातोपानी गाउँपालिका गाउँसभाको १६औं अधिवेशन विभिन्न नीति पारित गर्दै सम्पन्न भएको छ । विद्यायन अधिवेशनका रूपमा सञ्चालन हुने हिउँदे अधिवशेनमा विशेषगरी नयाँ नीति पारित र पूरा नीति संशोधन गरिन्छ । यसैबीच तातोपानी गाउँपालिकाको १६औं अधिवेशनले नयाँ १५ र २ वटा संशोधनसहित १७ वटा कार्यविधि, ऐन पारित गरेको छ भने अर्धवार्षिक प्रगतिलाई अनुमोदनसमेत गरेको छ ।