सहरी विकास मन्त्रालयको पुँजीगत खर्च १२ प्रतिशत

काठमाडौं– सहरी विकास मन्त्रालयको कुल ६३ अर्ब ७८ करोड ४५ लाख पुँजीगत बजेटमध्ये माघ तेस्रो सातासम्ममा ७ अर्ब ७९ कारोड ४४ लाख रुपैयाँ खर्च भएको छ । यो कुल पुँजीगत बजेटको १२.२२ प्रतिशत हो ।

पछिल्ला दुई महिना (पुस र माघ) मा पुँजीगत खर्चमा तुलनात्मक सुधार देखिएको छ । मंसिरसम्म मन्त्रालयको पुँजीगत खर्च ४ अर्ब १८ करोड ३ लाख रुपैयाँ अर्थात ६.६२ प्रतिशत मात्र थियो । मन्त्रालयले सार्वजनिक गरेको विवरणअनुसार चालु आर्थिक वर्ष (आव) २०८१/८२ का नयाँ कार्यक्रममध्ये अहिलेसम्म १ हजार ८७४ वटा कार्यक्रमको बोलपत्र आह्वान भएका छन् ।

त्यसमध्ये माघ महिना सकिन लाग्दा बल्ल १ हजार १३९ वटा कार्यक्रमको ठेक्का सम्झौता भएको छ । यो बोलपत्र आह्वान गरिएका ठेक्काको ६० प्रतिशत हो । अहिलेसम्म ठेक्का सम्झौता भएकामध्ये ६० प्रतिशत कार्यक्रम सम्पन्न भएका छन् । चालु आवमा मन्त्रालयबाट बहुवर्षीय ठेक्का सम्झौता लागि २८८ कार्यक्रम प्रस्ताव गरिएकोमध्ये १५९ कार्यक्रमको स्रोत सहमति प्राप्त भएको छ ।

अहिलेसम्म ११० वटा संशोधनको लागि प्रस्तावित कार्यक्रममध्ये ७२ कार्यक्रम संशोधन भएका छन् । बाँकी संशोधन हुने प्रक्रियामा रहेको सहरी विकास मन्त्रालयका सचिव गोपाल प्रसाद सिग्देलले बताए । यसैगरी अघिल्ला आवका ३०३ वटा क्रमागत तथा बहुवर्षीय स्वीकृत कार्यक्रम यही आवमा सम्पन्न भएका छन् । हालसम्म ३६ वटा स्थानीय तहहरूको प्रशासकीय भवनको निर्माण कार्य सम्पन्न गरी सार्वजनिक सेवा सुचारु भएको छ । ७ वटा स्वास्थ्यको भवन निर्माण कार्य सम्पन्न भएका छन् ।

प्राकृतिक विपद्को समयमा समुदायलाई आश्रयस्थल उपलब्ध गराउनको लागि २ वटा ‘इमर्जेन्सी सेल्टर’ निर्माण कार्य सम्पन्न भएको छ । मन्त्रालयमार्फत निर्माण भएका प्रमुख भवनमध्ये ३ असोज २०८१ अर्थात् संविधान दिवसको दिनबाट धरहरा सञ्चालनमा ल्याई परीक्षणको लागि धरहरा, बेसमेन्ट पार्किङ र बगैंचा सर्वसाधारणको लागि खुला गरेको छ । यस्तै, दमक व्यापारिक कम्प्लेक्स निर्माण कार्य सम्पन्न भई प्रधानमन्त्रीले उद्घाटन गरेका छन् ।

सिटिहलको निर्माण कार्यअन्तर्गत चितवन सौराहामा सभाहल भवन निर्माण सम्पन्न भएको, सुनसरीको लौकही सभाहलको निर्माण कार्य अन्तिम चरणमा रहेको र नेपालगञ्ज सिटिहलको ठेक्काअनुसारको निर्माण कार्य सम्पन्न भइसकेको मन्त्रालयले जानकारी दिएको छ । मन्त्रालयअन्तर्गत चण्डीदल गणको लागि भवन निर्माण कार्य सम्पन्न भई हस्तान्तरणको प्रक्रियामा रहेको छ भने भैंसेपाटीस्थित मन्त्री निवासको दोस्रो चरणको निर्माण कार्य ८१ प्रतिशत सम्पन्न भई बाँकी निर्माण कार्य भइरहेको छ ।

ग्रामीण आवागमनको सुधार गर्न झापा, रोल्पा र पर्वत गरी ३ जिल्लामा कुल ६.९ किमी ग्रामीण कालोपत्रे सडक निर्माण भएको छ भने ४ वटा स्थानीय सडक पुल तथा १२४ वटा झोलुङ्गे पुल निर्माण सम्पन्न भएको छ । त्यसमध्ये १ हजार ५७१ मिटरको त्रिवेणी सुस्ता बहुत्तरी झोलुङ्गे पुल सम्पन्न भई राष्ट्रपतिले उद्घाटन गरी सञ्चालनमा आएको छ । मन्त्रालयले यहीबीचमा विशिष्ट संरचना सञ्चालन सम्बन्धमा (गठन) आदेश स्वीकृत भई कार्यकारी निर्देशकको नियुक्ति गरेको छ ।

विशिष्ट संरचना सञ्चालनको लागि ढाँचा तय गर्न आवश्यक पर्ने कार्यविधि, मापदण्ड तथा विनियमावली तयारी प्रक्रियामा अगाडि बढाइएको सचिव सिग्देलले जानकारी दिए । चालु आव २०८१/८२ मा सहरी विकास मन्त्रालयको जम्मा बजेट ९१ अर्ब ३५ करोड २३ लाख रहेकोमा संघतर्फ ६८ अर्ब २४ करोड २८ लाख रुपैयाँ रहेको छ । त्यसमध्ये चालुतर्फ ४ अर्ब ४५ करोड ८३ लाख रुपैयाँ रहेको छ । हालसम्म चालुतर्फको खर्च १९.४७ प्रतिशत रहेको छ ।