राजधानी पुग्न अर्को प्रदेश जानुपर्ने बाध्यता हट्यो

जुम्ला– कर्णाली प्रदेशका हिमाली जिल्लामा आन्तरिक हवाई उडान सुरु भएपछि आफ्नै प्रदेश राजधानी पुग्न लुम्बिनी प्रदेश जानुपर्ने कर्णालीबासीको बाध्यता हटेको छ । बुधबारदेखि कर्णालीको राजधानी सुर्खेतबाट हिमाली जिल्ला जुम्ला, मुगु र हुम्लामा आन्तरिक हवाई उडान सुरु भएको हो ।

कर्णाली प्रदेशको राजधानीबाटै आन्तरिक उडान सुरु भएपछि सुर्खेतमा बसोबास गरिरहेका हुम्ला, मुगु र जुम्लाका विद्यार्थी र स्थानीय उत्साहित बनेका छन् । यसअघि साविक कर्णालीका कर्मचारीदेखि सर्वसाधारणलाई अत्याआश्यक कामका लागि आफ्नै प्रदेश राजधानी सुर्खेत जानका लागि छिमेकी लुम्बिनी प्रदेश भएर जानुपर्ने बाध्यता थियो ।

संघीयता कार्यान्वयनपछि स्थानीय तहका गोष्ठी, सेमिनारहरु प्रायः प्रदेशमै हुने गरेका छन् । कर्णालीमा आन्तरिक उडान नहुँदा लुम्बिनी प्रदेश भएर कर्णालीको राजधानी सुर्खेत आउनुपर्ने नियतिजस्तै बनेको थियो । तर, साविक कर्णालीका नागरिकको समस्यालाई मध्यनजर गर्दै तारा एयरसले बुधबारदेखि जुम्ला, मुगु र हुम्लामा नियमित उडान सुरु गरेपछि लुम्बिनी प्रदेश धाउनुपर्ने बाध्यता हटेको हो ।

सुर्खेतबाट कर्णालीका हिमाली जिल्लामा उडान सुरु भएपछि निकै राहत भएको स्थानीयले बताएका छन् । जुम्लाका स्थानीय हरिसिंह बुढाले भने, ‘आन्तरिक उडान नहुँदा आफ्नै प्रदेश पुग्न पनि महँगो खर्च गरी नेपालगन्ज जानुपर्ने बाध्यता थियो । अब सुर्खेतबाटै उडान हुने भएपछि सहज हुने अपेक्षा छ ।’ आन्तरिक उडान भएकोमा कर्णालीबासी खुसी भए पनि टिकट वितरण प्रक्रियालाई पारदर्शी बनाउनुपर्नेमा नागरिक अगुवा प्रेमबहादुर अधिकारीको जोड छ । पहुँचकै भरमा टिकट दिने प्रवृत्ति अन्त्य नभएसम्म नागरिकले राहत महसुश नगर्ने उनले बताए ।

तारा एयरले हरेक हप्ताको बुधबार र शनिबार सुर्खेतदेखि जुम्ला, मुगु र हुम्लामा उडान भर्ने कम्पनीका नेपालगन्ज स्टेसन इन्चार्ज सूर्यमणि सुवेदीले बताए । उनका अनुसार हिमाली टुर्स एण्ड ट्राभल्सले कर्णालीका तीन जिल्लामा हवाई उडानको जिम्मा पाएको छ । सुर्खेत–सिमिकोट ८ हजार, सुर्खेत–रारा ६ हजार ५ सय र सुर्खेत–जुम्ला ६ हजार ५ सय भाडादर निर्धारण गरिएको छ ।

जुम्ला, मुगु र हुम्ला कर्णालीका पर्यटकीय जिल्ला पनि भएकोले आन्तरिक उडान भएपछि कर्णालीको पर्यटन प्रवद्र्धनमा समेत टेवा पुग्ने विश्वास गरिएको छ । कर्णालीमा आन्तरिक उडानपछि पर्यटन प्रवद्र्धन र आउजाउमा सहज हुनेदेखि हरेक हिसाबले राहत हुने हिमाली टुर्स एण्ड ट्राभल्सका प्रबन्ध निर्देशक मीनबहादुर रावलले बताए । तीन जिल्लामा उडान सुरु भएको र डोल्पामा पनि गर्ने तयारी भइरहेको उनले जानकारी दिए ।