उद्योग संगठनलाई एशिया प्रशान्त क्षेत्रको उत्कृष्ट चेम्बरको अवार्ड

विराटनगर– उद्योग संगठन मोरङले एशिया प्रशान्त क्षेत्रको उत्कृष्ट चेम्बर अवार्ड प्राप्त गरेको छ । यस क्षेत्रका २७ भन्दा बढी देशका ८१ वटा स्थानीय औद्योगिक र व्यापारिक चेम्बरलाई पछि पार्दै क्यासी अवार्ड लोकल चेम्बर, विग क्याटोगरीको उत्कृष्ट चेम्बरको अवार्ड र दुई हजार डलर प्राप्त गर्न सफल भएको छ ।

कन्फेडेरेसन अफ एशिया प्यासिफिक चेम्बर अफ कमर्श एण्ड इण्डष्ट्रिज र सिङ्गापुर म्यानुफ्याक्चरिङ एशोसिएशनको संयुक्त आयोजनामा सिंगापुरमा भएको इकोनोमिक फोरम तथा ३८औं क्यासी कन्फेरेन्सको समापन समारोहमा संगठनका अध्यक्ष राकेश सुरानालाई उक्त अवार्ड प्रदान गरिएको छ ।

क्यासीले चेम्बरहरूले स्थानीय आर्थिक विकासका लागि खेलेको भूमिका, नीति निर्माणका क्षेत्रमा गरेको बहस पैरवी, स्थानीय औद्योगिक गतिविधिमा पुर्‍याएको टेवाका साथै समग्र आर्थिक एवं औद्योगिक विकासमा पुर्‍याएको योगदानका आधारमा सो अवार्ड प्रदान गरेको हो । अवार्डका लागि क्यासीको सदस्य रहेका २७ मुलुकका ८१ वटा व्यावसायिक संगठनले प्रतिस्पर्धामा सहभागिता जनाएका थिए ।

जसमा गतिविधि, दस्तावेज, औद्योगिक उत्थानका लागि गरेको कार्यक्रमका आधारमा उद्योग संगठन मोरङ उत्कृष्ट हुन सफल भएको हो । संगठनले अन्तर्राष्ट्रिय अवार्ड जित्न सफल भएकोमा खुशी व्यक्त गर्दै संगठनका अध्यक्ष राकेश सुरानाले यसलाई कार्यसमिति, सदस्य उद्योग प्रतिष्ठान, नेपाल उद्योग वाणिज्य महासंघका साथै संगठनका शुभेच्छुकको सामूहिक प्रयासको प्रतिफलका रूपमा रहेको प्रतिक्रिया दिए ।

उनले प्रदेश सरकारको आयोजना तथा संगठनको सहसंयोजनमा आगामी माघ ११ देखि १३ गतेसम्म विराटनगरमा हुने कोशी प्रदेश लगानी सम्मेलन तथा विराट एक्स्पो २०२५ मा सहभागिताका लागि क्यासी कन्फेरेन्समा उपस्थित विभिन्न देशका व्यवसायीलाई आमन्त्रण गरेका छन् । अध्यक्ष सुरानाको नेतृत्वमा संगठनको प्रतिनिधिमण्डल कात्तिक २४ गते सिंगापुर गएको थियो ।

प्रतिनिधिमण्डल संगठनका निवर्तमान अध्यक्ष सुयश प्याकुरेल, वरिष्ठ उपाध्यक्ष नन्दकिशोर राठी, उपाध्यक्षत्रय राजकुमार गोल्छा, भोलेश्वर दुलाल, कार्यसमिति सदस्य सुरेन्द्र गोल्छा, पारस लुनिया, जयेन्द्र शर्मा, सिद्धार्थ काबरा, सिर्जन प्याकुरेल, वीरेन्द्र राठी, सन्तोषकुमार भगत र महानिर्देशक चूडामणि भट्टराई सहभागी छन् । २०२४ सालमा स्थापित जुद्धबहादुर श्रेष्ठलगायतको सक्रियतामा उद्योग संगठन स्थापना भएको थियो । स्थापनादेखि नै संगठनले उद्योगी व्यवसायीका हकहितका विषयमा कार्य गर्दै आएको छ ।