प्रदेशको विकासमा सहयोग गर्नुस्: मुख्यमन्त्री आचार्य

दाङ– लुम्बिनी प्रदेशका मुख्यमन्त्री चेतनारायण आचार्यले प्रदेशको समग्र विकासमा लगानी गर्न अन्तर्राष्ट्रिय समुदायसमक्ष आह्वान गरेका छन् । चीनको सिचुआन प्रदेश सरकारले आयोजना गरेको अन्तर्राष्ट्रिय सम्मेलनलाई सम्बोधन गर्दै मुख्यमन्त्री आचार्यले समग्र प्रदेशको विकासमा लगानी गर्न आह्वान गरेका हुन् । लुम्बिनी प्रदेशभित्र कुनै पनि क्षेत्रमा सिचुवान प्रान्तलगायत कुनै पनि प्रान्तबाट इच्छुक लगानीकर्ताको लगानी भित्रयाउन र लगानी सुरक्षित गर्न आवश्यक सहयोग गर्न प्रदेश सरकार प्रतिबद्ध रहेको जनाए । उनले लुम्बिनी प्रदेशमा खुलेर लगानी गर्न आह्वान गरे ।

साथै लुम्बिनी प्रदेशले छिट्टै लगानी सम्मेलनको आयोजना गर्ने जानकारी दिँदै मुख्यमन्त्री आचार्यले सम्मेलनमा सहभागी हुन कूटनैतिक नियोगमार्फत् पत्रचार हुनेसमेत बताए । उनले सिचुआन प्रदेश सरकार, विभिन्न लगानीकर्ता, कम्पनी, संघ संस्थालाई उत्साहपूर्ण उपस्थितिका लागि आह्वानसमेत गरे । सम्मेलनलाई सम्बोधन गर्दै मुख्यमन्त्री आचार्यले लुम्बिनी, गौतम बुद्धको जन्मस्थललाई समृद्ध बनाउने, यसलाई विश्वको एक महत्त्वपूर्ण र नमुनास्थल बनाउने दायित्व सबैको साझा रहेको बताए । उनले लुम्बिनीसँग जोडिएका विकास निर्माण कार्यमा साझा लगानी गर्न आह्वान गरे ।

‘लुम्बिनी, गौतम बुद्धको जन्मस्थललाई समृद्ध बनाउने, यसलाई विश्वको एक महत्त्वपूर्ण र नमुनास्थल बनाउने दायित्व हामी सबैको साझा हो । तसर्थ यससँंग जोडिएका विकास निर्माणका कार्यमा साझा लगानी गरौं । साझा प्रतिफल हासिल गरौं विश्वको शान्ति दीपलाई थप प्रज्वल्लित गरौं,’ मुख्यमन्त्री आचार्यले भने, ‘म हार्दिक आमन्त्रण गर्दछु कि, हामी अब छिट्टै लुम्बिनीमा लगानी सम्मेलन गर्दैछौं । त्यसका लागि यहाँहरूको उपयुक्त समयका बारेमा छलफल गर्दै सो समयको किटान पश्चात् हाम्रो कूटनैतिक नियोगमार्फत् पत्राचार गर्नेछौं । त्यसमा यहाँको प्रदेश सरकार, विभिन्न लगानीकर्ता, कम्पनी, संघसंस्था सबैको उत्साहपूर्ण उपस्थिति हुनेछ ।’

सम्मेलनमा मुख्यमन्त्री आचार्यले बौद्ध पर्यटनको विविधिकृत विकासका लागि घनिष्ट सहकार्य गर्न आग्रह गरे । ‘स्थानीय जनता, पर्यटन व्यवसायी र पथप्रदर्शक, हाम्रो सरकार अन्तर्गतका बुद्ध सर्किटमा पर्ने नगरपालिका, लुम्बिनी बौद्ध विश्वविद्यालय, साँस्कृतिक सम्पदास्थल आदिसँंग घनिष्ट सहकार्यका लागि समेत आह्वान गर्न चाहान्छु,’ आचार्यले भने, ‘लुम्बिनी प्रदेशभित्र उत्पादन गरिएका वस्तुको विकास र ब्राण्डिङ गर्दै हाम्रा जनताको रोजगारी र जीवनयापनसँंग जोडन तपाईंहरूको अनुभव प्रविधिमात्र नभई उत्पादित वस्तुको बजार सृजना गर्न, नियमित व्यापार मेला आयोजना गर्न वा लुम्बिनी प्रदर्शनी केन्द्र स्थापना गर्नका लागि पहल गर्नसमेत यहाँहरू समक्ष अनुरोध गर्दछु ।’

उनले लुम्बिनी भ्रमण गर्न सिचुआन सरकार, सिचुवानबासी समुदाय तथा आम चिनियाँ जनतालाई आमन्त्रणसमेत गरे । सिचुआन सरकारसँग भएको भगिनी सम्बन्धलाई प्रगाढ बनाउन छेन्दु र भैरहवाबीच सिधा हवाई सेवा सञ्चालन गर्न आग्रह गरे । सिधा हवाई सेवा सुरु हुँदा दुई मितेरी प्रदेशका जनताको मित्रता अझ बढी प्रगाढ हुनेसमेत उनले बताए ।

‘हाम्रो मितेरी सम्बन्ध अगाडि बढाउन चाहान्छौं । हामी हाम्रा सिकाइ, अनुभव तथा विकासका सम्भावनालाई आदानप्रदान गर्न प्रतिबद्ध छौं र तपाईंहरूको प्रतिबद्धताको अपेक्षा गर्दछौं,’ मुख्यमन्त्री आचार्यले भने, ‘चिनियाँ जनता र नेपाली जनताबीचको अन्तरसम्बन्ध विकासमा भगवान गौतमबुद्ध र उहाँको जन्मस्थल लुम्बिनीले हामी र हाम्रो भावनालाई सुदृढ गर्न महत्त्वपूर्ण भूमिका खेलेको छ किन भने हामी नेपालीले लाखौं लाख चिनियाँ तीर्थयात्रीलाई सो पवित्र स्थानमा स्वागत गर्न पाइरहेका छौं ।’

मुख्यमन्त्री आचार्यले चिनिया विकास मोडेल, प्रविधि तथा समृद्धिबाट सिकाइ हासिल गर्न चाहेको बताए । ‘हामीले सिक्न चाहान्छौं र हामीहरू पनि सँगै यात्रा गर्न चाहान्छौं । किन भने हाम्रो देश नेपाल र हाम्रो प्रदेश नमुना काम गर्नका लागि आतुर छ जनतालाई विकास र समृद्धि प्रदान गर्न प्रतिबद्ध छ । हामी र हाम्रो केन्द्र सरकार चीनका हरेक सकारात्मक कामको सह्राना गर्दछ,’ मुख्यमन्त्री आचार्यले भने, ‘हामी र हाम्रो केन्द्र सरकार एक चीन नीतिप्रति प्रतिबद्ध छ । हामी विश्वास गर्दछौं यस प्रकारको प्रतिबद्धताले हाम्रो मित्रतालाई अझ खँदिलो र बलियो बनाइरहेको छ ।’ सम्मेलनमा मुख्यमन्त्री आचार्यसहित आर्थिक मामिला तथा योजनामन्त्री धनेन्द्र कार्की, प्रमुख सचिव महादेव पन्थ सहभागी छन् ।