अन्तर बैंक फुटसलको उपाधि ग्लोबल आइएमईलाई

काठमाडौं– बुटवलमा सम्पन्न प्रथम अन्तरबैंक फुटसल प्रतियोगिताको उपाधि ग्लोबल आइएमई बैंकले जितेको छ । नेपाल राष्ट्र बैंक कर्मचारी संघ सिद्धार्थनगर समितिले आयोजना गरेको अन्तर बैंक फुटसल प्रतियोगितामा एनएमबि बैंकलाई ६–० गोल अन्तरले पराजित गर्दै ग्लोबल आइएमई बैंक बिजयी भएको हो ।

विजयी हुँदै ग्लोबल आइएमईले ५० हजार नगदसहित शिल्ड मेडल र प्रमाणपत्र प्राप्त गरेको छ भने उपविजेता बनेको एनएमबी बैंकले २५ हजार नगदसहित शिल्ड, मेडल र प्रमाणपत्र प्राप्त गरेको छ । २९ टिमबीच भएको तीन दिने प्रतियोगिताको अन्तिम दिन अइतबार १६ टिमबीच क्वाटर, सेमी र फाइनल खेल भएको थियो ।

यस्तै प्रतियोगितामा आइएमईका बमबहादुर भुजेल सर्वाेत्कृष्ट खेलाडी र दुर्गा ओली सर्वाधिक गोलकर्ता बन्न सफल भए । यस्तै आइएमईकै हुपेन्द्र चौधरी सर्वोत्कृष्ट गोल किपर र दुर्गा ओली उत्कृष्ट खेलाडी घोषित भएको आयोजकले जानकारी दिएको छ ।

उपाधि विजेता, उपविजेता तथा खेलाडीलाई नेपाल राष्ट्र बैंक सिद्धार्थनगरका निर्देशक विज्ञानराज सुवेदी, कर्मचारी युनियनका अध्यक्ष पदमराज भुसाललगायतले पुरस्कार प्रदान गरे ।