रूसी कम्पनीमाथि प्रतिबन्ध लगाउन ट्रम्पले गरे हस्ताक्षर «

रूसी कम्पनीमाथि प्रतिबन्ध लगाउन ट्रम्पले गरे हस्ताक्षर

 
मस्को र जर्मनीद्वारा आलोचना

वासिङ्टन-अमेरिकी राष्ट्रपति डोनाल्ड ट्रम्पले रूसदेखि जर्मनीसम्म प्राकृतिक ग्यास आपूर्ति गर्न निर्माणाधीन पाइपलाइनलाई रोक्ने उद्देश्यका साथ पाइपलाइन निर्माण गरिरहेका रूसी कम्पनीहरूमाथि प्रतिबन्ध लगाउने कानुनमा हस्ताक्षर गरेका छन् ।
अमेरिकी कंग्रेसले उक्त कार्यबाट आफ्नो सहयोगी मानिँदै आएका युरोपेली मुलुकहरूबाट क्रेमलिनले फाइदा लिन सक्ने भन्दै चासो व्यक्त गरेपछि राष्ट्रपति ट्रम्पले ग्यास पाइपलाइन निर्माणको जिम्मा पाएका कम्पनीहरूलाई प्रतिबन्ध लगाउनका पत्रमा हस्ताक्षर गरेका हुन् ।
प्रतिबन्ध लगाउने अमेरिकी राष्ट्रपतिको निर्णयप्रति युरोपेली संघ (ईयू) ले असन्तुष्टि प्रकट गरेको छ । ट्रम्पले वासिङ्टन, डीसीबाहिर ‘ज्वाइन्ट वेस एन्ड्रुज’ नामक वायुसेनाको शिविर स्थापना गर्ने विधेयक र रूस–युरोप पाइपलाइन निर्माण कम्पनीमाथि प्रतिबन्ध लगाउने निर्णयमा एकैसाथ हस्ताक्षर गरेका हुन् ।
बाल्टिक सागरमुनि करिब ११ अर्ब अमेरिकी डलर लगानीमा निर्माणाधिन ‘नर्डस्ट्रिम टु पाइपलाइन’ को निर्माणपछि युरोपको शक्तिशाली अर्थतन्त्रका रूपमा चिनिने जर्मनीमा रूसले आफ्नो ग्यास आपूर्तिलाई दोब्बर बनाउने लक्ष्य राखेको छ ।
अमेरिकी सांसदहरूले पाइपलाइनले दुस्मन शक्ति (रूस सरकार) लाई सम्पन्न बनाउने र यसबाट रूसी नेता भ्लादिमिर पुटिनको युरोपमा प्रभाव बढ्ने निष्कर्षसाथ अमेरिकी दुवै सदनले प्रतिबन्धलाई अनुमोदन गरेको हो । कंग्रेसका दुवै सदनले प्रतिबन्ध लगाउने कानुनलाई मंगलबार अनुमोदनका लागि राष्ट्रपतिसमक्ष पठाएका थिए ।
डेमोक्रेटिक प्रतिपक्षीद्वारा पुटिनप्रति नरम बनेको आरोप खेप्ने गरेका ट्रम्पले कानुनलाई अनुमोदन गर्नुको विकल्प कमै थियो ।
अमेरिकी कडा प्रतिरोधका कारण मस्को र ईयू नराम्रोसँग चिढिएका छन् ।
जर्मनीका विदेशमन्त्री हेइको मासले निर्णयप्रति अमेरिकी समकक्षी माइक पोम्पेओसँग शुक्रबार फोनवार्ता गरेका छन्, जसमा पोम्पेओले कडा विरोध जनाएको अमेरिकी विदेश मन्त्रालय स्रोतले जनाएको छ ।
विदेश मन्त्रालयका प्रवक्ता मोर्गान ओटगसद्वारा जारी विज्ञप्तिमा भनिएको छ, “अमेरिकाले पाइपलाइन निर्माणसम्बन्धी उक्त आयोजनाप्रति ‘कडा प्रतिवाद’ गरेको छ ।”
यसैबीच अमेरिकाले आफ्नो आन्तिरिक मामिलामा हस्तक्षेप गरेको भन्दै जर्मनीले अमेरिकी उक्त कदमको विरोध गरेको छ । यसप्रति रूस र ईयूले पनि अमेरिकी हस्तक्षेपको विरोध गरेका छन् ।
ट्रम्पले प्रतिबन्ध लगाउने कानुनमा हस्ताक्षर गरेको एक दिनपछि मस्को र युरोपेली युनियनले प्रतिबन्धको आलोचना गर्दै शनिबार छुट्टाछुट्टै विज्ञप्ति जारी गरेका छन् ।
जर्मन चान्सलर एन्जेला मर्केलका प्रवक्ता उल्राइक डेमरले भने, “उनीहरूले हाम्रो आन्तिरिक मामिलामा गरेको हस्तक्षेपले जर्मन तथा युरोपेली कम्पनीहरूलाई प्रभावित पार्नेछन् । यो हाम्रा लागि सह्य हुन सक्दैन ।”
त्यस्तै रूसी विदेश मन्त्रालयका प्रवक्ता मारिया जाखारोभाले अमेरिकाले विश्व व्यापारलाई प्रभावित तुल्याउने सिद्धान्तलाई अघि सारेको भन्दै आफ्नो फेसबुक पेजमा अमेरिकी कदमको विरोध गरेकी छन् । उनले व्यग्य गर्दै लेखेकी छन्, “कुनै दिन उनीहरूले हामीले स्वास फेर्न रोक्नुपर्छ भन्न सक्नेछन् ।”

प्रतिक्रिया दिनुहोस्