चाडपर्वमा उपभोक्ता ठगिनबाट बचौं «

चाडपर्वमा उपभोक्ता ठगिनबाट बचौं

चाडपर्व आउँदै गर्दा उपभोग्य वस्तु, लत्ताकपडा तथा विलासिताका सामानको बिक्री वितरण अरू समयमा भन्दा धेरै हुने गर्छ, जसले गर्दा यो समय अर्थिक कारोबारका दृष्टिले महत्वपूर्ण मानिन्छ । चाडपर्वमा आफ्नो आयस्रोतले भ्याएसम्म तथा नभ्याए ऋण खोजेर भए पनि चाडपर्वमा मीठो–मसिनो खाने नेपालीहरूको पुरानो परम्परा अझै पनि रहिआएको छ । यसरी चाडपर्वको नाममा धेरै खर्च गर्ने परिपाटी दिनदिनै बढ्दै गइरहेको अवस्थामा चाडपर्व हाम्रो समाज परिवर्तनसँगै भड्किलो बन्दै गइरहेको छ । त्यस्तै अर्काको देखासिकी गरेर चाडपर्व मनाउने एउटा थितिजस्तै हुँदै आइरहेको छ ।
चाडपर्व नजिकिँदै गर्दा उपभोक्ता ठगिने क्रम बढ्न थालेको छ । चाडपर्व लक्षित गरी खोलिने सुलभ तथा सस्ता पसलहरूमा गुणस्तरहीन सामान बिक्री–वितरण हुने गरेको पाइन्छ, जसले गर्दा उपभोक्ता पैसा बचाउने लोभमा गुणस्तरहीन सामान किन्न बाध्य हुन्छन् । यस्ता चाडपर्व लक्षित आउने अफरहरूमा उपभोक्ता सचेत हुन अति आवश्यक छ । जब चाडपर्व नजिकिँदै गर्छ तब हरेक क्षेत्रमा लुटतन्त्र सुरु हुने गर्छ । यसरी चाडपर्वमा हुने विकृति, विसंगति नियन्त्रणमा सरकार तथा सम्बन्धित निकायहरूले ध्यान दिनु अति आवश्यक देखिएको छ । हरेक वर्ष सरकारले चाडपर्वको समयमा नाम मात्रको अनुगमनले केवल उपभोक्ताको आँखामा छारो हाल्ने काम मात्र भएको देखिन्छ ।
अर्थतन्त्रको चलायमान यो समयमा उपभोग्य क्षेत्रदेखि लिएर सेवाप्रदायक क्षेत्रमा पनि आमजनमानस लुटिने गरेका छन् । दैनिक उपभोग्य वस्तु बेच्न सस्तो तथा सुलभ पसलहरूको नाममा खोलिने, ५–१० रुपैयाँको लोभ देखाएर गुणस्तरहीन सामान बिक्री गरिन्छ । यो समय बजारमा खुलेआम मिति सकिएका, मिसावट गरिएको खाद्यवस्तु तथा कम तौल भएका खाद्यपदार्थ स–साना पसलदेखि ठूला–ठूला डिपार्टमेन्टल स्टोर्सहरूमा समेत बिक्री भइरहेको हुन्छ । त्यस्तै विभिन्न किसिमका छुट तथा अफर देखाएर लत्ताकपडा बिक्री गर्ने व्यापारीहरूले पनि निर्धक्क कमसल मूल्यका सामान चर्को मूल्यमा बिक्री गरिरहेका छन् । यो समय उपभोक्ता ठग्ने सुनौलो अवसर पनि हो । चाडपर्वमा सबैलाई राम्रो लगाऊँ, मीठो–मसिनो खाऊँ लाग्ने भएकाले हामी ससानो कुरामा ख्याल नगरी वस्तु खरिद गर्छौं, जसले गर्दा हामी अप्रत्यक्ष रूपमा स्वास्थ्यमाथि ठूलो खेलबाड गरिरहेका छौं । अब हामी उपभोक्ता चनाखो हुन अति जरुरी छ । हचुवाको भरमा गुणस्तरहीन सामानहरूमा पैसा र समय खेर नफालौं ।
यति हुँदाहुँदै पनि कहींकतै ठगिएको थाहा पाउनासाथ विरोध र सचेत नागरिकका हैसियतले अरूलाई पनि ठगिने वातावरणबाट जोगाऊँ । आफूले खरिद गर्न लागेका सामानहरूको राम्ररी हेरेर किन्ने बानी आजैबाट सुरु गरौं । नाम र ब्रान्डको भरमा परी कहिल्यै सामान खरिद नगरौं । अहिलेको समय भनेको उपभोक्ता नै सजग र होसियारी हुनुपर्ने बेला आएको छ । अर्को कुरा, चाडपर्वमा अनावश्यक खर्च नगरौं । आफ्नो आम्दानीअनुसारको खर्च गर्ने बानी नै सचेत उपभोक्ताको खुबी हो । अरूको देखासिकीबाट टाढै बसेर आफूलाई अनुकूल हुने ठाउँमा अति आवश्यक सामान मात्र किनौं, कहिल्यै अनावश्यक ऋण लिएर पर्व मनाउने नगरौं ।
अन्त्यमा चाडपर्वमा हुने ठगी नियन्त्रणको लागि सरकारी क्षेत्रबाट छिटोभन्दा छिटो अनुगमन तथा निरीक्षण गर्नु अति आवश्यक छ । त्यस्तै जब उपभोक्ता आफैं जागरुक तथा सचेत भएर सामान खरिद गर्छौं तब ठग्ने नियत बोकेर व्यापार गर्ने व्यापारी पनि आफैं सजग हुन्छन् । यदि हामी सचेत भएनौं भने ठगिने क्रम अझै बढ्दै जान्छ र लुटिने क्रम सधैंभरि रहिरहनेछ ।

प्रतिक्रिया दिनुहोस्