Logo

सरकारको एक्लो प्रयासले मात्रै मुलुकको आर्थिक विकास सम्भव छैनः उद्योगमन्त्री रिजाल

काठमाडौं- उद्योग, वाणिज्य तथा आपूर्तिमन्त्री रमेश रिजालले सरकारको एक्लो प्रयासबाट मात्रै मुलुकको आर्थिक विकास सम्भव नभएको बताएका छन् । शुक्रबार ललितपुर उद्योग वाणिज्य संघको ४४औं साधारणसभामा बोल्दै उद्योगमन्त्री रिजालले सरकार र निजी क्षेत्र समन्वय र सहकार्य भएमात्रै मुलुकको आर्थिक विकास सम्भव रहेको उल्लेख गरे ।

उनले देशको समग्र सामाजिक र आर्थिक विकास हुन निजी क्षेत्रले दिगो र पराकिलो पूर्वाधार तयार गर्नसक्ने बताए । उद्योगमन्त्री रिजालले निजी क्षेत्र रोजगारी सिर्जना र औधोगिक माध्यम भएको दाबी गरे । उनले निजी क्षेत्रको सक्रिय सहभागिता भएका मुलुकहरुमा आर्थिक विकास राम्रो भएको देखिएको भन्दै नेपालमा पनि आर्थिक विकासमा निजी क्षेत्रको सहभागिता वृद्धि गर्न आवश्यक रहेको बताए ।

उनले निजी क्षेत्रको अधिकतम प्रयासले मात्रै उदारवादी अर्थतन्त्रको मर्मअनुरुप आर्थिक विकास गर्नेमा वर्तमान सरकार विश्वास राख्ने बताए । उनले आयातलाई न्युन गर्दै लैजाने निर्यातलाई प्रवर्द्धन गर्ने सरकारको नीतिलाई साकार बनाउन निजी क्षेत्रको सहयोग विना सम्भव नभएको बताए ।

उनले कृषिलाई व्यवसायीकरण गरी उत्पादन वृद्धिमा जोड दिन निजी क्षेत्रलाई आग्रह गरे । उनले निजी क्षेत्रको माग अनुरुप सरकारले सम्बोधन गर्न नसकेको अवस्थामा आलोचना भन्दा पनिसरकारसँग हातेमालो गरेर समस्याको समाधान खोज्नु आवश्यक रहेको बताए । उनले सरकारले निजी क्षेत्रको मागअनुसार कानूनी र नीतिगत विषयमा सुधार गर्दै आइरहेको दाबी गरे ।

प्रतिक्रिया दिनुहोस्