नयाँ सरकार गठनको बाटो खुल्यो
प्रकाशित मिति : माघ २६, २०७४ शुक्रबार
राष्ट्रिय सभा निर्वाचनको परिणाम आएसँगै नयाँ सरकार गठनको बाटो खुलेको छ । ५६ पदका लागि बुधबार सम्पन्न राष्ट्रिय सभा निर्वाचनको परिणाम आइसकेको छ । अझै ३ सदस्य भने मन्त्रिपरिषद्ले मनोनीत गर्न बाँकी नै छ । ५६ पदमा बहुमत सिटमा नेकपा एमाले र नेकपा माओवादी केन्द्रको बाम गठबन्धनबाट निर्वाचित भएका छन् । बुधबार ५६ सिटका लागि भएको निर्वाचनमा एमालेले २७ र माओवादीले १२ स्थान गरी कुल ३९ स्थानमा जितेको हो । नेपाली कांग्रेसबाट राष्ट्रिय सभा सदस्यमा १३ जना रहेका छन् ।
प्रधानमन्त्री निवास बालुवाटार स्रोतका अनुसार राष्ट्रिय सभा निर्वाचनको परिणाम आएसँगै प्रधानमन्त्री शेरबहादुर देउवाले एक साताभित्रै राजीनामा दिने तयारी गरेका छन् । प्रदेश र प्रतिनिधिसभा निर्वाचन सम्पन्न भएपनि राष्ट्रिय सभा सदस्य निर्वाचन नभइसकेकाले प्रधानमन्त्री चयनको बाटो अवरुद्ध थियो । प्रदेश, प्रतिनिधिसभा र राष्ट्रियसभा निर्वाचनको परिणाम आइसकेकाले अब नयाँ सरकार गठनको बाटो खुलेको छ । प्रतिनिधिसभातर्फ समानुपातिक सांसद चयन भएपछि तीन वटै सभाले पूर्णता पाउने छ । प्रतिनिधिसभातर्फ समानुपातिक र राष्ट्रिय सभामा मनोनित गर्न बाँकी ३ जना मनोनित भएसँगै निर्वाचनको प्रक्रियाले पूर्णता पाउनेछ । यससँगै सरकार गठनका लागि बाम गठबन्धनलाई खुलेको छ ।
राष्ट्रिय सभामा यी परिचित अनुहार
राष्ट्रिय सभामा धेरै नयाँ अनुहार निर्वाचित हुँदा केही भने चिनिएका पुराना अनुहार पनि निर्वाचित भएका छन् । जसमा नेकपा माओवादी केन्द्रका नेता, पूर्व महासचिव रामबहादुर थापा र पूर्व पार्टी प्रवक्ता दिनानाथ शर्मा निर्वाचित भएका छन् । त्यस्तै, माओवादीका नेता कालीबहादुर मल्ल पनि राष्ट्रिय सभामा निर्वाचित भए । त्यस्तै एमालेका पुराना नेता, प्रतिनिधिसभाकै पूर्व सचेतक परशुराम मेघी गुरुङ्ग पनि राष्ट्रिय सभा सदस्य भएका भएका छन् । त्यस्तै, अरु राष्ट्रिय छवी बनाइसकेका राजपाका नेता वृषेशचन्द्र लाल, संघीय समाजवादी फोरमका नेता रामपृत पासवान पनि राष्ट्रिय सभामा छन् । नेपाली कांग्रेसबाट अधिवक्ता, पूर्वसांसद राधेश्याम अधिकारी, केन्द्रीय सदस्य, पूर्वसांसद बद्री पाण्डे, केन्द्रिय सदस्य सुरेन्द्र पाण्डे र देउवा सरकारका पर्यटनमन्त्री जितेन्द्र देव पनि राष्ट्रिय सभा सदस्य भएका छन् ।
प्रधानमन्त्री निकट स्रोतका अनुसार मन्त्रिपरिषद्ले मनोनीत ३ सदस्यमा पनि एमाले, माओवादी र कांग्रेसबाट १-१ जना चिनिएकै अनुहार ल्याउने गरि छलफल भइरहेको छ ।
|
राष्ट्रिय सभामा को को ? |