प्रदेशका कर्मचारीले न्यूनतम् पारिश्रमिक पाउने «

प्रदेशका कर्मचारीले न्यूनतम् पारिश्रमिक पाउने

कोसी प्रदेशका कामदार तथा कर्मचारीले सरकारले तोकेको न्यूनतम् पारिश्रमिक पाउने भएका छन् । नेपाल व्यापार कर्मचारी संघ युनिकम नेपाल र नेपाल उद्योग वाणिज्य महासंघ कोसी प्रदेशबीच ११ बुँदे समझदारी भएसँगै कोसी प्रदेशका प्रदेशभरका कामदार तथा कर्मचारीले न्यूनतम् पारिश्रमिक पाउने भएका हुन् ।

अन्तर्राष्ट्रिय ट्रेड युनियन ‘यूएनआई ग्लोबल युनियन’ सँग आबद्ध युनिकम नेपाल र नेपाल उद्योग वाणिज्य महासंघ कोसी प्रदेशबीच संवाद समूह झापाको संयोजनमा स्थानीय तह र सरकारी निकायका प्रतिनिधि तथा अन्य सरोकारवालासमेतको रोहवरमा दुवै पक्षको परस्पर हितका लागि सामाजिक संवादका माध्यमबाट ११ बुँदे समझदारी गरिएको होे ।

विवाद तथा समस्या समाधानका लागि विभिन्न चरणको वार्ताबाट तय भएको दुईपक्षीय समझदारी पत्रमा युनिकम नेपालका तर्फबाट केन्द्रीय अध्यक्ष गजेन्द्रबहादुर पौडेल र नेपाल उद्योग वाणिज्य महासंघ कोसी प्रदेशका तर्फबाट अध्यक्ष टीकाराज ढकालले हस्ताक्षर गरेका थिए ।

श्रम तथा रोजगार कार्यालय भद्रपुरका कार्यालय प्रमुख दुर्गा आचार्य, श्रम तथा रोजगार कार्यालय विराटनगरका प्रमुख खगेन्द्र सुवेदी, यूएनआई ग्लोबल युनियन एसिया प्रशान्त संगठन तथा कार्यक्रम संयोजक तिलकजंग खड्का र संवाद समूह झापाका सहजकर्ता अर्जुन राजवंशीको रोहवरमा समझदारी पत्रमा हस्ताक्षर भएको थियो ।

यूएनआई ग्लोबल युनियन एसिया प्रशान्त संगठन तथा कार्यक्रम संयोजक तीलकजंग खड्काले स्वागतसहित समझदारी पत्रको औचित्यमाथि प्रकाश पार्दै श्रम बजार अव्यवस्थित हुँदा त्यसको नकारात्मक असर उद्योगी, व्यवसायी, श्रमिक, ग्राहक र त्यसका अन्य सरोकारवालासमेतलाई प्रत्यक्ष रूपमा पर्ने भएकाले प्रचलित श्रम कानुन तथा योगदानमा आधारित सामाजिक सुरक्षा कोषको प्रभावकारी कार्यान्वयनका लागि युनिकम नेपाल र नेपाल उद्योगग वाणिज्य महासंघ कोसी प्रदेशबीच ११ बुँदे समझदारी गरिएको जनाए ।

समझदारी पत्रमा कोसी प्रदेशका उद्योग र व्यापार क्षेत्रमा काम गर्ने सम्पूर्ण मजदुर कर्मचारीलाई रोजगारसम्बन्धी स्थापित हुने फोटोसहितको परिचयपत्र एवं नियुक्तिपत्र अनिवार्य गरिने, साप्ताहिक बिदा, सामाजिक सुरक्षा कोषमा सूचीकृत गराउने, व्यवसायीको दायित्व र कर्तव्य दुवै हुने, व्यवसायजन्य स्वास्थ्य तथा सुरक्षाको प्रत्याभूति, भविश्यमा आउनसक्ने विभिन्न प्रकारका महामारी वा प्रकोपमा रोजगारदाता तथा कामदार कर्मचारीको सुरक्षाका लागि दुवै पक्ष मिलेर कार्य गर्ने, नेपालको संविधान, २०७२, श्रम ऐन, २०७४ तथा ट्रेड युनियन ऐन, २०४९ अनुसार श्रमिकको संगठित हुन पाउने अधिकारलाई कुण्ठित नगर्ने नगराउने कार्यमा प्रतिबद्ध रहने उल्लेख छ ।

त्यस्तै श्रम ऐनलगायतका ऐन कानुनको कार्यान्यवयन र श्रम विवाद समाधानका लागि सरोकारवाला सरकारी निकाय र स्थानीय सरकारसँग समन्वय गरिने, कामदार कर्मचारीले आफूले कार्य गर्ने उद्योग व्यापार व्यवसाय प्रतिष्ठानप्रति सम्मान गर्नुपर्ने, त्यसको भौतिक सम्पत्ति र ख्याति, व्यावसायिक रणनीति, योजना, बैद्धिक सम्पत्ति, व्यावसायिक विचार आदिको चोरी तथा दुरुपयोग गर्न नपाइने उल्लेख छ ।

त्यसो गरिएमा कानुनी कारबाही प्रक्रिया अघि बढाइने, कुनै कामदार तथा कर्मचारीले अफू कार्यरत प्रतिष्ठान पसलमा काम छाड्दा नगद, जिन्सी, हरहिसाब अनिवार्य फरफारक गरेर मात्रै दुवै पक्षले छाड्ने छोडाउने त्यसो नगरिए कानुनबमोजिम कारबाही अघि बढाउने सहमति भएको छ ।

कामदार कर्मचारीले कार्य अनुशासनको पूर्णपालना गर्ने दुवै पक्षबाट कार्यस्थलमा लैंगिक हिंसा गर्न नपाइने, दुवै पक्षबाट सहकार्य सहअस्तित्व, सदाचारिता र मर्यादा प्रकट गर्ने, श्रमिक र रोजगार दाताका प्रतिनिधि राखी श्रम विभाग समाधान समिति गठन गर्ने, समिति गठनका लागि उद्योग वाणिज्य महासंघ कोसी प्रदेशका पाँच जना प्रतिनिधि र युनिकम नेपालका पाँच जना प्रतिनिधि रहने सहमति भएको छ ।

त्यसैगरी कोसी प्रदेशमा श्रम शोषण, लैंगिक हिंसा, बालश्रम शोषण वा युनिकम नेपालका सदस्य कामदार कर्मचारीले खराब आचरण, व्यापार व्यवसायमा हानी नोक्सानी गरेको विषयमा उजुरी परेमा संयुक्त श्रम विवाद समाधान समितिमार्फत तत्काल छानविन गरी आवश्यक कारबाही अघि बढाइने भएको छ ।

उद्योग व्यापार व्यवसाय तथा कामदार कर्मचारीको हितलाई मध्यनजर गरेर स्वस्थ औद्योगिक सम्बन्धलाई जोड दिँदै प्रत्येक वर्ष युनिकम नेपाल र उद्योग वाणिज्य महासंघ कोसी प्रदेशले संयुक्तरूपमा समीक्षा बैठकको आयोजना गरी आगामी सम्भावित सहकार्यलाई अगाडि बढाउने समझदारी पत्रमा उल्लेख छ । समझदारी पत्रमा हस्ताक्षरपछि युनिकम नेपालका केन्द्रीय अध्यक्ष गजेन्द्रबहादुर पौडेल र नेपाल उद्योग वाणिज्य महासंघ कोसी प्रदेशका अध्यक्ष टीकाराज ढकालले समझदारीले व्यवसायी तथा कर्मचारीबीचको सम्बन्ध सुमधुर हुने बताए ।

कार्यक्रममा सहभागी नेपाल उद्योग वाणिज्य महासंघका पूर्वअध्यक्ष चण्डीराज ढकाल, कनकाई नगरपालिकाका प्रमुख राजेन्द्रकुमार पोखरेल, रोङ गाउँपालिकाका अध्यक्ष सुवास तामाङ, बिर्तामोड नगरपालिकाका उपप्रमुख नगेन्द्रप्रसाद संग्रौलालगायतले संवाद समूहको संयोजन र सरोकारवालाको समन्वयमा युनिकम नेपाल र नेपाल उद्योगग वाणिज्य महासंघ कोसी प्रदेशबीच ११ बुँदे समझदारी भएकोमा उक्त कार्यको प्रशंसा गरेका थिए ।

प्रतिक्रिया दिनुहोस्