नेप्से परिसूचक दोहोरो अंकले वृद्धि

धितोपत्र बजारमा शेयर कारोबार मापक नेप्से परिसूचक आज दोहोरो अंकले उकालो लागेको छ । नेपाल स्टक एक्सचेञ्जका अनुसार नेप्से परिसूचक २२ दशमलव ६५ अंकले उकालो लागेर एक हजार नौ सय ४९ दशमलव शून्य छ मा पुगेको छ । ठूला कम्पनीको शेयर कारोबार मापन गर्ने सेन्सेटिभ परिसूचक दुई दशमलव ९७ अंकले उकालो लागेर तीन सय ६६ दशमलव २३ मा पुगेको छ ।

कारोबार भएका कूल १३ उपसमूहको शेयर मूल्यमा वृद्धि भएको छ । कूल ५२ लाख ५५ हजार ८६ कित्ता शेयर एक अर्ब २९ करोड ८५ लाख ८३ हजार नौ सय ८८ रुपैयाँमा खरिद बिक्री भएका छन् । यस्तै कारोबारका आधारमा आइएमई जनरल इन्स्योरेन्स कम्पनी शीर्ष स्थानमा छ । सो कम्पनीको सात करोड ६३ लाख ९२ हजार चार सय ४२ रुपैयाँ बराबरको कारोबार भयो ।

साथै एनआइसी एशियाको छ करोड १९ लाख ९५ हजार नौ सय २२ रुपैयाँ, सिटिजन बैंकको संस्थापक शेयर पाँच करोड ८५ लाख २७ हजार एक सय रुपैयाँ, शिवम् सिमेन्ट चार करोड १३ लाख ७७ हजार पाँच सय दुई रुपैयाँ र हिमालयन डिस्टिलरी तीन करोड ४२ लाख ६२ हजार आठ सय २० रुपैयाँ बराबरको शेयर कारोबार भएको छ । आजको कारोबारमा युनिक नेपाल लघुवित्तको शेयर मूल्यमा १० प्रतिशतले बढेर सकारात्मक सर्किट लागेको छ ।

न्यादी हाइड्रोपावर सात दशमलब ७३, नयाँ सारथी लघुवित्त छ दशमलव १८, मानुषी लघुवित्त पाँच दशमलव ६७ र विन्दवासिनी हाइड्रोपावरको शेयर मूल्य चार दशमलव ७७ प्रतिशतले बढेको छ । साथै सपोर्ट माइक्रोफाइनान्स पाँच दशमलव ३६, स्वाभिमान लघुवित्त चार दशमलव ७२, सानिमा ग्रोथ स्किम चार दशमलव ४५, विन नेपाल लघुवित्त चार दशमलव शून्य आठ र लक्ष्मी इक्विटी फण्डको शेयर मूल्य तीन दशमलव ८५ प्रतिशतले घटेको छ ।