प्राविधिक खटिनुपूर्व बनाइएका घरलाई एकमुष्ट तीन लाख «

प्राविधिक खटिनुपूर्व बनाइएका घरलाई एकमुष्ट तीन लाख

भूकम्पबाट क्षति भई प्राविधिक खटिनुपूर्व प्रभावितले निर्माण गरेका निजी घरका धनीले एकमुष्ट तीन लाख रुपैयाँ पाउने भएका छन् ।
२०७२ साल वैशाखमा भूकम्प गए लगत्तै बस्नका लागि घर बनाएर अनुदानका लागि अनुरोध गरे पनि पाउन नसकेका प्रभावितका लागि राष्ट्रिय पुनर्निर्माण प्राधिकरणको कार्यकारी समितिको मंगलबारको बैठकले एकमुष्ठ तीन लाख रुपैयाँ दिने निर्णय गरेको हो । प्राविधिक खटिनुपूर्व बनेका घरलाई निजी आवास पुनर्निर्माण अनुदान रकम उपलब्ध गराउनेसम्बन्धी कार्यविधि पारित गरेसँगै प्रभावितहरूले तीन लाख रुपैयाँ अनुदान पाउने भएका हुन् । निर्देशक समितिले यस सम्बन्धमा गरेको निर्णयअनुरूप द्रुत गतिमा यस प्रकारका घरलाई अनुदान उपलब्ध गराउन कार्यकारी समितिले सो कार्यविधि पारित गरेको जनाएको छ ।
कार्यविधि अनुसार अनुदान प्राप्त गर्न प्राधिकरणले प्राविधिक परिचालन गर्नुपूर्व नै उक्त घर पुनर्निर्माण भएको र लाभग्राही बसिरहेको भनी स्थानीय तहबाट प्रमाणित हुनुपर्नेछ । पुनर्निर्माण प्राधिकरणका प्रमुख कार्यकारी अधिकृत सुशील ज्ञवालीले प्राविधिक परिचालन गर्नुपूर्व पुनर्निर्माण गरिएका घरका घरधनीलाई एकमुष्ट रकम उपलब्ध गराउने कार्य केही ढिलाइ भएको देखिएकाले उक्त कार्यलाई प्राथमिकताका साथ अघि बढाउन कार्यविधि पारित गरिएको जानकारी दिए । “प्राविधिक खटिनपुर्व १२ हजार घर बनेको तथ्यांक आएको छ । थप तथ्यांक आउने क्रममा छ । त्यसलाई पनि समावेश गरेर एकमुष्ट अनुदान उपलब्ध गराउनेछौं,” उनले भने ।
कार्य समितिको बैठकले सम्पदा बस्तीका एकल वा बहुस्वामित्वका निजी आवास पुनर्निर्माणसम्बन्धी कार्यविधि पनि पारित गरेको छ । प्रमुख कार्यकारी अधिकृत ज्ञवालीले कार्यविधि पारित भएकाले मूलतः शहरी क्षेत्रमा देखा परेको बहुस्वामित्वसम्बन्धी अन्योल अन्त्य भइ शहरी पुनर्निर्माण कार्यलाई प्रभावकारी ढंगले अघि बढाउन सहज पुग्ने बताए ।
बैठकले एक कोठे घर पुनर्निर्माणसम्बन्धी मापदण्डलाई पनि स्पष्ट गरेको छ । जसअनुसार एक कोठे घरको भित्री भागको न्यूनतम क्षेत्रफल १२० वर्गफिट कायम गर्ने र एक कोठेघरसँगै कम्तिमा भूकम्प प्रतिरोधी भान्साघर र कोठा, शौचालय, बरण्डा र पाली पुनर्निर्माण गरेको हुनुपर्नेछ ।
यस्तै यसअघि निर्माण भइसकेका एक कोठे घरको हकमा छुट्टै भूकम्प प्रतिरोधी भान्साघर र कोठा, शौचालय र बरण्डारपाली पुनर्निर्माण गरेको भएमात्रै अनुदान किस्ता सिफारिस गर्ने र अन्तिम किस्ता सिफारिस भइसकेको भएमा सम्बन्धित स्थानीय तहले घर निर्माण सम्पन्न प्रमाणपत्र दिँदा सो कुराको एकीन गरेर मात्र दिने निर्णय पनि बैठकले गरेको छ ।
“एक कोठे घर पुनर्निर्माण गर्दा केही ठाउँमा अन्योल उत्पन्न भई दुरूपयोग भएको समेत पाइएकाले घरको मापदण्ड स्पष्ट पारेका हौं,” प्रमुख कार्यकारी अधिकृत ज्ञवालीले भने, “आफू बस्ने घर पुनर्निर्माण गर्दा सम्बन्धित घरधनी पनि जवाफदेही हुन जरुरी छ ।” यसअघि एक कोठे घर बनाउँदा भान्सा कोठा समावेश गरिएको थिएन । प्राधिकरणले जोखिममा परेका वर्गलाई सहज होस् भनेर एक कोठे घर बनाउन सक्ने व्यवस्था गरेको थियो ।
प्राधिकरणका अनुसार प्रभावितमध्ये ४ लाख ७४ हजार लाभग्राहीले तेस्रो किस्ता लिइसकेका छन् । ४ लाख २३ हजार घर पुनर्निर्माण सम्पन्न भइसकेका छन् भने २ लाख ११ हजार घर पुनर्निर्माणको क्रममा छन् ।

प्रतिक्रिया दिनुहोस्