नर्भिक आईभीएफमा ५५ वर्षकी महिलाले जन्माइन् सन्तान «

नर्भिक आईभीएफमा ५५ वर्षकी महिलाले जन्माइन् सन्तान

ललितपुरकी एक ५५ वर्षीया महिला टेस्टट्युब बेबी पद्दतीबाट आमा बन्न सफल भएकी छन् । नर्भिक आईभीएफ सेन्टरमा एक वर्षको उपचारपछि ललितपुरकी विमला रजकले स्वस्थ सन्तानलाई जन्म दिन सफल भएकी हुन् । शल्यक्रियामार्फत् शनिबार बच्चा निकालिएको र हाल बच्चा र आमाको स्वास्थ्य अवस्था सामान्य छ ।

“बढ्दो उमेरमा गर्भाधारण गरी सन्तान जन्माउनु जोखिमपूर्ण मानिन्छ,” नर्भिक आईभीएफ सेन्टरकी वरिष्ठ टेस्टट्युब बेबी विशेषज्ञ डा. नूतन शर्माले भनिन्, “तर पनि नर्भिक आईभीएफको उच्च जोखिम व्यवस्थापन र उत्कृष्ट उपचार प्रक्रियाबाट सहजै रूपमा आईभीएफमार्फत् ती महिलालाई आमा बनाउन सफल भयौं, यसमा हामी सबै खुसी छौं ।” ३० वर्षीय छोराको आकस्मिक निधन भएर विक्षिप्त बनेको हाम्रो परिवारमा २७ वर्षपछि छोराको रूपमा अर्काे सन्तान आउँदा खुसीको सीमा छैन विमलाले भनिन् ।

नर्भिक आईभीएफमा उपचारका लागि आएका रजक दम्पत्तीले पहिलो प्रयासमै आईभीएफ पद्दतीबाट सन्तान जन्माउन सफल भएको डा. शर्माले जानकारी दिइन् । श्रीमतीको उमेर ५५ वर्ष र श्रीमान्को उमेर ६८ वर्षको छ । नेपालको सन्दर्भमा उमेर बढ्दै जाँदा महिलाको हर्माेनमा आउने परिवर्तन, पाठेघरको अवस्था र विभिन्न स्वास्थ्य समस्याका कारण यो उमेरमा आईभीएफ पद्दतीबाट सन्तान जन्माउनु चुनौतीपूर्ण भए पनि आधुनिक सुविधा र दक्ष जनशक्तिका कारण सम्भव भएको डा. शर्माले बताइन् ।

यसअघि पनि नर्भिक आईभीएफ सेन्टरमा उपचारपछि काठमाडौंकी ५४ वर्षीया एक महिलाले आईभीएफ पद्दतीबाट जुम्ल्याह सन्तान जन्माएकी थिइन् । “बढी उमेर समूह भएका महिलालाई हामीले सुरुवातदेखि नै उच्चजोखिम समूहमा राखेर उपचार गर्छाैं,” डा. शर्माले भनिन्, “पछिल्लो सफलताले पनि बढ्दो उमेरमात्र सन्तान प्राप्तिमा बाधक होइन भन्ने पुष्टि गरेको छ । तर सन्तान प्राप्तिको चाहना भएकाले समयमै चिकित्सकसँग परामर्श गर्न जरुरी हुन्छ ।”

प्रतिक्रिया दिनुहोस्