कांग्रेस केन्द्रीय कार्यालयमा शेखर समूहको धर्ना «

कांग्रेस केन्द्रीय कार्यालयमा शेखर समूहको धर्ना

नेपाली कांग्रेसका नेता डा. शेखर कोइराला पक्षधर समूहका नेता कार्यकर्ताले विभिन्न माग राखी पार्टी केन्द्रीय कार्यालयमा धर्ना दिएका छन् । उनीहरुले पार्टीको आन्तरिक एकता, समान अवसर र न्यायको माग गर्दै बुधबार दिउँसो एक घण्टा धर्ना दिएको केन्द्रीय सदस्य अजयबाबु शिवाकोटीले जानकारी दिए । धर्नामा सो समूहका शीर्ष नेता तथा पदाधिकारीको भने सहभागिता थिएन ।
आगामी मङ्सिर ४ गते हुने प्रतिनिधिसभा र प्रदेशसभा सदस्यको निर्वाचनमा पार्टीका तर्फबाट समानुपातिक बन्दसूची तय गर्दा उचित तवर नभएको नेता कोइराला समूहका नेताको आरोप छ । कांग्रेस पार्टी कार्यालयले भने सर्वसम्मतिले समानुपातिक उम्मेदवारको नामावली टुंगो लगाइएको स्पष्ट पारेको छ । कांग्रेस केन्द्रीय कार्यालयमा मंगलबार आयोजित पत्रकार सम्मेलनमा पार्टी प्रवक्ता प्रकाशशरण महतले पार्टीको विधानबमोजिम सम्बन्धित निकायबाट सिफारिस भई केन्द्रमा आएका नामउपर केन्द्रीय संसदीय समितिको बैठकले समानुपातिक उम्मेदवारको नामावली टुंगो लगाएको बताएका थिए ।

प्रतिक्रिया दिनुहोस्