मोदीको दोस्रो कार्यकालमा अर्थतन्त्रमा तीव्र सुधार हुने निजी क्षेत्रको अपेक्षा «

मोदीको दोस्रो कार्यकालमा अर्थतन्त्रमा तीव्र सुधार हुने निजी क्षेत्रको अपेक्षा

भारतीय प्रधानमन्त्री नरेन्द्र मोदीको दोस्रो कार्यकाल सुरु भएसँगै निजी क्षेत्रका अगुवाहरूले मोदीको नेतृत्वमा तीव्र विकास हेर्न पाइने अपेक्षा गरेका छन् । प्रधानमन्त्री मोदीको दोस्रो कार्यकालमा उच्च आर्थिक वृद्धि हासिल गर्न कर, श्रम र जमिनको सन्दर्भमा विशेष जोड दिइने उनीहरूको विश्वास छ ।
प्रधानमन्त्री मोदीले विहीबार हजारौं राष्ट्रिय अन्तर्राष्ट्रिय अतिथिहरूको उपस्थितिबीच दोस्रो कार्यकालका लागि शपथ लिएका थिए । मोदीले आफ्नो मन्त्रिपरिषदका ५७ जना सदस्यहरूलाई पनि सपथ गराएका छन् । सपथ समारोहमा भारतका प्रतिष्ठित औद्योगिक घरानाका अगुवाहरूको उपस्थिति थियो । रिलायन्स इण्डष्ट्रिजका मुकेश अम्बानी, अदानी गु्रपका अध्यक्ष गौतम अदानी, वेदान्त रिसोर्सेज लिमिटेडका कार्यकारी अध्यक्ष अनिल अग्रवाल, टाटा सन्सका रतन टाटा, महिन्द्रा ग्रुपका अध्यक्ष आनन्द महिन्द्रा, पेटिएमका संस्थापक एवं प्रमुख कार्यकारी अधिकृत विजयशेखर शर्मा, वेलस्पन ग्रुपका अध्यक्ष बि.के.गोयन्का र चौधरी ग्रुप नेपालका अध्यक्ष विनोद चौधरीलगायत प्रधानमन्त्री मोदीको सपथमा सहभागि थिए ।
‘प्रधानमन्त्री मोदी र मन्त्रीहरूको सपथमा सहभागी हुन पाउनु गर्वको विषय हो । मलाई पूर्ण विश्वास छ कि गरिबी निवारण र आर्थिक वृद्धिका लागि वैदेशिक लगानीको वातावरणलाई बढावा दिन नयाँ सरकारले ठोस कदम चाल्नेछ ।’, अग्रवालले ट्विट गरेका छन् ।
‘प्रधानमन्त्री नरेन्द्र मोदी र नयाँ मन्त्रिमण्डललाई हार्दिक बधाई छ । यो कार्यकालमा पनि भारत तीव्र विकास र परिवर्तनको साक्षी बन्नेछ भन्नेमा म विश्वस्त छु ।’ एस्सार ग्रुपका निर्देशन प्रशान्त रुइयाले ट्विट गरेका छन् ।
नेपालको चौधरी ग्रुपका अध्यक्ष विनोद चौधरीले नेपाल भारत सम्बन्धलाई नयाँ उचाइमा पु¥याउन प्रधानमन्त्री मोदीले भारतीय सरकारका तर्फबाट विशेष पहल लिने विश्वास व्यक्त गर्दै यसबाट दुई देशबीच तय भइसकेका परियोजनाहरूलाई निष्कर्षमा पु¥याउन मद्दत पुग्ने आशा व्यक्त गरेका छन् ।
‘आगामी पाँच वर्षमा नजिकको छिमेकी मुलुक नेपाललाई समृद्ध बनाउन प्रधानमन्त्री मोदीले विशेष योगदान पु¥याउनुहुनेछ भन्ने मेरो विश्वास छ’, उद्यमी चौधरीले भनेका छन्, ‘भारतले ठूलो छाती गरेर नेपालसँग यसअघि भएका सम्झौताहरू कार्यान्वयन गर्ने नेपालको समृद्धिका लागि आवश्यक कदमहरू चालेमा नेपाल भारत सम्वन्ध नयाँ उचाइमा पुग्नेछ । पाइपलाइनमा रहेका प्रोजेक्टहरूको कार्यान्वयन भारतको प्राथमिकतामा पर्नुपर्छ ।’
सीआईआईका अध्यक्ष विक्रम किर्लोस्करले विगतमा आफूलाई सिद्ध गरिसकेका अनुभवी र नयाँ ऊर्जा बोकेका दुवै खाले नेताहरूलाई मन्त्रिपरिषदमा सहभागि गराउने प्रधानमन्त्री मोदीको सुझबुझपूर्ण निर्णयले नयाँ र रचनात्मक कामका लागि सहयोग पुग्ने विश्वास गरेका छन् । महिन्द्रा गुपका अध्यक्ष आनन्द महिन्द्राले ट्विट गर्दै भनेका छन्, ‘शपथ समारोहमा जाँदै गर्दा अहिले घाम अस्ताइरहेको छ । तर निश्चित रूपमा यो नयाँ सरकार र अवसरको सुरुवात हो ।’
आइटिसी लिमिटेडका प्रबन्ध निर्देशक सञ्जिव पुरीले भनेका छन्, “मोदीको दूरदर्शी नेतृत्वमा राष्ट्रिय महत्वाकांक्षा, क्षेत्रीय आकांक्षालाई सम्बोधन गर्दै कृषि र खाद्य जस्ता क्षेत्रलाई प्रोत्साहन गरी चौतर्फी आर्थिक सामाजिक विकासको विगुल फुकिनेछ ।”
वेलस्पन ग्रुपका अध्यक्ष बी.के. गोयन्काले विशाल जनमतका बलमा सशक्तीकरण सम्भव हुने भन्दै कर, श्रम र जमिनको क्षेत्रमा केही मानक पुनर्संरचना गर्न सरकारले कदम चाल्ने विश्वास व्यक्त गरे । “निजी क्षेत्रले बेहोर्दै आएको आर्थिक तथा बैंकिङ क्षेत्रका नसुल्झिएका समस्या र असुविधाहरू समाधान गर्न प्रभावकारी कदम चाल्नुपर्छ,” गोयन्काले भने । ‘लक्ष्यमा केन्द्रीत प्रधानमन्त्री मोदी आफ्नो टिमसहित’ भनी पेटिएमका संस्थापक विजयशेखर शर्माले ट्विट गरेका छन् ।

प्रतिक्रिया दिनुहोस्