शतप्रतिशत एलसीको प्रावधानले माछा तस्करी «
Logo

सीमा क्षेत्रमा अवैध कारोबार फस्टायो

शतप्रतिशत एलसीको प्रावधानले माछा तस्करी

एलसी (प्रतीतपत्र) मा शतप्रतिशत रकम जम्मा गरेर मात्रै सामान आयात गर्नुपर्ने नेपाल राष्ट्र बैंकको प्रावधानले सीमा क्षेत्रमा अवैध कारोबार फस्टाएको छ । देशको आर्थिक संकट टार्नका लागि लागू गरिएको प्रावधानले एलसी खोल्ने झन्झटिलो प्रक्रियाका कारण सीमाक्षेत्रमा अवैध कारोबारमा वृद्धि हुन थालेको छ । विभिन्न हार्डवेयर, लत्ताकपडा, स्पेयरपार्टस र माछा अवैध रूपमा भन्सार छलेर भिœयाउने गरिएको छ ।
नेपाल–भारतको खुला सीमामा हुने अवैध कारोबार नियन्त्रणमा लागि तैनाथ गरिएका सुरक्षाकर्मीहरूको आँखा छलेर तस्करी हुने गरेको छ । कतै भने सुरक्षाकर्मीकै मिलेमतोमा पनि खुलेआम तस्करी हुने गरेको स्थानीयले आरोप लगाउने गरेका छन् । सुरक्षा निकायले भने सीमाक्षेत्रमा शतप्रतिशत तस्करी रोक्न नसकिने प्रतिक्रिया दिने गरेका छन् ।
हार्डवेयर, लत्ताकपडा, स्पेयर पार्ट्स मात्रै होइन, नेपाल माछामा आत्मनिर्भर भइसकेको माछा पनि अहिले भारतबाट वीरगन्जको इनर्वा हँुदै व्यापक रूपमा अवैध ओसारपसार हुने गरेको छ । एक दिनमै २ हजारवटा साइकलमा भारतीय माछाको तस्करी हुने गरेको प्रत्यक्षदर्शी स्थानीयले बताएका छन् ।
भारतबाट तस्करी गरिने माछा इनर्वा नाका हुँदै वीरगन्ज महानगरपालिकाको वडा नम्बर १६, नगवामा गोदाम भण्डारण गर्ने गरिएको स्रोतको भनाइ छ । नगवामा माछा व्यापारीहरूले गोदाम नै लिएको र भारतबाट तस्करी गरिएको माछा गोदाममा भण्डारण गरी नेपालको विभिन्न बजारमा लैजाने गरेको छ ।
नगवाका गरभु साह तुराहा, बिपिन साह तुराहा र अजय कुमार साह तुराहा माछाका मुख्य व्यापारीहरू हुन् । उनीहरूले भारतबाट दैनिक साइकलमा ओसार्न लगाउने र नगवामा गोदाममा भण्डारण गर्ने गरेको स्रोतको दाबी छ ।
एउटा साइकलमा लोड गरिएको एक क्रेटमा ४२ केजी माछा आउने गरेको छ । स्रोतका अनुसार ४२ केजीको दर दैनिक झन्डै २ हजारवटा साइकलमा माछा तस्करी हुने गरेको छ । ४२ केजीको माछामा ५५ रुपैयाँको भन्सार लाग्ने र यसरी दैनिक कुल ४६ लाख २० हजार रुपैयाँको राजस्व छली हुने गरेको स्रोतको दाबी छ ।
वीरगन्ज भन्सार कार्यालयका प्रमुख भन्सार अधिकृत दिलीप केसीले भने ताजा माछाको भन्सार नलाग्ने र अन्य प्रकारका माछाको भन्सार १३ प्रतिशत भ्याट र मूल्यमा ९ प्रतिशत भन्सार महसुल लाग्ने बताए । यसरी औसतमा २ हजारवटा साइकलमा ४२ केजीका दरले माछा तस्करी हुँदा दैनिक ८४ सय केजी माछा अवैध रूपमा वीरगन्ज भित्रिने गर्छ । माछा आयात गर्दा एलसी खोलेरै आयात गर्नुपर्ने र एलसीमा शतप्रतिशत रकम जम्मा गर्नुपर्ने प्रावधानले पनि तस्करी बढेको हुन सक्ने प्रमुख भन्सार अधिकृत केसीको अनुमान छ ।
यसरी अवैध रूपमा भित्रिने माछाको मात्रै दैनिक लाखौं रुपैयाँको राजस्व गुम्दा अन्य सामानहरूको पनि अवैध ओसारपसारमा भएको वृद्धिले महिनामा करोडौं रुपैयाँको भन्सार राजस्व राज्यले गुमाइरहेको छ । अहिले चाडपर्वहरू पनि नजिक आएकाले खाद्य तथा उपभोग्य वस्तुको बढी खपत हुने भएकाले पनि सीमाक्षेत्रमा अवैध कारोबारमा वृद्धि हुने गरेको हो ।
गत भदौ १ गते सशस्त्र प्रहरीले बिल बिजकभन्दा बढी सामान लोड गरेको भन्सार छलीसहितको ट्रक बरामद गरेर राजस्व अनुसन्धान कार्यालय, पथलैयामा बुझाएको थियो । त्यस्तै भदौ ३ गते पनि ५९ लाख ३४ हजार ७ सय ५८ रुपैयाँ मूल्यबराबरको प्रज्ञापनपत्रबिनाको सामान बरामद गरेको थियो । भदौ १६ गते १ करोडभन्दा बढीको प्रज्ञापनपत्रबिनाका विभिन्न सामानहरू लोड गरेको ट्रक बरामद गरी आवश्यक अनुसन्धानका लागि राजस्व अनुसन्धान कार्यालय, पथलैयामा बुझाएको छ ।

प्रतिक्रिया दिनुहोस्