रेसुंगा क्याम्पसले प्राध्यापक र कर्मचारी कटौती गर्ने «

रेसुंगा क्याम्पसले प्राध्यापक र कर्मचारी कटौती गर्ने

आर्थिक संकटमा परेको गुल्मीको रेसुंगा बहुमुखी क्याम्पसले प्राध्यापक र कर्मचारी कटौती गर्ने भएको छ । ऋणमा डुबेपछि २९ साउनमा आर्थिक संकटकाल घोषणा गरेको क्याम्पसले नौ प्राध्यापक र कर्मचारी कटौती गर्ने भएको हो ।
क्याम्पसले मंगलबार पत्रकार सम्मेलन आयोजना गरी तत्कालीन तथा दीर्घकालीन समाधानको रूपमा प्राध्यापक र कर्मचारी कटौती गर्ने जानकारी दिएको हो । क्याम्पसलाई मासिक रूपमा झण्डै आठ लाख रुपैयाँ ऋण बढ्दै गएपछि आफूहरूले आर्थिक संकटकाल घोषणा गरी प्राध्यापक र कर्मचारी कटौती गर्ने निर्णयमा पुगेको सञ्चालक समिति अध्यक्ष श्रीप्रसाद भलामीले बताए ।
संचालक समिति अध्यक्ष भलामीका अनुसार प्राध्यापक तथा कर्मचारीलाई स्वेच्छिक अवकाशको माग गरिएको छ । “हामीले स्वेच्छिक अवकाशको माग गरेर प्राध्यापक तथा कर्मचारीलाई सुविधा दिएका छौं,” अध्यक्ष भलामीले भने, “स्वेच्छिक नचाहेमा अनिवार्य अवकाश गराएर छाड्छौं ।” उनले स्वेच्छिक अवकाश माग प्राध्यापक र कर्मचारीलाई सुविधा मात्र भएको अधिकार नभएको समेत स्पष्ट पारे । आफूहरूले क्याम्पसलाई भार पुग्ने ठहर गरेका नौ प्राध्यापक तथा कर्मचारीलाई अवकाश गराउने भलामीले बताए ।
क्याम्पसमा भारी मात्रामा रहेका प्राध्यापक र कर्मचारी कटौती गर्न नीति र नियमले नदिने अनि ऋण कम गर्न कटौतीबाहेकको उपाय नभएपछि क्याम्पसमा २९ साउनमा संकटकाल घोषण गरिएको थियो । क्याम्पसलाई आर्थिक रूपमा धरासायी हुनबाट बचाउन आर्थिक संकटकाल घोषणा गरिएको सञ्चालक समिति अध्यक्ष भलामीले बताएका थिए । गुल्मीको रेसुंगा नगरपालिकाले क्याम्पसलाई एक करोड आर्थिक सहयोग गर्ने यसअघि बताइसकेको छ । अन्य स्थानीय तहबाट पनि आर्थिक रकम जुटाउन लाग्ने क्याम्पस सञ्चालक समितिले बताएको छ ।
क्याम्पसमा अहिले विद्यार्थीबाट वार्षिक रूपमा हुने आम्दानीभन्दा प्राध्यापक र कर्मचारीको तलबमा मात्र झण्डै दोब्बर खर्च हुने गरेको छ । “प्राध्यापक र कर्मचारी राजनीतिक बाँडफाँडबाट आवश्यकभन्दा बढी नियुक्त भएका छन् ।” सञ्चालक समितिका अध्यक्ष भलामीले भने, “विद्यार्थीको संख्यामा कमी हुँदा आम्दानीको स्रोत बन्द भएपछि हरेक वर्ष झण्डै डेढ करोड बढी ऋणको भार थपिएको छ ।” उनले अब प्राध्यापक र कर्मचारी कटौतीपछि क्याम्पसको समस्या समाधान हुने बताए ।

प्रतिक्रिया दिनुहोस्