पेरुको भूकम्पमा ठूलो धनजनको क्षति «

पेरुको भूकम्पमा ठूलो धनजनको क्षति

पेरुको उत्तरी क्षेत्रमा आइतबार बिहान आएको ७.५ म्याग्निच्युडको भूकम्पबाट एक व्यक्तिको मृत्यु हुनुका साथै ११ जना घाइते भएका छन् ।
राष्ट्रिय आपत्कालीन उद्धार केन्द्र (कोन) का प्रमुख रिकार्डो सेजासका अनुसार सान इग्नासियो निवासी ४८ वर्षीय डारियो मुनोजको मृत्यु भएको छ । भिरालो पहाडमा रहेको घर भएका डारियोको घरमाथि बज्रिएको ढुंगाका कारण उनको मृत्यु भएको थियो ।
जियोफिजिक्स इन्स्टिच्युट पेरु (आईजीपी) का अनुसार उत्तरी अल्टो अमेजोनास प्रान्तमा केन्द्रबिन्दु भएको भूकम्प स्थानीय समयअनुसार आइतबार बिहान २ बजेर ४१ मिनेटमा गएको थियो ।
निकै शक्तिशाली मानिएको उक्त भूकम्पबाट करिब १ सय ३० वटा घर, तीनवटा विद्यालय र ६ वटा साना अस्पताल क्षतिग्रस्त भएका छन् । उक्त भूकम्पको धक्का छिमेकी मुलुकहरू इक्वेडर, कोलम्बिया, ब्राजिल र बोलिभियामा पनि अनुभव गरिएको थियो ।

प्रतिक्रिया दिनुहोस्