कोरियामा क्षेत्र विशेष भिसा «

कोरियामा क्षेत्र विशेष भिसा

ग्रामीण क्षेत्रमा घट्दै गइरहेको श्रमयोग्य जनशक्ति अभाव कम गर्न दक्षिण कोरियाले यो वर्षको अक्टोबरबाट क्षेत्र–विशेष भिसाअन्तर्गत विदेशी श्रमिक माग गर्ने भएको छ ।
तीव्र गतिमा घट्दै गएको जनसंख्याका कारण श्रमिक अभावको सामना गरिरहेका ग्रामीण क्षेत्रहरूमा बसोबास गर्न विदेशी श्रमिकलाई आकर्षित गर्ने योजना कोरियाले बनाएको हो ।
यो नयाँ भिसा श्रेणीअन्तर्गत निश्चित मापदण्ड पूरा गर्ने दक्ष कामदारहरूलाई स्थानीय सरकारले तोकेका उद्योगहरूमा काम गरेको सर्तमा रेसिडेन्सी (एफ–२) भिसा दिइने दि कोरियन टाइम्सले जनाएको छ । यो नयाँ भिसा प्रणाली अन्तर्गत विदेशी श्रमिकले भिसा प्राप्त गरेपछि कम्तिमा ५ वर्ष ग्रामीण क्षेत्रमा काम गरेर बस्नुपर्ने जनाइएको छ, जुन अवधिमा उनीहरूले आफ्नो श्रीमान् तथा श्रीमती र नाबालिग बच्चाहरूलाई कोरियामा लैजान अनुमति दिइनेछ ।
हालै कोरियाको न्याय मन्त्रालयले क्षेत्र–विशेष भिसा सुरु गर्ने घोषणा गरेको हो, जुन यस वर्षको अक्टोबरदेखि सरकारले तोकेको ग्रामीण क्षेत्रमा बस्न र काम गर्न चाहने विदेशी नागरिकहरूलाई दिइनेछ । क्षेत्र–विशेष भिसाका लागि योग्य आवेदकहरूले कोरियाली भाषामा प्रवीणता सहित निश्चित आवश्यकताहरू पूरा गर्नुपर्छ र स्नातक डिग्री वा उच्चको साथ शैक्षिक पृष्ठभूमि भएको हुनुपर्छ ।
मन्त्रालयले यस क्षेत्र विशेष भिसा योजनाको पाइलट कार्यक्रममा भाग लिन चाहने कोरियाका स्थानीय तह र नगरपालिका सरकारहरूबाट आवेदन प्राप्त गर्ने बताएको छ । हाल कोरियाले त्यहाँका ८९ स्थानीय तह तथा नगरपालिकालाई कोरियाको आन्तरिक र सुरक्षा मन्त्रालयद्वारा कम जनसंख्या भएको क्षेत्रको रूपमा वर्गीकृत गरेको छ ।
न्याय मन्त्रालयले त्यसपछि ५ वटा क्षेत्र छनोट गरी अक्टोबरमा सुरुमा ५०० विदेशी श्रमिकलाई एफ–२ भिसा प्रदान गर्ने जनाइएको छ । परीक्षण परियोजना एक वर्षको लागि अक्टोबर २०२३ सम्म रहने जनाइएको छ । त्यसपछि कोरिया सरकारले यो कार्यक्रमलार्ई समीक्षा गरी अन्य क्षेत्रहरूमा विस्तार गर्ने योजना बनाएको छ ।
अष्ट्रेलियामा स्किल्ड वर्क रिजनल भिसा र क्यानडाको एट्लान्टिक इमिग्रेसन प्रोग्राम जस्ता अन्य देशहरूमा पनि यस्तै भिसा प्रणाली लागू गरिएको जनाउँदै कोरियाले पनि ‘क्षेत्र–विशेष भिसा’ लागू गरेको जनाएको छ । यसबाहेक कोरिया सरकारले विज्ञान र प्रविधिमा डिग्री हासिल गरेका अन्तर्राष्ट्रिय विद्यार्थीहरूका लागि नागरिकता वा बसोबासको लागि द्रुत–ट्रयाक मार्ग सिर्जना गरेर विदेशी सूचना र सञ्चार प्रविधि विशेषज्ञहरूलाई लिने जनाएको छ ।
यसैगरी कोरियाले कागजात नभएका विदेशी नागरिकका बच्चाहरूको लागि जन्मदर्ता प्रणाली पनि ल्याउने भएको छ । बालबालिकालाई आधारभूत सामाजिक सेवाहरूमा पहुँचको ग्यारेन्टी गर्नका लागि यो दर्ता प्रणाली ल्याउने भएको हो । हालको कानुनअनुसार विदेशी अभिभावकले कानुनी रूपमा कोरिया नबसेका आफ्ना बालबालिकालाई दर्ता गराउन नसक्ने व्यवस्था रहेको छ । जसले गर्दा बालबालिकालाई बालबालिकासम्बन्धी अधिकार र सुविधाबाट वञ्चित गरिएको छ ।

प्रतिक्रिया दिनुहोस्