‘देउवाले पार्टीको नेतृत्व गर्न सक्नु भएन’ «

‘देउवाले पार्टीको नेतृत्व गर्न सक्नु भएन’

नेपाली कांग्रेसका नेता चन्द्र भण्डारीले पार्टी सभापति शेरबहादुर देउवाले पार्टीको नेतृत्व गर्न नसकेको दाबी गरेका छन् ।
बिहीबार नेपाली कांग्रेसका नेता शेखर कोइराला पक्षधरको भेलामा सहभागी हुन पुगेका नेता भण्डारीले पार्टी सभापति शेरबहादुर देउवाले पार्टीको नेतृत्व गर्न नसकेको दाबी गरेका हुन् । उनले सभापति देउवाले पार्टी विधानअनुसार काम गर्न नसकेको बताए । अन्य पार्टीले मन्त्रिपरिषद् हेरफेर गरेपनि देउवाले आफ्नो पार्टीमा त्यसबारे बोल्नसमेत नसकेको उनले आरोप लगाए । उनले देउवा सत्तामा जाने राजनीतिका लागि सफल व्यक्ति भएको बताए । नेता भण्डारीले सभापति देउवाले गुटको प्रतिनिधित्व नगरी सिंगो पार्टीको प्रतिनिधित्व गर्नुपर्ने उनको भनाइ छ । उनले नेता शेखर कोईराला पक्षीय नेताको भेला गुटको भेला नभई विचारको भेला भएको जिकिर गरे । उनले भने, “यो गुटको भेला होइन विचारको भेला हो । हाम्रो पार्टीले छ महिनाको विधानअनुसार पनि काम गर्न नसक्ने, नीति अधिवेशन गर्ने हाम्रो प्रावधान छ । त्यो पनि गर्न नसक्ने ।

सबैले सरकार पुनर्गठन गर्छन् त्यसको बारेमा पनि कुनै आवाज उठाउन नसक्ने । सिंगो पार्टीको पनि नेतृत्व गर्न नसक्ने भइसकेपछि केही कुरा छलफल हुन्छ । सबै कुरालाई गुटको रुपमा हेर्नु हुँदैन । विचारको रूपले पनि हेर्नुपर्छ । उहाँले पार्टीभित्र, नेपाली काँग्रेसका सभापति सत्तामा जाने राजनीतिको लागि सफल व्यक्तिले गुटको प्रतिनिधित्व नगरेर सिंगो पार्टीको प्रतिनिधित्व गर्दै मुलुकको प्रतिनिधित्व गर्नुस् भन्ने हाम्रो दृष्टिकोण हो । तर उहाँले जुन केन्द्रीय समिति बनाउनुभएको छ, उहाँले जुन भातृ संस्थाहरु बुझाउनु भएको छ । मैले उहाँलाई स्मरण मात्र गराउन चाहन्छु, नेविसंघ गठन गर्न सुशील कोईरालाले आफ्नो व्यक्ति राख्यो भनेर उहाँले नौ महिनासम्म केन्द्रीय समितिको मिटिङ गर्न नदिएको कुराप्रति पनि उहाँले आफूले पनि सम्झिनुपर्छ भन्ने कुरा म यति मात्रै राख्न चाहन्छु ।”
नेपाली कांग्रेसका नेता कोइराला पक्षीय नेताहरूको भेला बत्तीसपुतलीस्थित एक फुडल्याण्डमा भएको थियो ।

प्रतिक्रिया दिनुहोस्