शंखरापुर नगरपालिकाको बजेट १ अर्ब ४० करोड ४८ लाख : प्रवक्ता श्रेष्ठ «

शंखरापुर नगरपालिकाको बजेट १ अर्ब ४० करोड ४८ लाख : प्रवक्ता श्रेष्ठ

काठमाडौंको शंखरापुर नगरपालिकाले आगामी आर्थिक वर्षका लागि १ अर्ब ४० करोड ४८ लाख २१ हजार रुपैयाँको बजेट पारित गरेको छ । शुक्रबार बसेको ७ औं नगरसभा बैठकले सो बजेट पारित गरेको हो । चालूतर्फ ४२ करोड ४ लाख ४६ हजार ३ सय रुपैयाँ र पुँजीगत खर्चतर्फ ९८ करोड ३३ लाख ७४ हजार ७ सय रुपैयाँ बजेट पारित भएको प्रवक्ता राधाकृष्ण श्रेष्ठले जानकारी दिए । यस्तै वित्तीय व्यवस्थापनतर्फ १० लाख रुपैयाँ छुट्ट्याइएको छ ।
शुक्रबार साँखुमा बसेको नगरसभामा नगरप्रमुख रमेश नापितले नीति तथा कार्यक्रम प्रस्तुत गरेका थिए भने उपप्रमुख समिता श्रेष्ठले बजेट प्रस्तुत गरिन् । प्रस्तुत नीति तथा कार्यक्रम र बजेट शुक्रबार नै सर्वसहमतिले पारित भएको छ ।
बजेटको आन्तरिक स्रोततर्फ रु.२९ करोड ८२ लाख ५० हजार रुपैयाँ छ भने राजस्व बाँडफाँडतर्फ रु. ५५ करोड ७७ लाख ९९ हजार रुपैयाँ रहेको छ । अन्तर सरकारी वित्तिय हस्तान्तरणअन्र्तगत ४४ करोड ८७ हजार र अन्य आय वापत १० करोड ८६ लाख रुपैयाँ रहेको छ ।
नगरपालिकाले सामाजिक विकासतर्फ २२ दशमलव ४३ प्रतिशत, पूर्वाधार विकासतर्फ ४४ दशमलव ७४ प्रतिशत बजेट विनियोजन गरेको प्रवक्ता श्रेष्ठले जानकारी दिए । यस्तै सुशासनतर्फ ४ दशमलव ९६ प्रतिशत र वातावरण र विपद व्यवस्थापन तर्फ ७ दशमलव ९७ बजेट विनियोजन भएको छ ।

नगरसभाले नगरपालिकावासीका लागि निःशुल्क शिक्षादेखि निःशुल्क स्वास्थ्यसम्मका कार्यक्रम स्वीकृत गरेको छ । नगरसभाले ६० वर्ष माथिका ज्येष्ठ नागरिक तथा गर्भवती महिलाका लागि निःशुल्क एम्बुलेन्स सुविधा दिने नीति पनि पारित गरेको छ । यस्तै शवबाहन सेवा पनि निःशुल्क गर्ने नीति पारित गरिएको शंखरापुर नगरपालिकाका प्रवक्ता राधाकृष श्रेष्ठले जानकारी दिए ।
नगरपालिका भित्र रहेका सामुदायिक बिद्यालयहरूमा कक्षा १ देखि १२ सम्म निःशुल्क शिक्षा दिने, साँखुमा रहेको सुष्मा कोइराला मेमोरियल हस्पिटलसँग सम्झौता गरेर निःशुल्क स्वास्थ्य सेवा प्रदान गर्ने, कक्षा १ देखि ३ सम्म नेपाल भाषा र तामाङ भाषाको पाठ्यक्रम तयार गरी मातृभाषाबाट पठनपाठन गर्ने, गर्भवती महिला र ६० बर्षमाथिका जेष्ठ नागरिकलाई निःशुल्क एम्बुलेन्स सुविधा दिने, गर्भवती र सुत्केरी आमाका लागि पोषण भत्ता उपलब्ध गर्ने नीति पारित गरेको छ ।
यस्तै नगरपालिकाभित्र शवबाहन सेवा निःशूल्क रुपमा उपलब्ध गर्ने, अशक्त तथा ज्येष्ठ नागरिकलाई बैंक मार्फत सामाजिक सुरक्षा भत्ता घरदैलोमै पुगेर दिने, ज्येष्ठ नागरिकहरूका लागि नगरपालिकाको तर्फबाट पोषण भत्ताको व्यवस्था गर्ने नीति पारित भएको छ ।
ऐतिहासिक सांस्कृतिक सहर शंखरापुर नगरभित्रका जात्रा, पर्वहरू दीर्घकालीन आर्थिक रुपमा सहज ढंगले सञ्चालन गर्नका लागि कोषको व्यवस्था गर्ने, ऐतिहासिक साँखु (सक्व) र तामाङ समुदायको ऐतिहासिक एवं मौलिक बस्तिलाई साँस्कृतिक संरक्षित क्षेत्र घोषणा गर्ने, सम्पदा बस्तिमा मापदण्ड अनुसार घर बनाउँनेहरूलाई प्रोत्साहन स्वरुप रु.१ लाख दिँदै आएकोमा घरको नक्सा तयार गरेवापत रुं २५ हजार थप गरी रु. १ लाख २५ हजार दिने साथै सम्पदा बस्ति बाहिरको हकमा ‘घ’ बर्गको घर नक्सा नगरपालिकाबाट निःशुल्क बनाईदिने, नगरस्तरीय खेलकुद एकेडेमी सञ्चालन गर्ने, नगरपालिकाभित्र खुला ब्यायामशाला सञ्चालन गर्दै जाने, बिद्यालय स्तरबाटै मार्सल आर्टका खेलाडी उत्पादन गरी शंखरापुर नगरपालिकाका खेलाडीहरूलाई अन्तर्राष्ट्रिय स्तरमा प्रतिस्पर्धा गर्न सक्ने दक्ष खेलाडी उत्पादन गर्ने नीति पारित भएको प्रवक्ता श्रेष्ठले जानकारी दिए ।
यस्तै स्थानीय कच्चा पदार्थबाट सञ्चालन हुने उद्योगहरूलाई अनुदान तालिम तथा अन्य सहुलियत प्रदान गर्ने, गृह श्रमिक, लघु उद्यमी तथा साना व्यवसायीहरूबाट उत्पादित वस्तुहरूको बजारीकरणलाई सहज बनाउन कोसेलीघर स्थापना गरिने, सामुदायिक वनहरूमा आयआर्जनको कार्यक्रमका लागि पब्लिक–प्राइभेट पार्टनरसीपका कार्यक्रम ल्याइने, शंखरापुर नगरपालिकाको समृद्धिको लक्ष्य प्राप्तिका लागि कृषि पर्यटन विभिन्न क्षेत्रको अध्ययन तथा अनुसन्धान गर्ने, शंखरापुर उज्यालो कार्यक्रमअन्तर्गत सबै वडाका मुख्य चोकहरूमा सडक बत्तिको जडान गर्ने, जनघनत्व बढी भएका मुख्य चोकहरूमा सीसीटिभीको व्यवस्था गरी सुरक्षाको प्रत्याभूति दिने, जनतासँग मेयर कार्यक्रम सञ्चालन गर्ने, शंखरापुर नगरपालिकाको अन्तर्राष्ट्रिय शहरसँग भगिनी सम्बन्ध कायम गर्न पहल गर्ने, पर्यटन सुचना केन्द्र स्थापना गर्ने लगायतका नीति पारित भएको छ ।

प्रतिक्रिया दिनुहोस्