नेप्से ३५.५३ अंकले गिरावट «

नेप्से ३५.५३ अंकले गिरावट

सेयर बजार मापक नेप्से परिसूचक मंगलबार पनि उच्च अंकले गिरावट आएको छ ।
साताको दोस्रो कारोबार मंगलवारका दिन नेप्से परिसूचक ३५.५३ अंकले घटेर २१३७.९२ बिन्दुमा झरेको छ । त्यस्तै सेन्सेटिभ इण्डेक्स ७.११ अंक घटेको छ भने फ्लोट इण्डेक्स २.४० अंक र सेन्सेटिभ फ्लोट इण्डेक्स २.१० अंकले घटेको छ ।
मंगलबार कारोबारमा आएका २२९ कम्पनीको ३७ लाख ६९ हजार कित्ता सेयर १ अर्ब ३१ करोड ७६ लाख रुपैयाँमा खरिदबिक्री भएको छ । सोमबारको तुलनामा मंगलबार कारोबार रकममा पनि गिरावट आएको छ । मंगलबार १ अर्ब ३३ करोड ८८ लाख ५६ हजार रुपैयाँ बराबरको खरिदबिक्री भएको थियोे । मंगलबार १३ उपसमूहमध्ये म्युचुअल फण्ड उपसमूहबाहेक अरु सबै उपसमूहको परिसूचकमा गिरावट आएको छ । जसमध्ये निर्जीवन बिमा उपसमूहको परिसूचक सर्वाधिक २.५६ प्रतिशत घटेको छ ।
बैंकिङ, विकास बैंक, वित्त, होटल तथा पर्यटन, जलविद्युत, लगानी, उत्पादन तथा प्रशोधन, लघुवित्त, अन्य र व्यापार उपसमूहको परिसूचक १ प्रतिशतभन्दा बढी घटेको छ । मंगलबार नेप्से परिसूचक गिरावट आए पनि उपकार लघुवित्तको सेयरमूल्य भने ८.२३ प्रतिशत बढेको छ । त्यसैगरी, एनएमबी ५० र सामलिङ पावर कम्पनीको सेयरमूल्य ४ प्रतिशतभन्दा बढी बढेको छ । त्यस्तै, नेपाल इन्भेष्टमेण्ट बैंकको मूल्य नकारात्मक सर्किट लेभलमा कारोबार भएको छ । त्यस्तै एनएलजी इन्स्योरेन्सको सेयरमूल्य यस दिन ६.५० प्रतिशत घटेको छ ।
कर्पोरेट डेभलपमेण्ट बैंक, मल्टीपर्पस फाइनान्स र प्रभु इन्स्योरेन्स सेयरमूल्य ५ प्रतिशतभन्दा बढीले घटेको छ । कारोबार रकमका आधारमा ५ करोड ३७ लाख रुपैयाँभन्दा बढीको सेयर खरिदबिक्री गरेर एनआईसी एशिया बैंक शीर्ष स्थानमा रहेको छ । नबिल बैंक र हिमालयन डिष्टिलरीको ३ करोडभन्दा बढीको सेयर कारोबार भएको छ ।

प्रतिक्रिया दिनुहोस्