संघ र प्रदेशको निर्वाचनमा पनि सत्तारुढ गठबन्धन कायमै रहने «

संघ र प्रदेशको निर्वाचनमा पनि सत्तारुढ गठबन्धन कायमै रहने

नेपाली कांग्रेसकी सचेतक पुष्पा भुसालले आगामी संघ र प्रदेशको निर्वाचनमा पनि सत्तारुढ गठबन्धन कायमै रहने बताए ।
बुधबार नयाँ बानेश्वरस्थित संघीय संसद भवन परिसरमा न्यूज एजेन्सी नेपालसँग कुरा गर्दै सचेतक भुसालले आगामी संघ र प्रदेशका निर्वाचनमा पनि सत्तारुढ गठबन्धनलाई निरन्तरता दिने बताए । पार्टीले गठबन्धनलाई कायम राख्ने सोच बनाउने उनले बताए । उनले स्थानीय तह निर्वाचनमा कांग्रेसको अग्रताले कांग्रेसप्रति जनताको आस्था र विश्वास बढेको महशुस भएको बताए । उनले कांग्रेसको काँधमा जिम्मेवारी थपिएको बताए । उनले भने, ‘नेपाली कांग्रेसले जुन अग्रता लिइराखेको छ, त्यसबाट आम जनताको नेपाली कांग्रेस प्रतिको आस्था, विश्वास बढेको हामीले महशुस गरेका छौँ । नेपाली कांग्रेसको काँधमा केही जिम्मेवारी पनि थपिएको हामीले महशुस गरेका छौँ र यही निर्वाचनलाई भोलिको दिनमा प्रदेश र केन्द्रको निर्वाचनमा समेत यसैगरी यही गठबन्धनको माध्यमबाट प्रदेश र केन्द्रीय निर्वाचनमा पनि अगाडी बढ्ने सोच राखिएको छ ।’
सचेतक भुसालले काठमाडौं महानगरपालिकाको निर्वाचनमा युवा मतदाता थपिएका कारण युवाहरुले स्वतन्त्र उम्मेदवारलाई मत दिएको बताए । पार्टी भित्रका आन्तरिक असन्तुष्टि पनि निर्वाचन परिणाममा प्रकट भएको उनको भनाइ छ । महानगरको प्रारम्भिक मत परिणामले आगामी दिनमा पार्टीको आन्तरिक संगठनलाई व्यवस्थापन गरेर मात्रै निर्वाचनमा जानुपर्ने संकेत दिएको उनले बताए । उनले भने, ‘अहिले ३५ लाख बढी युवाहरु नयाँ मतदाता थपिएको पनि हो र अहिले नयाँ युवा मतदाताहरु थपिदै गर्दा पपुलर भोटका कुराहरु आउँछन् । दोस्रो, पार्टी भित्रका आन्तरिक असन्तुष्टिका कुराहरु पनि त्यहाँ प्रकट हुने गर्दछन् । तर पनि काठमाडौंको अहिले जुन किसिमको परिणाम आइराखेको छ, यो सुरुवाती परिणाम हो । तटस्थ व्यक्तिलाई भोट जाने बढेको छ यसबाट भोलिको दिनमा पार्टीले उम्मेदवारी दिदैँ गर्दा पार्टी भित्रको आन्तरिक संगठनलाई व्यवस्थापन गरेर अनि मात्र निर्वाचनमा जानुपर्ने संकेतहरु देखा परेको छ । यो परिणामलाई हेरेर निष्कर्ष निकाल्नुपर्ने त छैन, किनभने अझै धेरै परिणाम आउन बाँकी छ ।’
उनले गठबन्धन दलभित्र निर्वाचनका क्रममा देखिएका कमजोरीलाई दोहोरिन नदिने पनि बताए ।

प्रतिक्रिया दिनुहोस्