स्थानीय तह हाँक्दै युवा विद्यार्थी «

स्थानीय तह हाँक्दै युवा विद्यार्थी

पछिल्ला दिनमा युवा तथा विद्यार्थी क्रमशः राजनीतिमा सक्रिय सहभागिता जनाउन थालेको पाइएको छ । स्थानीय तहको निर्वाचनमा उम्मेदवार भई विजयीसमेत हुनेमा विद्यार्थी राजनीतिमा रहेकाहरू देखिएका छन् ।
नेकपा (माओवादी केन्द्र) निकटको विद्यार्थी संगठन अनेरास्ववियु (क्रान्तिकारी)को विभिन्न जिम्मेवारीमा रहेको नेताहरू क्रमशः गाउँपालिकाका अध्यक्ष र वडाध्यक्षमा निर्वाचित भएका छन् । राजनीतिमा युवा तथा विद्यार्थीको सक्रिय सहभागिता बढ्दै गएको समेत यसले देखाउँछ । राजनीतिक दलले क्रमशः आफ्नो समितिभित्र युवा तथा विद्यार्थीलाई सक्रिय रुपमा सहभागी गराइरहेका छन् ।
यसै क्रममा दार्चुलाको अपी हिमाल गाउँपालिकाको अध्यक्षमा विजयी भगतसिंह ठेकरे बोहोरा निर्वाचित भएका छन् । बोहोरोले दुई हजार ३०४ मत प्राप्त गरी विजयी भएको निर्वाचन आयोगले जनाएको छ ।
बोहोरा अखिल (क्रान्तिकारी)का केन्द्रीय सचिवको जिम्मेवारी सम्हालेका थिए । क्रान्तिकारीका महासचिव दीपेश पुनका अनुसार सो संगठनका विभिन्न नेताहरू स्थानीय तहको निर्वाचनमा विजयी भएका छन् ।
गुल्मीको चन्द्रकोट गाउँपालिका–१ को अध्यक्षमा सत्तारूढ गठबन्धनको साझा उम्मेदवारका रुपमा रहेका माओवादी केन्द्रका वडाध्यक्षमा उम्मेदवार घनश्याम खरेल निर्वाचित भएका छन् । खरेल अखिल (क्रान्तिकारी)का लुीम्बनी प्रदेश अध्यक्षको जिम्मेवारीमा थिए । सो गाउँपालिकामा सत्तारूढ गठबन्धनले वडा तहसम्म नै तालमेल गरेको थियो । सत्तारूढ पाँच दलीय गठबन्धनका साझा उम्मेदवारका रुपमा रहेका खरेलले ५५२ मतसहित विजयी भए । सो वडामा कूल ८०० मत खसेको थियो ।

उनका निकटतम प्रतिद्वन्द्वी नेकपा (एमाले)का गोविन्दबहादुर बलालले १८५ मत मात्रै प्राप्त गरे ।
यस्तै सोही सङ्गठनका केन्द्रीय सदस्यको जिम्मेवारीमा रहेर काम गर्नुभएका तारा भण्डारी धादिङको गजुरी–१ को अध्यक्षमा निर्वाचित भए । लामो समयसम्म अखिल (क्रान्तिकारी)को केन्द्रीय नेतृत्वमा रहेका भण्डारी पछिल्ला दिनमा भने गजुरीमा फर्केर पार्टी राजनीतिमा सक्रिय थिए । नेपालको संविधान जारी भएपछि भएको दोस्रो चरणको स्थानीय तहको निर्वाचनमा भण्डारीले ६८८ मत ल्याउँदै वडाध्यक्षमा विजयी भएका हुन् । उनका प्रतिद्वन्द्वी नेपाली कांग्रेसका ज्ञानबहादुर बर्तौलाले ६२६ मत प्राप्त गरेको निर्वाचन आयोगले जनाएको छ ।
यस्तै माओवादी केन्द्रको विद्यार्थी सङ्गठन क्रान्तिकारीका केन्द्रीय सदस्य रामचन्द्र रोकाया बझाङको मस्टा गाउँपालिका–१ वडाध्यक्षको उम्मेदवार छन् । यस्तै, अन्य स्थानीय तहमा समेत युवा विद्यार्थीको सक्रिय सहभागिता छ ।
यस्तै, दैलेखको नौमुले गाउँपालिका अध्यक्षमा विजयी छवि सुवेदी पनि पूर्वविद्यार्थी नै छन् । सुवेदीले नेपाली कांग्रेसका प्रदेश सभापति एवं निवर्तमान गाउँपालिकाका अध्यक्ष भदे बुढा मगरलाई ८०० मतान्तरले पराजित गरे ।

प्रतिक्रिया दिनुहोस्