अष्ट्रेलियाका लगानीकर्ता आकर्षित गर्न परिसंघको आग्रह «

अष्ट्रेलियाका लगानीकर्ता आकर्षित गर्न परिसंघको आग्रह


नेपाल उद्योग परिसंघले नेपालको तुलनात्मक लाभका क्षेत्रमा लगानीकर्ता आकर्षित गर्नेतर्फ सहजीकरण गरिदिन नेपालका लागि अष्ट्रेलियाकी राजदूत फेलिसिटी भोल्कसँग आग्रह गरेको छ ।
नेपालमा हरित ऊर्जा, खनिजजन्य उद्योग, सूचना प्रविधि र कृषि प्रशोधनसँग सम्बन्धित व्यवसायमा उच्च प्रतिफलको सम्भावना रहेकाले त्यस्ता क्षेत्रमा अष्ट्रेलियाका लगानीकर्ता आकर्षित गर्न पहल गरिदिन परिसंघले आग्रह गरेको हो । परिसंघले नेपालमा गुणस्तरीय पर्यटक भित्र्याउन पहल गर्न पनि राजदूत भोल्क समक्ष आग्रह गरेको छ ।
परिसंघका अध्यक्ष विष्णुकुमार अग्रवालले नेपालमा उत्पादन वृद्धिका लागि लगानी अभाव भएको भन्दै त्यसका लागि विदेशी लगानी आवश्यक रहेको बताए । “नेपालमा स्वास्थ्य र शिक्षामा लगानीका अवसर छन्” उनले भने, “नेपाल र अष्ट्रेलियाबीचको मैत्रिपूर्ण सम्बन्धलाई मजुबद बनाउन संस्थागत रूपमा व्यावसायिक क्षेत्रको पहिचान र पहलमा ध्यान दिनुपर्छ ।”
राजदूत भोल्कले नेपालमा सहयोग र सहकार्यलाई विस्तारका लागि आफूले पहल गर्ने बताइन् । उनले अष्ट्रेलियाका लगानीकर्ताले छिमेकी देशका परियोजनाहरूमा काम गरिरहेको भन्दै भावी दिनमा त्यस्ता कार्यक्रम नेपालमा विस्तार गर्न पहल गर्ने बताइन् ।
छलफलमा क्षेत्रगत विज्ञहरूले कृषि क्षेत्रमा प्रविधि हस्तान्तरण, जलविद्युत् विकासमा रहेका अवसर, नेपालमा अष्ट्रेलियाको विश्वविद्यालयको उपस्थितिसहित गुणस्तरीय शिक्षाको विस्तारमा जोड दिए । नेपालमा सञ्चालित व्यवसायिक तालिमलाई अष्ट्रेलियामा समेत मान्यता गराउनका आवश्यक नीतिगत सहजीकरण हुनुपर्नेमा पनि उनीहरुले जोड दिए ।

प्रतिक्रिया दिनुहोस्