बलेफी हाइड्रोपावरको आईपीओ बाँडफाँट «

बलेफी हाइड्रोपावरको आईपीओ बाँडफाँट

बलेफी हाइड्रोपावर कम्पनीको धितोपत्रको प्राथमिक सार्वजनिक निष्कासन (आईपीओ) बाँडफाँट भएको छ । मंगलबार कम्पनीको सेयर निकासन तथा बिक्री प्रबन्धक ग्लोबल आईएमई क्यापिटलले आईपीओ बाँडफाँट भएको जनाएको छ ।
कम्पनीको आईपीओमा मागभन्दा बढी आवेदन परेकोले धितोपत्र निष्कासन तथा बाँडफाँड नियमावलीअनुसार गोलाप्रथाबाट बाँडफाँट गर्दा एक लाख ६६ हजार ३४५ जनाले १० कित्ताको दरले सेयर पाएका छन् । त्यसमध्ये तीन जनालाई बाँकी रहेको तीन कित्ता सेयर एक-एक कित्ताको दरले वितरण गरिएको छ ।
१६ चैतदेखि कम्पनीले १८ करोड २७ लाख ९७ हजार रुपैयाँबराबरको १८ लाख २७ हजार ९७० कित्ता सेयर निष्कासनमा ल्याएको थियो । जसमध्ये ४ प्रतिशत अर्थात् ७३ हजार ११९ कित्ता सेयर कर्मचारीका लागि र ५ प्रतिशत अर्थात् एक लाख ९१ हजार ३९८ कित्ता सेयर सामूहिक लगानी कोषलाई छुट्ट्याएर बाँकी रहने १६ लाख ६३ हजार ४५३ कित्ता सेयर सर्वसाधारका लागि आवेदन खुला गरेको थियो ।
कम्पनीको आईपीओमा २१ लाख ७१ हजार ७ सय ४० जनाले दुई करोड ४४ लाख ७४० कित्ताका लागि आवेदन दिएका थिए । त्यसमध्ये तीन हजार ६४० जनाको आवेदन रद्द भएको बिक्री प्रबन्धकले जनाएको छ । त्यसअनुसार २१ लाख ६८ हजार १०० जनाको मात्रै आवेदन सदर भएको छ ।

प्रतिक्रिया दिनुहोस्