सामाजिक उद्यम प्रवद्र्धन गर्न नबिल बैंकको आवेदन खुला «

सामाजिक उद्यम प्रवद्र्धन गर्न नबिल बैंकको आवेदन खुला

नबिल बैंकले यो वर्षदेखि सञ्चालन गरेको गैरनाफामूलक कार्यक्रम नबिल स्कुल अफ सोसल आन्टरप्रेनरसिप (नबिल एसएमई) अन्तर्गतको प्रमाणपत्र कार्यक्रमका लागि आवेदन आह्वान गरेको छ ।
सामाजिक उद्यमशीलता प्रवद्र्धन गर्न सञ्चालन गरिएको नबिल एसएमई अन्तर्गतका फेलोशिप कार्यक्रम र प्रमाणपत्र कार्यक्रममध्ये प्रमाणपत्र कार्यक्रमको पहिलो ब्याच अन्तर्गतको आवेदन आह्वान गरिएको बैंकले जनाएको छ ।
फेलोशिप कार्यक्रम भने यसअघि नै सुरु भइसकेको छ । प्रमाणपत्र कार्यक्रमले क्षमता विकास, कृषि, शिक्षा, स्वास्थ्य, स्याहार, कला, समुदायको कल्याण, ऊर्जा लगायतका विभिन्न विषयवस्तु र क्षेत्रमा देशभर सामाजिक उद्यमशीलता प्रवद्र्धनमा जोड दिने बताइएको छ ।
मानिसलाई सकारात्मक परिवर्तन ल्याउने, सामाजिक प्रभाव सिर्जना गर्ने कुनै परियोजना वा सोचलाई उद्यममा रुपान्तरणमा विकास गर्न सहयोग गर्न र जटिल सामाजिक समस्या समाधान गर्न सामूहिक पहल गर्नु नबिल एसएसई प्रमाणपत्र कार्यक्रमको लक्ष्य भएको बैंकले जनाएको छ ।
यसले दिगो विकास लक्ष्य प्राप्तिका लागि योगदान गरी समुदाय र समाजमा सकारात्मक प्रभाव पार्न सक्ने विचारलाई प्रोत्साहन गर्ने बताइएको छ । यस कार्यक्रमका लागि नेपालका सातवटै प्रदेशका विभिन्न सात कलेजहरुसँग साझेदारी गरिएको पनि बैंकले जनाएको छ । साझेदारीबाट एक वर्षमा सात सय तालिम प्राप्त सामाजिक उद्यमी तयार गर्ने लक्ष्य कम्पनीको छ ।
सामाजिक उद्यमशीलता प्रवद्र्धन गर्न चाहने १८ वर्ष उमेर पूरा भएका नेपालीले तोकिएको मापदण्ड अनुसार कार्यक्रममा सहभागिताका लागि आवेदन दिन सक्ने बैंकले बताएको छ ।

प्रतिक्रिया दिनुहोस्