पुष्पकमल दाहालद्वारा चितवनमा चेपाङ नमुना बस्तीको उद्घाटन «

पुष्पकमल दाहालद्वारा चितवनमा चेपाङ नमुना बस्तीको उद्घाटन

चितवनको माडीस्थित कुसुमखोलाबाट विस्थापित चेपाङहरुका लागि बनाइएको कुसुमखोला नमुना चेपाङ बस्तीको उद्घाटन गरिएको छ ।
त्यस क्षेत्रका सांसद समेत रहेका नेकपा (माओवादी केन्द्र)का अध्यक्ष एवम् पूर्वप्रधानमन्त्री पुष्पकमल दाहालले बिहीबार सोही ठाउँमा पुगेर बस्तीको उद्घाटन गरे । उद्घाटनका लागि पुग्नु भएका अध्यक्ष दाहालसहितका जनप्रतिनिधिहरुलाई स्थानीयले भव्य रूपमा स्वागत गरेका थिए । कुसुमखोला, भालुखोला र अन्य भित्री चेपाङ बस्तीहरुबाट विस्थापित र स्थानान्तरित भई आएका चेपाङहरुको निम्ति सो स्थानमा निर्वाचन क्षेत्र विकास कोषबाट नमुना चेपाङ बस्ती कार्यक्रम अनुसार ४१ घर परिवारको आवास निर्माणको काम पूरा भएको हो ।
कार्यक्रममा बोल्दै अध्यक्ष दाहालले सो चेपाङ बस्तीलाई सहकारीको माध्यामबाट आत्मनिर्भर बनाउन लागिपर्ने प्रतिबद्धता जनाए । उनले सो बस्ती उद्घाटन गर्ने अवसर आफूलाई प्राप्त भएकोमा खुसी व्यक्त गर्दै त्यस वरपरका ठाडो खोलाहरुको तटबन्ध निर्माणका लागि पनि आफूले सकेको सहयोग गर्ने आश्वासन दिए ।
अध्यक्ष दाहालले चितवनका सबै क्षेत्रको विकासका लागि आफूले पहल गरिरहेको कुरा स्थानीयलाई राम्ररी थाहा भएको पनि बताए ।

प्रतिक्रिया दिनुहोस्