‘बालुवा खेती’मा किसान आकर्षित «

‘बालुवा खेती’मा किसान आकर्षित


सुनसरीका किसानहरु बालुवामा उब्जने खेतीमा आकर्षित भएका छन् ।
अस्गर अली बालुवामा मोहर फलाउने ध्याउन्नमा लागेका हुन् । उनको दैनिकी र लक्ष्य भनेकै कोशीको बाढीले बन्जर बनाएको जमिनमा फसल उब्जाउनु हो । कोसी गाउँपालिका वडा नम्बर ५ कुम्याही, हुर्कीटोल घर भएका अली बालुवामा खेती गर्ने नमूना कृषक समेत हुन् ।
उनले यस अघिका बाली भने उठाइसकेका छन् । मनग्यै आम्दानी गर्दै आएका अलीले यतिबेला १२ बिगाह भन्दा बढी बालुवामा मौसमी खेती लगायतका विभिन्न बाली लगाएका छन् । गाउँपालिकाको सहयोगमा राजस्थान समेतको भ्रमण गरी सिकेको ज्ञानलाई व्यवहारमा उतारेका अलि यतिबेला कागती खेतीसँगै अन्य बाली उब्जाउको क्रममा छन् ।
अलीले बालुवामा लगाएको बालीमा डिप बोरिङ र थोपा सिँचाईको माध्यमबाट पानीको प्रबन्ध मिलाएका छन् । जलकुम्भीलगायतका झारपात कुहाएर प्राङगारिक मल बनाइएको छ । बालुवालाई उब्जाउ योग्य बनाउन बाहिरबाट माटो ल्याएर लेबलिङ गरी अलीले खेती गरेका छन् ।
कृषि पेशालाई निरन्तरता दिएका अली आधुनिक खेती थालेसँगै आम्दानी समेत मनग्यै कमाएको बताउँछन् । उनी भन्छन्, “घर खर्च मज्जाले चल्छ । पहिला एउटा ट्याक्टर थियो । अहिले तीनटा भइसक्यो । राम्रो आम्दानी छ ।”
अलीसँगै उनका छोरा समेत यही पेशामा छन् । ६ वर्ष विदेशमा श्रम गरेका समी उल्लाह दुःख र कष्ट सहनु परेको र कमाईसमेत राम्रो नभएपछि घर फर्किएका छन् । उनी समेत बाबुले धानेको पेशामा मनग्यै कमाई देखेपछि खेती किसानीमै रमेका छन् ।
कोशी गाउँपालिकामा ३३ सय विगाह जग्गा बालुवा जमिन छ । सप्तकोसीको बाढीले बालुवामा परिणत गरेको बन्जर जमिनलाई गाउँपालिकाले लेवलिङ गर्नेदेखि किसानकालागि राहत प्याकेजका काममा सघाउँदै आएको छ ।
विदेशमा कष्ट सहेर काम गरिरहेकाहरुका लागि सुनसरीको कोसी गाउँपालिकाका यी बाबु र छोराको लगन र परिश्रम पक्कै उदाहरणीय बन्न सक्छ ।

प्रतिक्रिया दिनुहोस्