६ महिनामा ६०० मेवा विद्युत उत्पादन «

६ महिनामा ६०० मेवा विद्युत उत्पादन


चालू आर्थिक वर्ष २०७८-०७९ को ६ महिनामा ६ सय मेगावाट विद्युत उत्पादन भएको छ । चालू वर्षभित्र १ हजार ६ सय २९ मेगावाट विद्युत उत्पादन गर्ने लक्ष्य राखे पनि ६ महिनाको अवधिमा ११ आयोजनाबाट नौ मेगावाटको सौर्य (सोलार) सहित ५ सय ९८ मेगावाट उत्पादन भएको नेपाल विद्युत प्राधिकरणले जनाएको छ ।
प्राधिकरणका अनुसार, उत्पादन भएको बिजुलीमध्ये प्राधिकरणको सहायक कम्पनीबाट ४ सय ५६ तथा निजी क्षेत्रबाट १ सय ४२ मेगावाट उत्पादन भएको हो । सरकारले आर्थिक वर्ष २०७७-०७८ मा १ हजार ३ सय मेगावाट उत्पादन गर्ने लक्ष्य राखेकोमा १ सय ३१ मेगावाटमात्र उत्पादन भएको थियो ।
चालू वर्षको बजेटमा सरकारले विद्युत प्राधिकरणको सहायक कम्पनीअन्तर्गत माथिल्लो तामाकोसीसहित १ सय ११ मगावाटको रसुवागढी, ५६ मेगावाटको साञ्जेन र माथिल्लो साञ्जेन, ३७.६ मेगावाटको त्रिशूली–३ बी, ४० मेगावाटको राहुघाट र १ सय २ मेगावाटको मध्यभोटेकोसीका साथै निजी क्षेत्रबाट १ हजार ५५ मेगावाट उत्पादन गर्ने सार्वजनिक गरेको थियो । राष्ट्रिय योजना आयोगको पञ्चवर्षीय योजनाले भने आर्थिक वर्ष २०७७-०७८ मा ३ हजार १ सय ७९ मेगावाट र चालू वर्षमा ३ हजार ६ सय ९९ मेगावाट पु¥याउने लक्ष्य राखेको छ ।
६ महिना पुग्दा ६ सय मेगावाटमात्र उत्पादन भएको र बाँकी अवधिमा एक हजार थप उत्पादन हुने सम्भावना कम रहेको प्राधिकरणका एक अधिकारीले बताए । उनका अनुसार, प्राधिकरणका सहायक कम्पनीबाट निर्माण भइरहेका आयोजनाहरू नै चालू वर्र्षभित्र सम्पन्न हुने सम्भावना कम छ ।
प्राधिकरणका अनुसार, माथिल्लो तामाकोसीबाहेक सिंगटी हाइड्रो इनर्जी प्रालिद्वारा प्रवद्र्धित २५ मेगावाटको सिंगटी खोला, रिचेत जलविद्युत कम्पनीको ४.९८० मेगावाटको रिचेत खोला, अपि पावर कम्पनीको ४ मेगावाटको चन्द्रानिगापुर सोलार, सामलिङ पावर कम्पनी प्रालिको ९.५१० को माई बेनी र मनाङ ट्रेड लिंक प्रालिको २० मेगावाटको लोअर मोदी छ । यसैगरी सोलार फार्म प्रालिद्वारा निर्माण गरिएको ५ मेगावाटको बेलचौतारा सोलार, एसियन हाइड्रोपावरको ६.२०० मेगावाटको लोअर जोगमाई, ग्रिन भेन्चर प्रालिको ५२.४०० मेगावाटको लिखु–४, छ्याङदी हाइड्रोपावरको ४ मेगावाटको अपर छ्याङदी खोला र युनिभर्सल पावर कम्पनीको ११ मेगावाट लोअर खारे जलविद्युत आयोजनाको निर्माण कार्य पूरा भएर उत्पादन सुरु भएको विद्युत प्राधिकरणले जनाएको छ ।

आयोजना क्षमता (मेगावाट)
सिंगटी खोला २५
रिचेत खोला ४.९८०
अपर तामाकोसी ४५६
चन्द्रानिगाहापुर सोलार ४
माई बेनी ९.५१०
लोअर मोदी २०
बेलचौतारा सोलार ५
लोअर जोगमाई ६.२००
लिखु–४ ५२.४००
अपर छ्याङदी खोला ४
लोअर खारे ११
स्रोतः नेपाल विद्युत प्राधिकरण

प्रतिक्रिया दिनुहोस्