सबैलाई समेटेर लैजाने योजना बनाएको छु «

सबैलाई समेटेर लैजाने योजना बनाएको छु

करण चौधरी
अध्यक्षका प्रत्याशी
नाडा अटोमोबाइल्स एसोसिएसन अफ नेपाल

अटोमोबाइल व्यवसायीहरूको छाता संस्था नाडा अटोमोबाइल्स एसोसिएसन अफ नेपालको आगामी हप्ता हुने ४५औं वार्षिक साधारणसभाले नयाँ कार्यसमिति चयन गर्दैछ । नाडाको आगामी कार्यकालका लागि दुई प्यानल चुनावी मैदानमा उत्रेका छन् । करिब ३२ सय अटो व्यवसायीहरूको साझा संस्था नाडाको साधारणसभाले यसपटक नयाँ कार्यसमिति चयन गर्नेछ ।
आगामी कार्यकालका लागि अध्यक्षमा करण चौधरी र धु्रवबहादुर थापा चुनावी मैदानमा उत्रेका छन् । अटोमोबाइल व्यवसायबाट नै उदाएका चौधरी र थापाबीच कडा प्रतिस्पर्धा हुने अनुमान पनि गरिएको छ । उनै अध्यक्षका दाबेदार चौधरीसंँग आगामी निर्वाचनका एजेन्डालगायत विषयमा केन्द्रित रहेर कारोबारकर्मी दीपेन्द्र थापाले गरेको कुराकानीको सार :

नाडाको अध्यक्ष पदका लागि उम्मेदवारी दिनुभएको छ । तपाईंलाई नै जिताउने आधार के हो र किन जिताउने ?
मेरै नेतृत्व आवश्यक छ भनेर मेरा अग्रजदेखि मेरो टिम र सदस्यहरूको साथ–सहयोग रहेकाले गर्दा नै मैले अध्यक्ष पदमा उम्मेदवारी दिएको हुँ ।
मेरो विचारमा समूह बनाएर, प्यानल–प्यानल बनाएर जानुको आवश्यकता थिएन । तर, प्रजातान्त्रिक अभ्यास भएकाले गर्दा समूह बनाएर जानुपरेको अवस्था छ । मेरो समूहमा भन्नुहुन्छ भने वर्तमान र विगतको कार्यसमितिमा रहेर काम गरिसकेका ८० प्रतिशत पुरानै व्यक्तिहरू आगामी निर्वाचनको कार्यसमितिमा समेटेका छौं ।
समयसँगै नयाँ अनुहार र युवा नेतृत्वको आवश्यकता रहने गरेकै छ । नाडाको कार्यसमितिलाई नयाँ ऊर्जावान् नेतृत्वको आवश्यकता भएकाले गर्दा पनि मैले मरो समूह सोहीअनुसार घोषणा गरेको छु । आजको दिनमा सबै तह र तप्कामा युवा नेतृत्वको खोजी भइरहेको समयमा हामीले पनि नाडालाई युवाको नयाँ नेतृत्व दिन खोजेका हौं । सबै पक्षसँगको साथ–सहयोगमा नाडालाई कसरी अगाडि बढाउने भनेर सहमतिको प्रयास जारी राखेका नै छौं ।
कोभिडको नयाँ भेरियन्टको प्रकोप आइरहेका बेला कसरी संयमित र सजग भएर काम गर्नुपर्नेछ, अटोको अन्तर्राष्ट्रिय सम्बन्धलाई कसरी मजबुत बनाएर लाने भनेर पनि काम गर्नु आवश्यक छ । नाडालाई नयाँ उचाइ र युवा नेतृत्व आवश्यक भएकाले गर्दा अहिलेको नाडाको समस्या समाधान गरेर काम गर्न सक्छु भनेर नै मैले नाडामा अध्यक्षको दाबी गरेको हो ।

तपाईंको प्यानलका एजेन्डाहरू के–के छन् ?
मैले यो गर्छु त्यो गर्छु भनेर एजेन्डा पेस गर्नेभन्दा पनि नाडालाई समयअनुसार र समय सुहाउँदो संस्थाको रूपमा विकास गरेर लाने अठोट लिएको छु । दुई वर्ष कार्यकाल धेरै त हैन, त्यसैले दूरदर्शी भएर केही गर्न सकिने अवस्था छैन । यो समयमा मेरो मुख्य काम भनेकै, प्रादेशिक संरचना बनाएका छौं, त्यसलाई अगाडि बढाउने हो ।
यसका लागि मैले देशभरका ३२ सय सदस्यहरूको माग तथा राय–सुझावलाई सम्बोधन गरेर काम गर्ने हो । साथै विगतका कार्यसमिति र वर्तमान कार्यसमितिले गरेका राम्रो कामलाई निरन्तरता दिँदै समयसापेक्ष र सरकारको नीतिअनुसार व्यवसायीको हकहितका लागि काम गर्ने सोच लिएको छु ।

नाडाको आगामी नेतृत्वले विद्युतीय सवारीको प्रयोगमा कसरी सहजीकरण गर्छ ?
नाडाले विद्युतीय सवारीको प्रयोगमा जोड दिँदै आएको छ । हामीले सीसीडी रेसियो घटाउन राष्ट्र बैंकलाई दबाब दिनेदेखि लिएर कर्जा प्रवाहमा ब्याजदर घटाउन लगायतका काम गर्दै र पहल गर्दै आएका छौं । अटोमोबाइल क्षेत्रलाई उत्पादनमूलक वस्तुको रूपमा विकास गर्न आवश्यक छ । अब सवारी साधन विलासिताका वस्तु रहेनन् । यसका लागि सरकारको धारणा र सोच परिवर्तन गर्नु आवश्यक छ । यसो भएको खण्डमा नेपालको अटो क्षेत्रले पूर्णता पाउनछ ।

नाडामा प्यानलै घोषणा गरेर चुनावी मैदानमा उत्रिएको अवस्था छ । एउटै व्यवसाय गर्ने अटोमोबाइल व्यवसायीहरू विभाजनतर्फ लाग्ने देखियो, हैन ?
मेरो विचारमा यो आवश्यक थिएन । हामीले यो संस्थामा प्यानल नै घोषणा गरेर जानु भनेको बाध्यताको विषय हो । सर्वसहमतिका लागि करण चौधरीले २२ गते राति १२ बजेसम्म पनि ढोका खुल्लै राख्नेछ । सबै सहमतिका लागि मेरो प्रयास जारी रहेको छ ।

सरकारले पछिल्लो समयमा एसेम्बलमा ध्यान दिएको छ । आगामी दिनमा नयाँ नाडा कार्यसमिति आएपछि कसरी सहजीकरण गर्दै जान्छ ?
सरकारले स्वदेशमा नै उद्योग स्थापना गर्नका लागि प्रत्साहन गरेको छ, जुन स्वागतयोग्य हो । नीतिगत र लगानीमैत्री वातावरण विकास हुन सकेको खण्डमा उद्योगको स्थापना हुनु सकारात्मक हो । नीतिगत प्रस्टता भएको अवस्थामा नाडाले पनि एसेम्बल उद्योगलाई स्थापित गर्नका लागि भूमिका खेल्ने नै छ । एसेम्बल उद्योगका लागि नीति बनाउन सरकारसँग पुलको काम गर्नेछ । यसले गर्दा नेपालका एसेम्बल उद्योग स्थापना गर्नका लागि सहयोग पुग्नेछ ।

नीतिगत पहलमा नाडा चुकेको हो ?
कोभिडका कारण नाडाको मात्र नभएर हरेक तहको प्राथमिकता फेरिएको छ । मानव जीवन नै सबैभन्दा पहिले महŒवपूर्ण रहन्छ । यो कार्यकाल कोभिडका कारणले नै बितेको अवस्था छ र सरकारले नीति–नियम बनाउँदा नाडासँग सहकार्य गर्दै आएको छ । पछिल्लो समय नाडाको विस्तार देशभर नै भएसँगै यसको गरिमा, उचाइ अझ बढेर गएको छ ।

सरकारको अटोमोबाइल क्षेत्रलाई हेर्ने दृष्टिकोण परिवर्तन भएको हो ?
सरकारको सोच परिवर्तन भएको छ । समयअनुसार सोच परिवर्तन हुनु पनि पर्छ । समयअनुसार सवारी साधनमा सबैको पहुँच हुन सकेमा उत्पादकत्व पनि बढेर जानेछ । त्यसैले सवारी भनेको अब विलासिता मात्र नभएर जीवनयापन गर्ने अनिवार्य आवश्यकताको वस्तुमा विकास भएको छ ।

विगतमा नाडामा कर्पोरेट व्यवसायीको मात्र संस्था भयो भनेर जनरल व्यवसायीले आरोप लगाउँदै आएका थिए । अहिले फेरि संस्था सदस्यता थप हुँदै गएपछि जनरल व्यवसायीको मात्र बाहुल्य भयो भनिन्छ नि ?
मैले त सबै पक्षलाई समेटेर लानुपर्छ नै भन्दै आएको छु । साना–ठूला व्यवसायी भनेर वर्गीकरण गर्नुभन्दा पनि हामी सबै अटो व्यवसायीहरू हौं । संस्थाको वृद्धि भनेकै संस्थाका सदस्यहरूले गर्दा हुने हो । यस कारणले गर्दा सातै प्रदेशबाट सदस्य समेट्नु भनेको नाडामा सबैको प्रतिनिधित्व हुनु हो ।


मैले यो गर्छु त्यो गर्छु भनेर एजेन्डा पेस गर्नेभन्दा पनि नाडालाई समयअनुसार र समय सुहाउँदो संस्थाको रूपमा विकास गरेर लाने अठोट लिएको छु । दुई वर्ष कार्यकाल धेरै त हैन, त्यसैले दूरदर्शी भएर केही गर्न सकिने अवस्था छैन ।


हामीले सीसीडी रेसियो घटाउन राष्ट्र बैंकलाई दबाब दिनेदेखि लिएर कर्जा प्रवाहमा ब्याजदर घटाउन लगायतका काम गर्दै र पहल गर्दै आएका छौं । अटोमोबाइल क्षेत्रलाई उत्पादनमूलक वस्तुको रूपमा विकास गर्न आवश्यक छ ।


सरकारको सोच परिवर्तन भएको छ । समयअनुसार सोच परिवर्तन हुनु पनि पर्छ । समयअनुसार सवारी साधनमा सबैको पहुँच हुन सकेमा उत्पादकत्व पनि बढेर जानेछ ।

प्रतिक्रिया दिनुहोस्