ऊर्जा मन्त्रीद्वारा तनहुँ जलविद्युत समयमै बनाउन निर्देशन «

ऊर्जा मन्त्रीद्वारा तनहुँ जलविद्युत समयमै बनाउन निर्देशन


ऊर्जा जलस्रोत तथा सिंँचाइमन्त्री पम्फा भुसालले निर्माणाधीन १४० मेगावाट जडित क्षमताको तनहुँ जलविद्युत आयोजना समयमै सम्पन्न गर्न निर्देशन दिएकी छन् ।
नदी फर्काउने, बाँधलगायतका पहिलो प्याकेजका संरचना निर्माणस्थल र निर्माणाधीन भूमिगत विद्युतगृह, टेलरेस, सुरुङलगायतका संरचनाको निरीक्षण गर्न सोमबार आयोजनास्थल पुगेकी मन्त्री भुसालले यस्तो निर्देशन दिएकी हुन् । १५ असार २०७५ सालमा विद्युत प्राधिकरणसँग विद्युत खरिद सम्झौता (पीपीए) हुँदा ३० चैत २०८० मा निर्माण सम्पन्न गर्ने लक्ष्य राखिएकोमा फेरि असार २०८१ मा सम्पन्न गर्ने लक्ष्य राखिएको थियो तर फेरि आयोजनाको व्यापारिक उत्पादन सरेर असार २०८३ मा पुगेको छ ।
मन्त्री भुसालले सरकारी तहबाट निर्माण भइरहेको जलाशययुक्त आयोजनाको काममा विलम्ब नगरी तोकिएकै समयमा सम्पन्न गर्नुपर्ने बताइन । “कुलेखानीबाहेक सञ्चालमा रहेका सबै आयोजना नदीको बहाबमा आधारित भएकाले हिउँदमा उत्पादन घट्दा मुलुकभित्रको माग धान्न अझै पनि विद्युत आयात गर्नुपर्ने र बर्खामा खपत गर्न नसकी खेर फाल्नु पर्ने अवस्था छ,” भुसालले भनिन्, “यस्तो अवस्था अन्त्यका लागि रणनीतिक महत्वको जलाशययुक्त तनहुँ आयोजनाको निर्माण स्रोत, साधन, स्थानीय समस्यालगायतका कारणले ढिलाइ हुनु हुँदैन, तोकिएकै समय र लागतका सम्पन्न गर्नुपर्छ ।”
उनले आयोजनाको जलाशय बनेपछि यस क्षेत्रलाई पर्यटकीयस्थलको रूपमा विकास गर्न सकिने र त्यसबाटे स्थानीय बासिन्दाले प्रत्यक्ष लाभ लिन सक्ने बताइन् । आयोजनाको प्रवद्र्धक कम्पनी तनहुँ हाइड्रोपावर लिमिटेडका प्रबन्ध–सञ्चालक किरणकुमार श्रेष्ठले निर्माणमा हालसम्म प्राप्त भौतिक तथा वित्तीय प्रगति, बेहोरिएको समस्यालगायतका विषयमा जानकारी गराएका थिए ।
आयोजनाको पहिलो प्याकेजका निर्माणका लागि सोङ्ग दा कर्पोरेसन, भियतनाम–कालिका कन्सट्रक्सन (प्र.) लि. नेपाल जेभी० सँगकोे ठेक्का सम्झौता १४ भदौ २०७८ बाट कार्यान्वयनमा आएको छ । सोङ्ग दा–कालिका जेभीले आफ्नो कार्यालय, श्रमिक आवास सुविधा, मोबाइल क्रसर प्लान्ट स्थापना गरी नदी फर्काउने कार्य सुरु गरेको छ ।
आयोजनाको सुरुङ, विद्युतगृह निर्माण र हाइड्रोमेकालिन तथा इलेक्ट्रोमेकानिकल उपकरण आपूर्ति, जडान तथा सञ्चालनलगायतका दोस्रो प्याकेजको निर्माण कार्य जारी छ । ठेकेदार कम्पनीले केबुल सुरुङ, मुख्य पहुँच सुरुङ निर्माण सम्पन्न गरी भूमिगत विद्युतगृह खनिरहेको छ । सर्जट्यांंकतर्फको पहुँच सुरुङ निर्माण सम्पन्न गरेको छ ।
आयोजनाको तेस्रो प्याकेजअन्तर्गत दमौलीबाट चितवनको भरतपुरसम्म २२० केभीको डबल सर्किट प्रसारणलाइन निर्माणकार्य भइरहेको छ । अहिलेसम्म ३० वटा टावरको जग हाल्ने कार्य सम्पन्न भई आठवटा टावर ठडाइएको छ ।

प्रतिक्रिया दिनुहोस्