रसुवागढी र साञ्जेन छिटो बनाउन ताकेता «

रसुवागढी र साञ्जेन छिटो बनाउन ताकेता


तीन वर्षअघि नै सम्पन्न गर्नुपर्ने १११ मेगावाटको रसुवागढी, ४२.५ मेगावाटको सान्जेन र १४.८ मेगावाटको माथिल्लो सान्जेन जलविद्युत् आयोजना छिटो निर्माण सम्पन्न गर्न नेपाल विद्युत प्राधिकरणले ताकेता गरेको छ । नेपाल विद्युत प्राधिकरणको सहायक कम्पनी चिलिमे जलविद्युत कम्पनीले पनि सहायक कम्पनी बनाएर निर्माण सुरु भएका तीन वटै आयोजनाको छिटो काम गर्न प्राधिकरणले ताकेता गरेको हो ।
१ माघ २०७५ मा सम्पन्न गर्ने गरी रसुवागढीले विद्युत प्राधिकरणसँग २८ कात्तिक २०६८ मा विद्युत खरिद सम्झौता (पीपीए) गरेको थियो । त्यसैगरी १ माघ २०७५ मा सम्पन्न हुने गरी ४२.५ मेगावाटको साञ्जेन १९ मंसिर २०६८ तथा १४.८ मेगावाटको अपर साञ्जेन पनि २३ असोज २०६८ मा पीपीए गरेको थियो । तर तीनवटै आयोजना सम्पन्न भएका छैनन् । चालु वर्षभित्रै तीनवटै आयोजनाहरु सम्पन्न गर्ने लक्ष्य राखिएको छ । जनताको जलविद्युत कार्यक्रमअन्तर्गत समावेश गरिएका यी आयोजनाहरुमा सर्वसाधारणको पनि लगानी छ । भूकम्प, भारतीय सीमामा भएको अवरोधले निर्माण सामग्री तथा उपकरणको ढुवानीमा कठिनाइ, कठिन भौगोलिक अवस्था, ठेक्का कार्यान्वयनमा देखिएका जटिलता तथा ठेकेदारको कमजोर कार्यसम्पादन, बाढीपहिरो, कोभिड–१९को महामारी लगायतका कारणले आयोजनाको निर्माण प्रभावित हुँदै आएको आयोजनाहरुले जनाएका छन् ।
प्राधिकरणका कार्यकारी निर्देशक कुलमान घिसिङले निर्माणस्थलको अनुगमनमार्फत आयोजना व्यवस्थापन, निर्माणमा संलग्न ठेकेदारहरु, परामर्शदातासँग छलफल गरी बाँकी रहेका काम छिट्टो सम्पन्न गर्न निर्देशन दिएका छन् । “मुख्य सिभिल संरचनाहरुको निर्माण सम्पन्न भइसकेका छन्, सर्वसाधारणको पनि लगानी रहेको आयोजनाहरुको निर्माण यथासक्य छिट्टो सम्पन्न गरी लगानीकर्तालाई प्रतिफल दिनुपर्छ,” घिसिङले भने, “बाँकी रहेका कामहरु समानान्तर रुपमा अगाडि बढाएर ७-८ महिनाभित्रमा सम्पन्न गर्नुपर्छ ।”
माथिल्लो साञ्जेनको बाँध, बालुवा थिग्य्राउने पोखरी, सुरुङलगायतका सिभिल संरचनाको निर्माण र गेट, पेनस्टक पाइपजस्ता हाइड्रोमेकानिकल उपकरणहरु जडान सम्पन्न भइसकेका छन् । आयोजनाको समग्र निर्माण प्रगति ९१ प्रतिशत छ ।
माथिल्लो साञ्जेनको क्यासकेडको रुपमा रहेको साञ्जेनको सुरुङ, सर्जट्याङ खन्ने कार्य सम्पन्न भई त्यसलाई अन्तिम रुप दिने काम भइरहेको छ । विद्युतगृहका उपकरण रहने संरचनाहरुको निर्माण सम्पन्न भइसकेको छ । साञ्जेनको समग्र निर्माण प्रगति ८३ प्रतिशत छ ।
दुवै आयोजनाका इलेक्ट्रोमेकानिकल उपकरणहरुको उत्पादन, जडान, परीक्षण सञ्चालनको ठेक्का पाएको कम्पनीका प्राविधिकहरु चीनबाट आउन नसक्दा काम प्रभावित भएको छ । निरन्तरको प्रयासपछि चिनियाँ प्राविधिकहरु मंगलबार नेपाल आउन लागेको र त्यसपछि चिनियाँ तथा नेपाली प्राविधिकहरुले उपकरणहरु जडान सुरु गर्ने छन् । प्रसारण लाइनको टावरहरु निर्माण भइसकेका छन् भने तार टाँग्न बाँकीे छ ।
रसुवागढी जलविद्युत आयोजनाको मुख्य सिभिल संरचनाको निर्माण अन्तिम चरणमा पुगेको छ । सिभिल संरचना र हाइड्रोमेकानिकल उपकरणहरुको ठेकेदारले आफ्नो काम आगामी चैतभित्रमा सम्पन्न गर्ने प्रतिबद्धता जनाएको छ । इलेक्ट्रोमेकानिकलको ठेकेदारका कारण आयोजनाको निर्माण प्रभावित भएको हो । इलेक्ट्रोेमेकानिकलका ९९ प्रतिशत उपकरणहरु आयोजनास्थलमा आइसकेका छन् भने अहिले जडान कार्य भइरहेको छ ।
तीन वटै आयोजनाहरुको विद्युत निर्माणाधीन २२० केभीको चिलिमे हब सबस्टेसनमा जोडिने छ । चिलिमे तथा त्रिशूली थ्री बी हब सबस्टेसन र चिलेमी–त्रिशूली थ्री बी हब सबस्टेसनको निर्माण आगामी असारभित्र सम्पन्न गर्ने लक्ष्य राखिएको छ । यही प्रसारण लाइनमार्फत आयोजनाहरको विद्युत राष्ट्रिय प्रणालीमा प्रवाह हुनेछ ।

प्रतिक्रिया दिनुहोस्