रामवीर मानन्धर भन्छन्, सहमतिमै नेतृत्व चयनका लागि भरपुर प्रयास हुन्छ «

रामवीर मानन्धर भन्छन्, सहमतिमै नेतृत्व चयनका लागि भरपुर प्रयास हुन्छ

नेकपा (एमाले) का नेता तथा पूर्वमन्त्री रामवीर मानन्धरले आफूले पार्टीको १०औं महाधिवेशनमा केन्द्रीय सदस्यमा उम्मेदवारी दिने घोषणा गरेका छन् ।
बिहीबार रिपोर्टर्स क्लब नेपालले आयोजना गरेको विशेष साक्षात्कारमा बोल्दै उनले आफूले जनजाति क्लष्टरबाट केन्द्रीय सदस्यमा उम्मेदवारी दिने घोषणा गरेका हुन् । उनले भने, ‘जनजाति क्लष्टरबाट २२ जनाले उम्मेदवारी दिने हो, त्यसमा ७ जना महिला हुनुहुन्छ र १५ जना पुरुष हुन्छन् । मैले त्यसको लागि केन्द्रीय कमिटीको सदस्यको लागि उम्मेदवारी घोषणा गरेको हुँ ।’
साक्षात्कारमा बोल्दै उनले यसपटक पार्टीमा सर्वसम्मत् रुपमा नेतृत्व चयन हुने पनि बताए । उनले भने, ‘नेतृत्व यसपटक सर्वसम्म्त रुपमा चयन गर्ने कुरा छ । तर, प्रतिस्पर्धामा जानु पनि ठूलो कुरा होइन ।
भोलि विहान उद्घाटन हुने महाधिवेशनको सम्पूर्ण तयारी भइसकेको उनको भनाइ छ । उनले भने,‘चितवनमा ३५ सय कोठा बुक भएका छन् । प्रतिनिधिहरू सबै पुगिसक्नुभएको छ । चारैवटा नाकाबाट हामी नारायणघाटमा जम्मा हुन्छौं । ११ गते नोमिनेसन हुन्छ । विधान महाधिवेशन सफल रुपमा सम्पन्न ग¥यौं । अब पार्टीलाई सही तवरले अघि बढाउनको लागि नेतृत्व चयन गर्दैछौं । मलाई लाग्छ, नेतृत्व सर्वसम्मत् हुन्छ ।’
उनले यसपालिको महाधिवेशन एकताको महाधिवेशन हुने पनि बताए । उनले भने, ‘समृद्ध नेपाल र सुखी नेपालीको अभियानलाई साकार पार्नकोलागि पार्टी एक ढिक्का भएरअघि बढ्नेछ, हामीले एकता प्रदर्शन गर्नुपर्छ । यसपालिको महाधिवेशनमा म केन्द्रीय सदस्यको दाबेदार हो । २२५ जना सदस्यको केन्द्रीय कमिटी हुन्छ । त्यसमध्ये म पनि दाबेदार हो ।’
उनले २०३६ साालको आन्दोलनमा लागेको व्यक्ति भएको पनि स्मरण गराए । उनले भने, ‘म बहुदल र निर्दलको चुनावको बेलामा पनि सक्रिय थिएँ, २०४९ सालमा काठमाडौंको १६ नम्बर वडामा अध्यक्ष भएँ । मैले धेरै वर्ष जनप्रतिधिधि भएर जनताको सेवा गरें । म २०५४ सालदेखि पार्टीको जिल्ला कमिटीमा छु । ०७७ मा केन्द्रीय कमिटीमा मनोनित भएँ । काठमाडौं क्षेत्र नम्बर ७ बाट निर्वाचित सांसद हुँ । २०७६÷०७७ सालमा सहरी विकास राज्यमन्त्री भएर काम गरेको छु ।’ निष्ठावान कार्यकर्ताहरूलाई आफूलाई मत दिएर जिताउन पनि उनले आह्वान गरेका छन् ।
उनले नेपालमा धेरै दलको आवश्यकत्ता नै नरहेको पनि जिकिर गरे । उनले भने,‘नेपालमा दुई दल भए पुग्छ नेपालमा । यो देशमा एमालेले मात्रै समृद्धि र सुखी नेपालीको नारा साकार गर्नसक्छ, हाम्रो अध्यक्ष केपी ओली व्यक्ति होइन, विचार हो । ओलीलाई जनताले प्रत्यक्ष रुपमा चिनेका छन् ।’
उनले आफ्नो पार्टीको अध्यक्ष ओली समृद्ध नेपाल बनाउने अभियानमा लागेको पनि सुनाए । उनले भने, ‘७२ वर्षको कालखण्डमा, धेरै सरकार बने, धेरैजना प्रधानमन्त्री बन्नुभयो, तर हाम्रो अध्यक्ष ओली प्रधानमन्त्री बन्नुभयो, उहाँको पालामा के–के काम भयो ? तपाईँहरूले हेर्नुहोला । उहाँले साढे ३ वर्षको अवधिमा यो मुलुकको कायापलट गर्ने योजना अघि सार्नुभएको छ । ओलीको कार्यकालमा विकास निर्मँणसँग धेरै काम भएका छन् ।’
प्रमुख सत्तारूढ दल नेपाली कांग्रेसका नेता तथा सांसद राजेन्द्र केसीले पार्टीको १४औं महाअधिवेशनले मुलुकलाई समृद्धिको दिशामा अघि बढाउने नेतृत्व चयन गर्ने बताएका छन् ।
उनले भने, ‘मुलुकलाई दिशा दिनसक्ने र समृद्धिको दिशामा अघि बढाउने नेतृत्व आउनेमा हामी व्यग्र प्रतिक्षामा छौं । यो अधिवेशनले सवल नेतृत्व दिन सकोस् ।’ उनले आफूले यसपटक केन्द्रीय सदस्यमा उम्मेदवारी दिने पनि सुनाए ।
उनले अहिले एमाले, माओवादी केन्द्रको पनि अधिवेशन हुन गैरहेको भन्दै लोकतन्त्र बलियो बनाउनको लागि दलको अधिवेशन आवश्यक भएको सुनाए ।
उनले भने,‘अहिले सबै पार्टीको अधिवेशन हुँदैछ । सबै दलको चाहना भनेको मुलुकलाई समृद्ध बनाउनु नै हो । बहुदलीय प्रजातन्त्रमा धेरै पार्टी रहन्छन् । दलहरूले जनतालाई आफ्नो नीतिअनुसार आकर्षित गर्ने कुरा स्वभाविक नै हो । एमाले, माओवादी र राप्रपाले अहिले महाधिवेशन गर्दैछन् ।’
उनले नीति र नेतृत्वसँगै जानुपर्नेमा पनि जोड दिए । उनले सबै दलको गन्तव्य एउटै भएको तर बाटो फरक हुनसक्ने सुनाए ।
उनले आफूहरू महाधिवेशनको लागि सम्पूर्ण रुपले अघि बढिरहेको सुनाए । उने भने,‘केन्द्रीय अधिवेशन मंसिर २४ गते गर्दैछौं । लोकतन्त्रको सुन्दर पक्ष नै यही हो । लोकतन्त्रलाई संस्थागत गर्दै अघि बढेका छौं । राजनीतिक प्रणाली जसरी अघि बढ्छ, त्यहीअनुसार पार्टी अघि बढ्नुपर्छ । संघीयताअनुसार हामी १४औं महाधिवेशन गर्दैनौं ।
‘अहिले वडादेखि केन्द्रसम्मको अवस्था हेर्दा, ४ हजारभन्दा महाधिवेशन प्रतिनिधिहरू आउनुभएको छ । अधिकांश युवाहरू आउनुभएको छ । क्लष्टर छुट्याएका छौं । सबैको प्रतिनिधित्व होस भनेर विधानमा स्पष्ट लेखिएको छ। हामी त्यहीअनुसार अघि बढ्छौं ।’
नेकपा (माओवादी केन्द्र) का नेता झक्कुप्रसाद सुवेदीले पार्टीमा अहिले अध्यक्ष पुष्पकमल दाहालको विकल्प नभएको बताएका छन् । उनले पार्टी र देश दुवैको नेतृत्व गर्न प्रचण्डको नेतृत्व आवश्यक रहेको सुनाए ।
उनले भने,‘बीपी कोइराला २५ देखि ३० वर्षसम्म पार्टी सभापति हुनुभयो । एउटा व्यक्तिले लामो समयसम्म नेतृत्व गर्नुहुन्न भन्नुहँदैन् । म दुई दशकदेखि केन्द्रीय सदस्य छु । अध्यक्ष भएको पनि दाहाल २१ वर्ष भयो । पार्टी र देशको नेतृत्व गर्न दाहाल नै उपयुक्त हुनुहुन्छ। प्रचण्डलाई टक्कर दिने नेता माओवादीमा अहिले कोहीपनि हुनुहुन्न, भोलिका दिनमा आउनुभयो भने छलफल हुन्छ । तर प्रचण्डले सापेक्षिक रुपमा सही नेतृत्व गर्नुभएको छ । प्रचण्डको विकल्प पार्टीमा छैन ।’
उनले आफ्नो पार्टी राष्ट्रिय सम्मेलनको तयारीमा अघि बढिसकेको सुनाए । उनले भने, ‘हामी राष्ट्रिय सम्मेलन भव्य रुपमा सम्पन्न गर्न गइरहेका छौं । यही मंसिर ४ गते एकै दिन वडा सम्मेलन सफलतापूर्वक सम्पन्न भयो । अब मंसिर ११ गते पालिकाको सम्मेलन हुँदैछ । संगठन, सम्पर्क मञ्चको पनि एकदैदिन सम्मेलन हुन्छ ।’
उनले आगामी पुस ११, १२ र १३ गते राष्ट्रिय सम्मेलन गरिनेगरि अघि बढेको सुनाए । उनले भने, ‘हामीले । माओ दिवस दिनको राष्ट्रिय सम्मेलनको उद्घाटन गर्दैछौं । समयको हिसाबले अझै एक महिना छ । पार्टीले तल्लो तहदेखि प्रचार गरिरहेको छ ।’ आफ्नो पार्टीको अधिवेशनको बारेमा त्यति चर्चा नहुनुको कारण सर्वसम्मत् रुपमा वडादेखि नै नेतृत्व चयन गरिनुनै भएको सुनाए ।
उनले कांग्रेसको महाधिवेशनको बढि चर्चा हुनुको कारण शेरबहादुर देउवा र रामचन्द्र पौडेल समूहले गर्दा केन्द्रदेखि तलसम्म चुनाव भएकोले प्रतिष्पार्ध देखिएको सुनाए । उनले आफ्नो पार्टीले संविधानको मर्म र भावनाअनुसार कदम चालेको र निर्णय लिएको पनि सुनाए । उनले भने,‘हामी त नगरपालिकामा पनि महिला मेयर नै हुनुपर्छ भन्दैछौं । समाजको बनोटअनुसार पार्टी बनाउनुपर्छ । वडादेखि केन्द्रसम्म त्यहीअनुसार नेतृत्व बनाउनुपर्छ । ३५ प्रतिशत महिला हुनुपर्छ । २० प्रतिशत युवा हुनुपर्छ । विधान बनिसकेको छ ।’
उनले यही मंसिर २५ गते प्रदेश सम्मेलन हुने र त्योपनि विधानअनुसार नेतृत्व आउने सुनाए। उनले एमालेको महाधिवेशनको कुरा गर्दा विचारको कुरा त्यहाँ नभएको आरोप लगाए । उनले भने,‘हामीले एमालेको दस्तावेज हेरेका छैनौं । अहिलेसम्म राजनीतिक दस्तावेज बाहिर आएको छैन् । आगामी कार्यक्रम के हो ? एक वर्षको के हो ? दश वर्षको के हो ? कार्यनीति र रणनीति के हो ? यो हामीले एमालेको दस्तावेज हेरेका छैनौं । यता कांग्रेसमा विचारको मतभेद छैन् । एमालेमा वैचारिक मतभेद देखिन्छ । घनश्याम भुसालले फरक मत ल्याएको देखेका छौं । पत्रपत्रिकामा देखेका छौं । तर, बाहिर आएको छैन् ।’
उनले एमालेको १०औं महाधिवेशनपछि पनि केपी शर्मा ओली नै अध्यक्ष हुने सुनाए । उनले भने,‘अहिले ओलीले नै चुनाव जित्नुहुन्छ । माधव नेपालहरू त्यहाँ भएको भए रामाईलो हुन्थ्यो । विचार लागु गर्ने नेतृत्व हुनुपर्दथ्यो । अहिले त्यहाँ वैचारिक बहस हुने सम्भावना देखिँदैन ।’

प्रतिक्रिया दिनुहोस्