राहत र पुनस्र्थापना प्याकेज घोषणा गर्न किसानको माग «

राहत र पुनस्र्थापना प्याकेज घोषणा गर्न किसानको माग

बाढी, पहिरो र डुबानबाट प्रभावित सुदूरपश्चिमका किसानहरुले प्रदेश सरकार समक्ष राहत र पुनस्र्थापनाको माग गरेका छन् ।
सुदूरपश्चिम प्रदेशका कृषक संगठनहरुले बाढी पहिरो पीडित किसानहरुका लागि तत्काल राहत र पुनस्र्थापनाका कार्यक्रम घोषणा गर्न माग गरेका छन् ।
भूमि व्यवस्था, कृषि तथा सहकारी मन्त्री विनिता चौधरीलाई ध्यानाकर्षण पत्र बुझाउँदै राहत र क्षतिपूर्तिको माग गरिएको हो ।
ज्ञापन पत्र बुझाउँदै कृषक संगठनहरुले कृषि संकटग्रस्त क्षेत्र घोषणा, प्राकृतिक विपत्तिबाट प्रभावित घरधुरीको यथार्थ तथ्यांक संकलन, क्षतिपूर्ति तथा किसानलाई तत्काल उचित राहत, घाइतेहरुको स्वास्थ्योपचार तथा बसोबास गुमाएकालाई उचित बसोबासको व्यवस्था, कृषि पेशा सुरक्षाको लागि बाली र पशुधन बिमा कार्यक्रम प्रभावकारी बनाउन माग गरेका छन् ।
राष्ट्रिय कृषक समूह महासंघ नेपाल सुदूरपश्चिम प्रदेश अध्यक्ष प्रकाशबहादुर थापाले बाढी पहिरो पीडित किसानका लागि तत्काल प्रदेश सरकारले राहत प्याकेज घोषणा गर्नुपर्ने बताए ।
ज्ञापनपत्र बुझ्दै मन्त्री चौधरीले क्षतिको विवरणसंकलन गरिरहेको र तथ्यांक आइसकेपछि किसानका लागि राहत प्याकेज र हिउँदे बालीको लागी अनुदानमा बिउविजन तथा मलखाद उपलब्ध गराउने बताइन् ।
राष्ट्रिय कृषक समूह महासंघ नेपाल, खाद्य अधिकार सञ्जाल, केरा उत्पादन तथा प्रवद्र्धन जिल्ला सहकारी कञ्चनपुर, मुख्यमन्त्री नमुना कृषि गाउँ (केरा) कृषक समन्वय समिति कञ्चनपुर, गैसस महासंघ नेपाल, भूमि अधिकार मञ्च कैलालीलगायत कृषि संघ संगठनहरुले संयुक्त रुपमा ज्ञापनपत्र बुझाएका थिए ।
गत असोज ३१ गतेदेखि परेको मनसुनपछिको वर्षाले कैलाली कञ्चपुरमा मात्रै ३ अर्बको धानबालीमा क्षति गरेको जनाइएको छ ।

प्रतिक्रिया दिनुहोस्