शिक्षा क्षेत्रमा आमूल परिवर्तन गर्नका लागि आफ्नो प्रयत्न रहने शिक्षा मन्त्रीको भनाइ «

शिक्षा क्षेत्रमा आमूल परिवर्तन गर्नका लागि आफ्नो प्रयत्न रहने शिक्षा मन्त्रीको भनाइ

नवनियुक्त शिक्षा, विज्ञान तथा प्रविधिमन्त्री देवेन्द्र पौडेलले शिक्षा क्षेत्रमा आमूल परिवर्तन गर्नका लागि आफ्नो प्रयत्न रहने बताए ।
शुक्रबर मन्त्रालयमा आफ्नो कार्यभार सम्हाल्दै मन्त्री पौडेलले शिक्षा क्षेत्रमा देखिएका समस्या समाधान गर्दै आमुल परिवर्तनका लागि आफ्नो प्रयत्न रहने बताए । उनले आफूले देश र जनताको पक्षमा शिक्षा क्षेत्रबाट हुनुपर्ने काम गर्ने र अहोरात्र खटेर परिणाम निकाल्ने बताए । उनले भने, ‘शिक्षाका समस्याहरु छन् । शिक्षा मन्त्रालयले पहिलेदेखि नै केही सुधार गर्ने प्रयत्न गरेको छ । म मेरो आफ्नो लागि वा कसैको लागि व्यक्तिगत प्रयोजनको लागि भन्दा पनि शिक्षामा आमूल परिवर्तन गर्ने प्रयत्न गर्नेछु र त्यसको साथसाथै देश र जनताको पक्षमा शैक्षिक क्षेत्रबाट हुनुपर्ने कामहरुको निम्ति अहोरात्र खटेर परिणाम निकाल्ने प्रयत्न गर्नेछु ।’
मन्त्री पौडेलले समाजवाद उन्मुख राज्य प्रणाली स्थापनाका लागि शिक्षा क्षेत्रबाट गर्नुपर्ने शैक्षिक सुधार, आवश्यक जनशक्ति उत्पादन र नीतिगत सुधार गर्नका लागि पनि आफ्नो तर्फबाट सकेको काम गर्ने प्रतिबद्धता व्यक्त गरे । उनले भने, ‘संविधानमा समाजवाद उन्मुख राज्य प्रणाली भनेका छौं । समाजवाद उन्मुख राज्य प्रणालीलाई आवश्यक पर्ने शैक्षिक र शिक्षालयहरुको सुधारको निम्ति आवश्यक जनशक्तिहरुको उत्पादन गर्नको निम्ति नीतिगत सुधारहरु गर्ने र उत्पादित भएका जनशक्तिहरुलाई विभिन्न प्रकारका काम रोजगारमा जोड्ने त्यसका साथसाथै कतिपय अन्तर्राष्ट्रिय संघ, संस्थाहरुसँग पनि सम्बन्धन, पहल, कदमीहरु गरेर समग्र शिक्षा क्षेत्रलाई गति दिने प्रयत्न मेरो आफ्नो तर्फबाट हुनेछ ।’
उनले शैक्षिक बेरोजगारको समस्या समाधानका निम्ति आफ्नो अधिकतम प्रयत्न रहने उल्लेख गरे ।

प्रतिक्रिया दिनुहोस्