सेयर बजारमा उच्च गिरावट «

सेयर बजारमा उच्च गिरावट



वित्तीय प्रणालीमा तरलता अभाव बढेसँगै सेयर बजारमा पनि उच्च गिरावट आउन थालेको छ । केही समययता निरन्तर ओरालो लागेको सेयर बजार परिसूचक चार महिनापछि २७ सय अंकभन्दा तल झरेको छ ।
गत चैतमा पहिलो पटक नेप्से सूचक २७ सय अंकमा पुगेको थियो । त्यसपछि क्रमशः बढ्दै साउन अन्तिममा ३२ सय नजिकसम्म पुगेर रेकर्ड कायम गरेको थियो ।
नेपाल राष्ट्र बैंकले बैंक तथा वित्तीय संस्थाहरुलाई सेयर खरिदमा कडाइ गर्नुका साथै मौद्रिक नीतिमार्फत सेयर धितो कर्जामा समेत सिमा निर्धारण गरेको छ । यसैगरी पछिल्लो समयमा बैंकिङ क्षेत्रमा तरलताको अभाव भई व्याजदर समेत वृद्धि हुन थालेपछि सेयर बजार प्रभावित भएको छ । कोभिड महामारी र लकडाउनलगायतका कारण अन्य क्षेत्रबाट सेयर बजारमा आएको लगानी पनि फिर्ता हुन थालेको अनुमान गरिएको छ । कोभिड महामारीका कारण लगानीका क्षेत्रहरु प्रभावित हुँदा अन्य क्षेत्रबाट समेत लगानी सेयर बजारमा आएको थियो ।
सरकारले समयमै बजेट ल्याउन नसक्नुका साथै विदेशबाट भित्रने रेमिट्यान्स समेत गिरावट आउँदा बैंकहरुमा तरलता अभाव भएको छ । यसैगरी मौद्रिक नीतिले बैंकहरुमा सिसिडि अनुपातको व्यवस्था खारेज गर्दै सिडी अनुपातको व्यवस्था लागू गर्दा पनि तरलताको रकम अभाव भएको छ ।
तरलता अभावका कारण बैंकहरुले निक्षेपको व्याजदर दोहोरो अंकमा पु¥याएका छन् भने अन्तर बैंक सापटीदर समेत ५ प्रतिशत हाराहारीमा कायम भइसकेको छ ।
नेपाल स्टक एक्सचेन्ज (नेप्से) सोमबार ७३.५ अंकले घटेर नेपाल स्टक एक्सचेन्ज (नेप्से) सूचक २६८५.४१ अंकमा झरेको छ । सोमबार कारोबार भएका अधिकांश कम्पनीको मूल्य घटेसँगै सबै समूहगत परिसूचकहरु पनि ओरालो लागेका छन् । यसदिन बैंकिङ ४४.०८, व्यापार ४१.२६, होटल तथा टुरिजम ९०.१२, विकास बैंक १९४.१, जलविद्युत ८०.६१ अंकले घटेको छ ।
यसैगरी फाइनान्स ११२.९६, निर्जीवन बिमा ४३९.२८, उत्पादन ४६.०२, लघुवित्त १३२.४९, जीवन बिमा ४३७.१७, म्युचुअल फण्ड ०.१६ र लगानी समूह २.८६ अंकले घटेका छन् ।
नेप्सेमा आएको गिरावटसँगै कारोबार रकम पनि घटेको छ । सोमबार २२७ कम्पनीका एक करोड ४ लाख कित्ता सेयर किनबेच हुँदा ५ अर्व १२ करोड रुपैयाँ बराबरको कारोबार भएको छ ।

प्रतिक्रिया दिनुहोस्