कर्मचारीको आन्दोलनले तलब दिन कानुनी समस्या :महाप्रबन्धक

नेपाल वायुसेवा निगमले आफ्ना कर्मचारीलाई चाडपर्वको मुखैमा तलबभत्ता दिन कानुनी अप्ठ्यारो परेको बताएको छ ।
निगमका महाप्रबन्धक डिमप्रसाद पौडेलले बिहीबार विज्ञप्ति जारी गर्दै असार १८ गतेयता निगमभित्र जारी कर्मचारी आन्दोलनले बजेट पारित हुन नपाएकाले उनीहरुलाई नै तलबभत्ता दिन अप्ठ्यारो भएको बताएका हुन् ।
निगममा पौडेलविरुद्ध कर्मचारीहरु निरन्तर आन्दोलन गरिरहेका छन् । विशेषगरी निगममा कार्यरत तीन कर्मचारी संगठनले कम्पनीको प्रस्तावित प्रबन्धपत्र र नियमावलीको मस्यौदाको तीव्र विरोध गरेका हुन् ।
महाप्रबन्धक पौडेलले निगमलाई निजीकरण गर्न खोजेको भन्दै उनीहरुले विरोध गर्दै आएका छन् । सोही विरोधलाई कारण देखाउँदै दसैंको मुखमा कर्मचारीको तलब रोक्ने संकेत पौडेलले विज्ञप्तिमा गरेका छन् । उनले आन्दोलनका कारण निगमका धेरै काम प्रभावित भएको दावी पनि गरेका छन् ।
निगमले अनुमति पाएको गौतम बुद्ध अन्तर्राष्ट्रिय विमानस्थल तथा पोखरा अन्तर्राष्ट्रिय विमानस्थलको ग्राउण्ड हेण्डलिङ सेवाको लागि आवश्यक तयारीको कार्यमा बाधा पुगेको जनाएको छ । त्यस्तै, निगममा आईएफआरएस प्रणाली लागू गर्ने सम्बन्धमा गर्नुपर्ने तयारीको काम रोकिएको निगमको भनाइ छ ।
अनलाइन टिकट प्रणालीसमेत हुने गरी पीएसएस लागू गर्ने सम्बन्धमा गरिराखिएको तयारीको काम रोकिएको छ भने ए ३२० को इन्जिन मर्मतको लागि एमआरओ छान्नेसम्बन्धी सम्पूर्ण प्रक्रिया ठप्प भएको छ ।
यसबाहेक अर्थ मन्त्रालयको निर्देशनबमोजिम गर्नुपर्ने निगमको अद्यावधिक डीडीएसम्बन्धी काम तथा आव २०७८÷०७९ को बजेट तथा वार्षिक कार्यक्रम तर्जुमाको काम, महालेखा परीक्षकको प्रतिवेदनमाथि छलफल र जवाफ दिने कार्य, निगमको ऋण दायित्व भुक्तानी गर्न अर्थमन्त्रलयको समन्वयमा गरिने सम्पूर्ण कामहरु, निगम व्यवस्थापनले तयार गरी सञ्चालक समितिले स्वीकृत गरेको १० वर्षे व्यावसायिक योजना कार्यान्वयन गरी आन्तरिक तथा अन्तर्राष्ट्रिय उडानको लागि विमान संख्या थप गर्न नेपाल सरकारसँग समन्वय गर्ने सम्बन्धी सम्पूर्ण काम ठप्प भएको पौडेलको भनाइ छ ।