इन्टरनेटबिना नै पैसा तिर्न मिल्ने ‘नमस्ते पे’ सञ्चालनमा «

इन्टरनेटबिना नै पैसा तिर्न मिल्ने ‘नमस्ते पे’ सञ्चालनमा

इन्टरनेटबिना नै पैसा तिर्न मिल्नेगरी डिजिटल प्रणाली नमस्ते पे आजबाट सञ्चालनमा आएको छ। नेपाल टेलिकम र राष्ट्रिय वाणिज्य बैंकको संयूक्त लगानीमा नमस्ते पे सञ्चालनमा आएको हो ।
छुट्टै कम्पनी नेपाल डिजिटल पेमेन्ट कम्पनीमार्फत नमस्ते पे सेवा सञ्चालनमा ल्याइएको हो । सो कम्पनीका सीईओ कृष्ण भण्डारीले हालका लागि सीमित सेवासहित नमस्ते पे सञ्चालनमा ल्याइएको र क्रमिक रुपमा सेवाको दायरा बढाउँदै लगिने बताए । यूएसएसडी सेवा अन्तर्गत हाल मोबाइल फोनबाट विभिन्न डेटा प्याक लिएजस्तैगरी कोड थिचेर आफूले तिर्न चाहेको रकम भुक्तानी गर्न मिल्नेछ । यस सेवालाई पनि क्रमशः थप विविधिकरण गर्दै लगिने कम्पनीले जनाएको छ ।
पहिलो चरणमा यूएसएसडी कोडका आधारमा नेपाल टेलिकमको मोबाइल टपअप, विद्युत् महसुल तथा खानेपानी महसुल भुक्तानीको सेवाहरू उपलब्ध हुनेछन् । यूएसएसडी कोडमार्फत भुक्तानी गर्न इन्टरनेट चाहिँदैन । कम्पनीले प्रदान गर्ने कोडका आधारमा रकम भुक्तानी गर्न मिल्नेछ । यूएसएसडी कोडमार्फत भुक्तानी गर्दा मोबाइलमा भएको ब्यालेन्स पनि काटिँदैन ।
यसैगरी नमस्ते पे मोबाइल वालेटमा पैसा लोड गर्नको लागि नेपाल बैंक, राष्ट्रिय वाणिज्य बैंकसहित करीब ९ वटा बैंकहरूको खाता लिंक गरी पैसा लोड गर्न सकिनेछ । बाँकी बैंकहरूबाट पैसा लोड गर्नको लागि क्रमशः व्यवस्था गर्दै लगिने कम्पनीले जनाएको छ । नमस्ते पे वालेट छुट्टै मोबाइल वालेट सेवा हो । टेलिकमको मोबाइल ब्यालेन्सलाई नै पैसाको रूपमा उपयोग गर्न सकिँदैन । नमस्ते पे वालेटमा बैंक वा एजेण्ट नेटवर्कमार्फत रकम लोड गरेर मात्र विद्युतीय भुक्तानीको लागि प्रयोग गर्न सकिन्छ ।
मोबाइल वित्तीय सेवाको लागि बैंक, मर्चेन्ट, युटिलिटी सेवा प्रदायक, अनलाइन व्यवसाय सञ्चालक लगायतका विविध साझेदार र सरोकारवालाहरूसँग व्यावसायिक, वित्तीय सहकार्य तथा प्राविधिक अन्तरआवद्धताको विकास एवम् परीक्षणसमेत गर्नुपर्ने भएकोले सम्भावित सबै किसिमका सेवाहरू एकैपटक सञ्चालन गर्न नसकिएको कम्पनीले जनाएको छ ।

प्रतिक्रिया दिनुहोस्