सुनकोशी तेस्रो आयोजना निर्माणको प्रस्ताव बंगलादेशलाई «

सुनकोशी तेस्रो आयोजना निर्माणको प्रस्ताव बंगलादेशलाई

नेपालले बंगलादेशलाई ६८३ मेगावाटको सुनकोशी तेस्रो जलविद्युत आयोजना निर्माणका लागि प्रस्ताव गरेको छ । मंगलबार बसेको नेपाल र बंगलादेशबीच ऊर्जा सहकार्यका लागि गठित सचिवस्तरीय संयुक्त सञ्चालन समिति (जेएससी)को बैठकले सुनकोशी तेस्रो बंगलादेशलाई निर्माण गर्न दिने प्रस्ताव अनुमोदन गरेको हो ।
सोमबार बसेको सहसचिवस्तरीय संयुक्त कार्यकारिणी समिति (जेडब्लूसी) को बैठकले सुनकोशी तेस्रो र ६ सय मेगावाटको खिम्ती शिवालय जलविद्युत आयोजना निर्माणका लागि बंगलादेशलाई प्रस्ताव गरेको थियो । भर्चुअल बैठकको नेतृत्व नेपालको तर्फबाट ऊर्जा, जलस्रोत तथा सिँचाइ मन्त्रालयका सचिव देवेन्द्र कार्की र बंगलादेशको तर्फबाट शक्ति, ऊर्जा र खनिज मन्त्रालयको विकासतर्फका सचिव मोहमद हबिबुर रहमानले नेतृत्व गरेका थिए । ऊर्जा मन्त्रालयका सहसचिव एवं प्रवक्ता मधु भेटुवालले पाँच जलविद्युत आयोजनमध्ये पहिलो चरणमा सुनकोशी तेस्रोको अघि बढाउने गरी आगामी डिसेम्बरमा दुवै पक्षबाट भ्रमण गर्ने सहमति भएको जानकारी दिए ।
सन् २०१८ मा दुई देशबीच ऊर्जामा सहकार्यको सम्झौता भएपछि बंगलादेशले नेपालसँग एउटा परियोजना निर्माण गर्ने बताउँदै प्रस्ताव गर्न आग्रह गर्दै आएको थियो । काभ्रे र रामेछापको दोसाँधमा निर्माण हुने सुनकोशी–तेस्रो जलविद्युतको पूर्वसम्भाव्यता अध्ययन सन् १९८३ मै गरेको थियो भने जाइकाले नै जलाशययुक्त आयोजनाहरुको विकास क्षेत्रहरुमध्येबाट उत्कृष्ट छनोट गर्दा मध्यमाञ्चल विकास क्षेत्रबाट यो आयोजना छनोट गरेको थियो । लोडसेन्टर काठमाडौँ बाट ७० किलोमिटर दुरीमा रहेको आयोजनाबाट उत्पादित बिजुली काठमाडांैका साथै ढल्केबरसम्म लैजान सकिने हुनाले यसलाई राम्रो आयोजनाको रुपमा लिइएको छ । विद्युत विकास विभागले अध्ययन गरिरहेको सो आयोजनाको अध्ययन अन्तिम चरणमा पुगेको छ ।
यसैगरी बैठकमा नेपालबाट बंगलादेशमा विद्युत व्यापार गर्ने आवश्यक तयारीका लागि नेपाल विद्युत प्राधिकरण र बंगलादेश पावर डेभलपमेन्ट बोर्डलाई तोकेको छ । बैठकमा सहभागी एक अधिकारीका अनुसार, हाल बंगलादेशले पीटीसीमार्फत दुई सय मेगावाट बिजुली आयात गरिरहेकोमा नेपालबाट पीटीसी र पीटीसीबाट बंगलादेश आयात गर्ने वा दुई देशबीच भारतसँग कूटनीतिक पहल गरी नेपाल–भारत–बंगलादेशबीच त्रिपक्षीय बैठकमार्फत डेडिकेटेड प्रसारण लाइन निर्माण गरी अघि बढाउने दुई विकल्पबारे छलफल भएको छ । विद्युत व्यापारबारे नेपाल विद्युत प्राधिकरण तथा बंगलादेश पावर डेभलपमेण्ट बोर्डबीच यसका कानुनी, खरिद लगायतमा विषयमा छलफल अघि बढाउनेछन् ।
बैठकको क्रममा नवीकरणीय ऊर्जाको प्रवद्र्धन, सोलार होम सिस्टम र ऊर्जा दक्षता क्षेत्रमा नेपालको वैकल्पिक ऊर्जा प्रवद्र्धन केन्द्र र बंगलादेशको दिगो र नवीकरण ऊर्जा विकास प्राधिकरण (एसआरईडीए) बीच प्रविधि तथा सीप आदानप्रदान गर्ने सम्बन्धमा सहमति भएको मन्त्रालयले जनाएको छ । साथै दुई देशबीच आ–आफ्नो ऊर्जा क्षेत्रमा विद्यमान विशेषज्ञताका आधारमा जनशक्तिको क्षमता अभिवृद्धि गर्न, अनुभव आदानप्रदान गर्न उपयुक्त कार्यक्रम सञ्चालन गर्ने र आवश्यकताअनुसार समझदारी गर्ने सहमति समेत भएको मन्त्रालयले जनाएको छ ।

प्रतिक्रिया दिनुहोस्