बंगलादेशसँगको मैत्रीपूर्ण फुटबल निराशाजनक

बंगलादेश महिला फुटबल फिफा वरियतामा नेपालभन्दा तल छ । दशरथ रंगशालामा नेपाली महिला फुटबल टोलीको क्षमता बढाउने र अभ्यस्त बनाउनका लागि डाकिएको बंगलादेशसँग अपेक्षा अनुसारको खेल देखाउन सकेन । जुन अहिले आलोचना भइरहेको छ ।
दुई मध्येको पहिलो मैत्रीपूर्ण खेलमा नेपालले सुखद् नतिजा निकाले पनि दोस्रो खेलमा भने नेपालले निराशाजनक बराबरी खेल्दा एएफसी छनोट खेलका लागि तयारी अपूरो देखिएको छ । नेपालले आयोजना गरेका दुई मैत्रीपूर्ण खेल मध्ये पहिलो खेलमा नेपालले बंगलादेशलाई २–१ ले हरायो । नतिजा नेपालको पक्षमा भए पनि बंगलादेशले फर्काएको एक गोल उसका लागि ऐतिहासिक बन्यो । किन भने नेपालसँग अहिलेसम्म भएका ९ भेटमा बंगलादेशले दोस्रो गोल फर्काएको थियो । त्यसो त यसअघि हुने भेटमा नेपालले फराकिलो अन्तरले बंगलादेशलाई पराजित गर्दै आएको थियो
। एएफसी एसियन कप छनोट खेल्न लागेको नेपाली महिला टोलीबाट यो किसिमको नतिजामात्र अपेक्षा गरिएको थिएन, दशरथ रंगशालामा उत्कृष्ट खेल देखाउँदै हङकङ र फिलिपिन्ससँगको खेलमा कडा चुनौती दिनेमा आम समर्थकको विश्वास थियो । तर बंगलादेशसँगको खेलपछि भने नेपाली समर्थकले अपेक्षा अनुसारको प्रदर्शनको आशा गर्नु व्यर्थ हुने देखिन्छ ।
आइतबार नेपालले गोल रहित बराबरीमा रोकिँदा बंगलादेशको टोलीका लागि अर्को नयाँ इतिहास बन्यो । दक्षिण एसियाको बलियो प्रतिद्वन्द्वमा गनिने नेपाललाई रोक्दै बंगलादेशले पहिलो भन्दा दोस्रो खेलमा सुधारिएको खेल देखायो । यही अपेक्षा नेपाली टोलीमा पनि गरिएको थियो । तर पहिलो भन्दा पनि दोस्रो खेलमा नेपाली महिला टोलीले सोचे जस्तो प्रदर्शन गर्न सकेन । अपेक्षा अनुसारको खेल देखाउन नसकेको पूर्व प्रशिक्षक हरि खड्काले औंल्याए र एएफसी छनोट खेलमा कमीकमजोरी सुधार गर्दै खेल्ने बताए ।
त्यसो त अहिले नेपाली टोलीमा मुख्य स्ट्राइकर सावित्रा भण्डारी उपस्थित छैनन् । घुँडाको शल्यक्रिया गराएकी सावित्राको अनुपस्थितीमा मैत्रीपूर्ण खेल्दा नेपाली अपेक्षा अनुसार खेल्न सकेन । यही क्रममा अर्की नियमित खेलाडी पुनम जर्घामगरलाई पनि नेपाली टोलीले गुमाउन प¥यो । खेलअघि गरिएको स्वास्थ्य परिक्षणमा नेपाली टिमकी नियमित रक्षक पुनम जर्घा मगरको मुटुमा समस्या देखिएको थियो । दुई मैत्रिपूर्ण खेलबाट दुई टोलीको तुलना गर्दा बंगलादेशले नेपाल भ्रमणलाई सार्थक बनायो भने नेपालले मैत्रीपूर्ण खेलबाट सुधारको संकेत देखाउन केही चुकेको छ । नतिजा र दक्षिण एसियाको साख जोगाउन नेपाली महिला टोलीलाई एएफसी छनोट खेलमा अझै कसरत गर्नुपर्ने आवश्यक छ ।