मानुषी लघुवित्तको आईपीओ साउन २७ गतेबाट «

मानुषी लघुवित्तको आईपीओ साउन २७ गतेबाट

मानुषी लघुवित्त वित्तीय संस्थाले साउन २७ गतेदेखि आईपीओ निष्कासन गर्ने भएको छ । कम्पनीले ३ लाख ९३ हजार ७५० कित्ता आईपीओ निष्कासन गर्न लागेको हो । जसमध्ये ५ हजार ४६९ कित्ता कर्मचारीको लागि, १९ हजार ६८८ कित्ता सामुहिक लगानी कोषको लागि छुट्याएको र बाँकी रहेको ३ लाख ६८ हजार ५९३ कित्ता सर्वसाधारणको लागि निष्कासन गर्नेछ ।
हाल कम्पनीको चुक्तापुँजी ७ करोड रहेको छ । आईपीओ बाँडफाँट पश्चात उक्त पुँजी १० करोड ९३ लाख ७५ हजार पुग्नेछ । कम्पनीले निष्कासन गर्न लागेको आईपीओलाई केयर रेटिङ नेपालले केयर एनपी बी प्लस रेटिङ प्रदान गरेको छ ।
यस्तो रेटिङले समयमा वित्तीय दायित्व बहन गर्ने क्षमतामा उच्च जोखिम रहेको देखाउँछ । आवेदकले यस आईपीओमा साउन ३१ गतेसम्म आवेदन गर्न सक्नेछन् । सो समय अवधिमा बिक्री नभएमा आवेदकले भदौ ९ गतेसम्म आवेदन दिन सक्नेछन् ।
आईपीओ निष्कासन गर्नका लागि कम्पनीले नियामक निकाय नेपाल धितोपत्र बोर्डबाट असार ३१ गते स्वीकृति पाएको हो । नेपाल धितोपत्र बोर्डबाट स्वीकृति पाएका सम्पूर्ण आस्बा सदस्य बैंक तथा वित्तीय संस्थाहरुबाट आवेदन दिन सकिनेछ ।
साथै मेरो सेयरबाट पनि आईपीओमा आवेदन दिन सकिने व्यवस्था छ । कम्पनीको आईपीओ बिक्री प्रबन्धकमा नेपाल एसबिआई मर्चेण्ट बैंकिङ लिमिटेड रहेको छ । कम्पनीले गत आवको चौथो त्रैमासमा २ करोड ३३ लाख खराब कर्जा संकलन गरेको छ । कम्पनीले अघिल्लो आवको चौथो त्रैमासमा ४६ लाख ९४ हजार खराब कर्जा उठाएको थियो ।
नाफा भने अघिल्लो आवको तुलनामा गत आवमा ९२ प्रतिशतले कमी आएको छ । कम्पनीले अघिल्लो आवमा १ करोड २१ लाख नाफा कमाएकोमा गत आवमा ४ लाख ७९ हजारमा सीमित भएको हो । कम्पनीले सम्भावित जोखिम बापतको व्यवस्थामा ४ करोड ५१ लाख छुट्याएको छ ।

प्रतिक्रिया दिनुहोस्