ऊर्जामन्त्रीद्वारा कार्यदल गठन «

ऊर्जामन्त्रीद्वारा कार्यदल गठन

सिँचाईमन्त्री भुसाल पदभार ग्रहण, नवनियुक्त ऊर्जा, जलस्रोत तथा सिँचाईमन्त्री पम्फा भुसाल मन्त्रालयमा आफनो पदभार ग्रहण गर्नुहुँदै तस्वीर : रत्न ७नतसेष्ठ/ रासस


नवनियुक्त ऊर्जा, जलस्रोत तथा सिँचाइ मन्त्री पम्फा भुसालले पदभार ग्रहण गर्दै जलविद्युत् र प्रसारण लाइन आयोजनाको प्राथमिकीकरण गर्न कार्यदल गठन गरेकी छिन् ।
ऊर्जा मन्त्रालय र यससँग सम्बन्धित विभिन्न निकायहरुले धेरै आयोजनाहरुको अध्ययन गरिरहेकोमा मन्त्री भुसालले पहिलो निर्णयको रुपमा प्राथमिकीकरणका लागि कार्यदल गठन गर्ने निर्णय गरेकी हुन् । ऊर्जा मन्त्रालयका सह–सचिव मधु भेटुवालको संयोजकत्वमा गठित कार्यदलमा अर्थ मन्त्रालय र राष्ट्रिय योजना आयोगका प्रतिनिधिका साथै विद्युत् प्राधिकरणको वित्तीय विश्लेषक र विद्युत् विकास आयोजना महाशाखाका उपमहानिर्देशक सदस्य छन्
हाल विद्युत् विकास विभाग, नेपाल विद्युत् प्राधिकरण, राष्ट्रिय ग्रीड कम्पनी, जलविद्युत् लगानी तथा विकास कम्पनी, उत्पादन कम्पनी लगायतले जलविद्युत् र प्रसारण लाइनका परियोजनाहरुको अध्ययन गरिरहेको छ भने ऊर्जा मन्त्रालयले यी निकायबाट कुनै परियोजनाको लागि स्रोत उपलब्ध गराउन अनुरोधपछि अर्थ मन्त्रालयलाई पठाउने पत्र पठाउने गरेको छ ।
परियोजनाको अवस्थिति, रोजगारीको सम्भावना, क्षेत्रीय सन्तुलन, वातावरणीय पक्ष, माग र आपूर्तिबीचको सन्तुलन, व्यापार, प्रसारण लाइनको अवस्थालगायतको विश्लेषण गरी परियोजनाहरु प्राथमिकीकरण गर्न मन्त्री भुषालको पदबहालीको क्रममा पहिलो निर्णय गरिएको कार्यदल संयोजक एवं प्रवक्ता भेटुवालले जानकारी दिए । “अर्थ मन्त्रालयले पैसा माग्दा प्रत्येक पटक प्राथमिकताको आधार खोज्ने गरेको छ, सबै परियोजनामा बजेट व्यवस्थापन हुन सक्दैन पनि” उनले भने, “स्वदेशी लगानीका साथै द्विपक्षीय वा बहुपक्षीय विकास साझेदारहरुबाट हुन सक्ने स्रोत व्यवस्थापनको विश्लेषण गरेर प्रतिवेदन तयार गर्ने गरी कार्यदल गठन गरिएको छ ।”
पदबहालीपछि बोल्दै मन्त्री भुषालले कहिल्यै लोडसेडिङ नहुने गरी र बिजुली बत्ती बाल्न पाउनेहरुलाई पहुँच चाडो पु¥याउने गरी काम गर्न निर्देशन दिइन् । कृषि प्रधान देशमा सिँचाइको ठूलो समस्या रहेको बताउँदै १२ महिना सिँचाइ पु¥याउने गरी परियोजना अघि बढ्नुपर्ने उनको भनाइ थियो ।

प्रतिक्रिया दिनुहोस्