सिरिजङ्घा गाउँपालिकाद्वारा स्वास्थ्यकर्मीलाई मासिक १५ हजार प्रोत्साहन «

सिरिजङ्घा गाउँपालिकाद्वारा स्वास्थ्यकर्मीलाई मासिक १५ हजार प्रोत्साहन


जिल्लाको सिरिजंघा गाउँपालिकाले कोभिड–१९ रोकथाम तथा नियन्त्रणका लागि स्वास्थ्यकर्मीलाई प्रोत्साहान रकम प्रदान गर्ने निर्णय गरेको छ । गाउँपालिकाको सोमबार बसेको बैठकले गाउँपालिका मातहतका १० वटै स्वास्थ्य संस्थामा कार्यरत स्वास्थ्यकर्मीलाई मासिक १५ हजार रुपैयाँ प्रोत्साहन उपलब्ध गराउने निर्णय गरेको हो । यद्यपि स्वास्थ्य संस्थामा फिवर क्लिनिक अनिवार्य छ । यसैगरी वडा नं.–३ सिकैचा ओसेस्थित सामुदायिक स्वास्थ्य एकाइ र वडा नं.–२ आम्बेगुदिन खाम्दिम्बेमा समेत फिवर क्लिनिक सञ्चालन गर्ने भएको छ । त्यहाँ खटिएका स्वास्थ्यकर्मीलाई पनि मासिक ५ हजार रुपैयाँ प्रोत्साहन प्रदान गर्ने गाउँपालिका अध्यक्ष टीकाराम गुरुङले जानकारी दिए ।

यसैबीच पालिकाको केन्द्र तेल्लोकस्थित ५ शय्याको अस्थायी कोभिड अस्पतालमा खटिएका चिकित्सक, स्वास्थ्यकर्मी, कार्यालय सहयोगी र एम्बुलेन्स चालकलाई प्रोत्साहन रकम प्रदान गर्ने निर्णय गरेको हो । सुुरु स्केलको ५० प्रतिशत रकम प्रोत्साहन रुवरूप उपलब्ध गराउने गाउँपालिका अध्यक्ष गुरुङले जानकारी बताए । कोरोना संक्रमितको उपचारमा प्रत्यक्ष रूपमा खटिएका १ जना चिकित्सक, १ जना पारामेडिक्स,१ जना नर्स, १ जना कार्यालय सहयोगले दैनिक १ हजार ५ सय रुपैयाँ प्राप्त गर्ने अध्यक्ष गुरुङले बताए ।
उनले भने, “कोरोना संक्रमण भएर मृत्यु भएकाको दाहसंस्कार गर्न २० हजार दिन्छौं । उपचारमा खाने बस्ने तथा खाजा खर्चसमेत पालिकाले नै बेहोर्छ ।” संक्रमितको गाउँपालिकास्थित अस्पतालमा उपचार सम्भव नभए चिकित्सकले रेफर गरेको अस्पतालसम्म यातायातको भाडा गाउँपालिकाले नै वेहोर्ने निर्णय गरेको छ । संक्रमितलाई पोषणयुक्त खानेकुरामा जोड दिँदै २ हजार रुपैयाँ दिने पालिकाले जनाएको छ । कोरोनाबाट संक्रमित भएका स्वास्थ्यकर्मी तथा कर्मचारीलाई आइसोलेसनमा राख्नका लागि गाउँपालिका केन्द्र नजिकको घर भाडामा समेत लिने निर्णय गरेको छ ।

सक्रमण फैलन नदिनका लागि सक्रमण रोकथाम तथा नियन्त्रणमा खटिएका पालिका क्षेत्रभित्रका सबै स्वास्थ्य संस्थाका इन्चार्ज एवं टोल विकास संस्थाका अध्यक्षहरूलाई सञ्चार खर्चवापत मासिक ५ सय रुपैयाँ दिने निर्णय समेत पारित गरेको छ । ८ वटा वडा रहेको गाउँपालिकामा ७२ वटा टोल विकास संस्था गठन गरेको छ । कोभिड सक्रमणको स्क्रीनिङ गर्न स्वास्थ्यकर्मीसहितको टोली आवश्यकताअनुसार वडा–वडामा खट्ने भएका छन् । प्राथमिक स्वास्थ्य केन्द्र तेल्लोकका ल्याब असिस्टेन्ट र १ जना स्वास्थ्यकर्मीलाई नियमानुसारको दैनिक भत्ता तथा फिल्ड भिजिट अलावा प्रोत्साहन स्वरुप खाजा तथा खाना खर्चवापत दैनिक ५ सय रुपैयाँ दिने भएको छ । सक्रमितको एक्स–रे गर्न खटिएका रेडियोग्राफरलाई प्रति केस ५ सय दिने निर्णयमा उल्लेख छ ।

गाउँपालिकाले कोभिड अस्थायी अस्पतालमा विद्युत अभाव हुन नदिन १० केभिएको जेनेरेटर तत्काल खरिद गर्ने प्रमुख प्रशासकीय अधिकृत सन्तोष घिमिरेले जानकारी दिए । पालिका मातहतका १० वटै स्वास्थ्य संस्थाका लागि ब्लड प्रेसर, अक्सिजनको मात्रा र पल्सको दर हेर्न उपयोगी हुने विप्स भाइटल मोनिटर तत्काल खरिद गर्ने भएको छ । वडा नं.–४ तेल्लोकका स्थानिय लक्ष्मी भट्टराईका अनुसार पालिकाको व्यवहारिक निर्णयले खूसी तुल्याएको बताए । भट्टराईले भने, “उपचारदेखि पोषिलो खानासम्म पालिकाले नै बहोर्ने भनेको छ । अझ रेफर हुँदा यातायात खर्च समेत उपलब्ध गराउने निर्णयले सरकार भएको आभास गराएको छ ।” गाउँपालिका अध्यक्ष गुरुङका अनुसार बाँचेमात्र धनसम्पत्ती र अवसरको महत्व हुने भएकाले नागरिकको जीवन रक्षाका लागि स्थानिय सरकार प्रतिबद्ध हुनुपर्छ । गाउँपालिकामा १६ जना संक्रमित छन् ।

प्रतिक्रिया दिनुहोस्