एमालेका १२ नेतालाई स्पष्टीकरण

सत्तारुढ नेकपा एमालेले नेपाली कांग्रेसका सभापति शेरबहादुर देउवालाई प्रधानमन्त्रीमा नियुक्त गर्नुपर्ने भन्दै सर्वोच्च अदालतमा दायर गरिएको रिटमा हस्ताक्षर गर्ने नेपाल पक्षका १२ जना नेतालाई स्पष्टीकरण सोधेको छ ।
पार्टी केन्द्रीय कार्यालयका सचिव शेरबहादुर तामाङले उनीहरुलाई २४ घण्टे अल्टिमेटमसहित स्पष्टीकरण पत्र पठाइएको जानकारी दिएका छन् । संसद विघटन भएपछि विपक्षी गठबन्धनले प्रतिनिधिसभा पुनःस्थापना, देउवालाई बहुमत सांसदको हस्ताक्षर भएकाले प्रधानमन्त्री नियुक्त गर्नुपर्ने लगायतका माग राखेर रिट दायर गरेका छन् । उक्त रिटमा नेकपा एमालेका २३ जना सांसदले हस्ताक्षर गरेका छन् ।
एमालेले नेता माधव नेपाल, झलनाथ खनाल तथा भीम रावलसहित ११ जनालाई पार्टीको साधारण सदस्यसमेत नरहने गरेर निष्काशित गरिसकेको छ । बाँकी रहेका १२ जनालाई २४ घण्टे अल्टिमेटमसहित स्पष्टीकरण सोधेको हो । घनश्याम भुसाल, सुरेन्द्र पाण्डे, विरोध खतिवडा, झपट रावल, जीवनराम श्रेष्ठ, सोमप्रसाद पाण्डे, दीपकप्रसाद भट्ट, कृष्णलाल महर्जन, नारायण खतिवडा, मेटमणी चौधरी, भवानीप्रसाद खापुङ र यज्ञराज सुनुवारलाई स्पष्टीकरण पत्र पठाइएको छ ।
सोमबार बसेको नेकपा एमालेको स्थायी कमिटी बैठकले माधवकुमार नेपालसहित ११ जना सांसदलाई पार्टी सदस्यताबाट निष्कासनका साथै यी १२ जना सांसदलाई २४ घण्टे अल्टिमेटमसहित स्पष्टीकरण पत्र पठाउने निर्णय गरेको थियो ।