चीनबाट सिलिन्डर ल्याउँदै, एकका लागि एक अभियान «

चीनबाट सिलिन्डर ल्याउँदै, एकका लागि एक अभियान

 

झापामा सञ्चालनमा रहेको एकका लागि एक अभियानले सुरु गरेको ‘एक व्यक्ति एक सिलिन्डर’ सहयोगमार्फत २ सय ५० वटा अक्सिजन सिलिन्डरबापतको नगद सहयोग गर्ने प्रतिबद्धता आएको छ । अभियानले जुम एप्सबाट गरेको पत्रकार सम्मेलन कार्यक्रममा सहभागि दाताहरूले उक्त प्रतिबद्धता जनाएका हुन् ।
अक्सिजन सिलिन्डर बैंक स्थापना गर्न अस्ट्रेलियाको किंग्सटन इन्स्टिच्युटले १० थान सिलिन्डरबापतको नगद सहयोगको प्रतिबद्धता जनाएको छ । इन्स्टिच्युटका सञ्चालक दिपक खनालले यस्तो प्रतिबद्धता जनाएका हुन् । अभियानले यसअघि स्थापना गरेको पीसीआर प्रयोगशालाका लागि अन्तर्राष्ट्रिय झापाली समाजले प्रदान गरेको २५ लाख रुपैयाँ संकलन समितिका खनाल संयोजक थिए । उनकै अगुवाई संसारभर रहेका झापालीले २५ लाख जुटाउन सहयोग गरेका थिए ।
त्यस्तै, रोटरी क्लब अफ बिर्तामोडले पाँच थान अक्सिजन सिलिन्डरको प्रतिबद्धता जनाएको छ । रोटरीका तर्फबाट अध्यक्ष निर्मल भट्टराईले उक्त प्रतिबद्धता जनाएका हुन् । झापाकै रुद्र गौरी श्री अम्बिका ओली प्रतिष्ठानले पनि पाँच थान सिलिन्डरको प्रतिबद्धता जनाएको छ । प्रतिष्ठानका तर्फबाट महासचिव गोपाल ओलीले सो प्रतिबद्धता जनाएका हुन् ।
झापा–काठमाडौं सम्पर्क मञ्च क्षेत्र नम्बर ४ ले सिलिन्डर खरिदका लागि नगद ५१ हजार रुपैयाँ सहयोगको प्रतिबद्धता जनाएको छ । मञ्चका अध्यक्ष सुनिल भेटवालले पत्रकार सम्मेलनमार्फत सो रकम सहयोग गर्ने प्रतिबद्धता जनाएका हुन् । अभियानलाई व्यक्तिगत रूपमा पनि सहयोग प्राप्त भइरहेको छ । अभियानको सचिवालयका कर्मचारी मातृका सुवेदीका अनुसार पहिलो दिन ९ जनाले सिलिन्डरबापतको १५ हजार रुपैयाँका दरले सहयोग गरेका थिए । आज दोस्रो दिन साँझसम्म २० जना पुग्ने सुवेदीले बताए ।
झापामा पनि अक्सिजन सिलिन्डर अभाव हुने संकेत हुँदै गएपछि कोरोना संक्रमितको उपचारमा सहयोग गर्न अभियानले अक्सिजन बैंक स्थापना गरेको हो । अभियानका परिकल्पनाकार तथा संयोजक महेन्द्रकुमार गिरीका अनुसार तत्कालाई पहिलो चरणमा चार सय थान अक्सिजन सिलिन्डरको खरिद प्रक्रिया अघि बढाइएको छ । अभियानसँग हाल २० लाख रुपैयाँ बचत रहेको सहसंयोजक विनोद बस्नेतले जानकारी दिए । ४०० थान सिलिन्डरका लागि लागभग ६० लाख रुपैयाँ लाग्ने बताइएको छ ।
अभियानले चीनबाट सिलिन्डर ल्याउन प्रक्रिया अघि बढाएको हो । ४८ लिटर क्षमताका ती सिलिन्डर एअर कार्गोमार्फत काठमाडौं हुँदै झापा ल्याइने संयोजक गिरीले बताए । अभियानसँग हाल १५ लाख ७७ हजार रुपैयाँ बचत रहेको सहसंयोजक विनोद बस्नेतले जानकारी दिए । ४०० थान सिलिन्डरका लागि ढुवानीसहित लागभग ६० लाख रुपैयाँ लाग्ने बताइएको छ । दोस्रो चरणमा अभियानले अक्सिजन बैंकको स्थापना गर्ने, एक्सरे मेसिन खरिद, डाक्टर परामर्श सेवा र कोभिड संक्रमित विपन्न परिवारहरूका लागि खाद्यान्न सहयोग कार्यक्रम सार्वजनिक गरेको छ ।
शनिबार जुम एप्समार्फत भएको पत्रकार सम्मेलनमा संयोजक गिरीले कार्यक्रमबारे बताएका थिए । अक्सिजन बैंकका लागि काम सुरु भइसकेको छ भने एक्सरे मेसिन स्थापना गर्न प्रक्रिया अघि बढाइको छ ।
झापा जिल्ला सहकारी संघको पहलमा अभियानमार्फत एक्सरे मेसिन सञ्चालनमा ल्याइने संघका अध्यक्ष गणेश ढकालले जानकारी दिए । त्यसका लागि संघले काम गरिरहेको बताइएको छ । एक्सरे मेसिन हाल पिसिआर ल्याब रहेको कनकाईस्थित समर्पण भवनमा स्थापना गरी सञ्चालनमा ल्याइने ढकालले बताए । अभियानले पहिलो चरणको कोरोना संक्रमणको बेला एक करोडभन्दा बढी खर्चमा पिसिआर ल्याब स्थापना गरेको छ । ल्याब स्थापना भएपछि झापालगायत साविक मेची अञ्चलबासीको कोरोना परीक्षणमा सहज भएको छ ।

प्रतिक्रिया दिनुहोस्